মৰাণ: ৰাজ্য়ত হৰিণাৰ মাংস খোৱা লোকসকলৰ বিৰুদ্ধে আৰক্ষীৰ লগতে বন বিভাগে কঠোৰ পদক্ষেপ লৈছে । সময়ে সময়ে বন বিভাগৰ অভিযানত হৰিণা বধকাৰী আৰু মাংস খোৱা লোক গ্ৰেপ্তাৰ হৈছে যদিও একাংশ লোকে এনে অপৰাধমূলক কাৰ্য সংঘটিত কৰি আহিছে । ইয়াৰ মাজতেই গণৰাজ্য় দিৱসৰ পূৰ্বে বন বিভাগে আটক কৰিলে দুগৰাকী লোকক ।
গণৰাজ্য দিৱসক উদযাপনৰ বাবে শনিবাৰে আৰক্ষী প্ৰশাসনে যুদ্ধকালীন প্ৰস্তুতি চলায় । কোনো ধৰণৰ হিংসাত্মক ঘটনাৰ যাতে নহয় তাৰ বাবেই আৰক্ষীয়ে কটকটীয়া নিৰাপত্তাৰ ব্যৱস্থা গঢ়ি তোলে । বিশেষকৈ ডিব্ৰুগড়ত মুখ্যমন্ত্ৰী হিমন্ত বিশ্ব শৰ্মাই গণৰাজ্য দিৱসৰ পতাকা উন্মোচন কৰা বাবে আৰক্ষীয়ে নিৰাপত্তাৰ ব্যৱস্থা কটকটীয়া কৰাৰ মাজতেই শনিবাৰে সন্ধিয়া নামৰূপত উদ্ধাৰ হয় হৰিণাৰ মাংস । নামৰূপৰ বন বিভাগৰ এক অভিযানত উদ্ধাৰ হয় এই হৰিণাৰ মাংস ।
এই অভিযানত বন বিভাগে এগৰাকী মহিলা আৰু এজন পুৰুষক আটক কৰে । জানিব পৰা মতে, দিহিং পাটকাই ৰাষ্ট্ৰীয় উদ্যানৰ পৰা ওলাই অহা হৰিণা পহু এটা ধৰি বধ কৰি খোৱাৰ বাবে প্ৰস্তুতি চলাইছিল । এই খবৰ লাভ কৰাৰ পাছতে তৎপৰ হয় বন বিভাগ । লগে লগে আৰম্ভ কৰে অভিযান ।
বন বিভাগৰ বিষয়াই ঘটনা সন্দৰ্ভত সাংবাদিকৰ আগত কয়, "গোপন সূত্ৰৰ পৰা জানিব পাৰিলো যে দিহিং পাটকাই ৰাষ্ট্ৰীয় উদ্যানৰ পৰা ওলাই অহা এটা পহু হত্যা কৰি কিছুমান লোকে ভাগ কৰি খাইছে । সেই খবৰৰ পাছতে আমি অভিযান চলায় মাংস ৰান্ধি থকা অৱস্থাত এজনক কৰায়ত্ত কৰো । তেওঁৰ স্বীকাৰোক্তিৰ ভিত্তিত আন এঘৰত অভিযান চলাই কেঁচা মাংস উদ্ধাৰ কৰাৰ লগতে ঘৰটোৰ গৰাকীক নাপাই তেওঁৰ পত্নীক আটক কৰি নিজৰ জিম্মাত লৈছো । ঘটনাক লৈ আমি তদন্ত আৰম্ভ কৰিছো । এই ঘটনা লগত জড়িত থকাসকলৰ বিৰুদ্ধে লোৱা হ'ব কঠোৰ ব্যৱস্থা ।"
