মই দলৰ তুলাচনীত উঠিব নোৱাৰিলো, তথাপিও আক্ষেপ নাই: হৰেণছিং বে'

ডিফু, ৬ মাৰ্চ: তিনিখন পাৰ্বত্য জিলাৰ একমাত্ৰ জনজাতীয় সংসদীয় সমষ্টি ডিফুৰ পৰা দলীয় প্ৰাৰ্থিত্ব লাভৰ পৰা বঞ্চিত হ’ল সাংসদ হৰেণছিং বে' ৷ বিজেপিৰ টিকট ঘোষণাৰ পিচত মঙলবাৰে ডিফুত সাংবাদিকৰ সৈতে মুখামুখি হয় সাংসদগৰাকী ৷

কাৰ্বি আংলং জিলা বিজেপি সভাপতি ৰলেণ্ড কিলিং উপস্থিত থকা সংবাদমেলত সাংসদ বে'য়ে কয়, ‘‘এয়াই হ’ল বিজেপি দল ৷ যিটো দলে যিকোনো সিদ্ধান্তৰে সকলোকে আচম্বিত কৰিব পাৰে ৷ দলৰ গুড বুকৰ তুলাচনীত মই স্থান নাপালো, হয়তো মই দলৰ বাবে প্ৰত্যাশিতভাবে কাম কৰিব নোৱাৰিলো ৷ যাৰ ফলত মই টিকটৰ পৰা বঞ্চিত হ’লো ৷  ইয়াৰ বাবে মোৰ কোনো আক্ষেপ নাই ৷ মই দলৰ হৈ নিষ্ঠাসহকাৰে কাম কৰি যাম ৷’’

সাংসদগৰাকী কয়, ‘‘২০১৯ চনত সমগ্ৰ অসমৰ ভিতৰত মই সৰ্বাধিক শতাংশ ভোটেৰে বিজয়ী হৈ আহিছিলো ৷ এইবাৰ দলে অমৰছিং তিচ'ক প্ৰাৰ্থিত্ব প্ৰদান কৰিছে ৷ দলৰ এই সিদ্ধান্তক মই স্বাগতম জনাইছোঁ ৷ অমৰছিং তিচ'ক তিনি লাখৰো অধিক ভোটত বিজয়ী কৰি অনাটোৱেই আমাৰ প্ৰধান লক্ষ্য ৷’’

লগতে পঢ়ক: প্ৰদান বৰুৱাক প্ৰাৰ্থিত্ব প্ৰদান কৰাক লৈ সন্তুষ্ট নহয় লখিমপুৰবাসী !