গুৱাহাটী: "প্ৰেমে নামানে বয়সৰ সীমা, প্ৰেমে মাথো জানো প্ৰেমৰ ঠিকনা । নৌকাই বিচাৰি লয় নিজৰ ঘাট, মানুহে বিচাৰি লয় সুখৰ বাট...।" ইয়াকেই যেন সঁচা কৰিলে এহাল ককা-আইতাই । জীৱনৰ বিয়লি বেলাত প্রেমৰ ৰঙেৰে জীপাল হোৱা ককা-আইতা আজি আবদ্ধ হ'ল বিবাহপাশত । উদুলি-মুদুলি হৈ পৰিল ৰভাতলী । জাক জাক আয়তীৰ উৰুলিত মুখৰিত মঠঘৰীয়াস্থিত মাতৃ নিৱাস ।
বেলতলাৰ প্ৰমোদ তালুকদাৰ সোঁৱৰণী বৃদ্ধ আৱাসৰ পৰা দৰা সাজি আহি পদ্মেশ্বৰ ককাই নিবলৈ আহিল বিয়লি বেলাৰ জীৱন সংগীক । বৰযাত্ৰীক লগত লৈ উপস্থিত হ'লহি গুৱাহাটীৰ ২ নং মঠঘৰীয়াস্থিত মাতৃ নিৱাসৰ পদূলিত । ২ নং মঠঘৰীয়াস্থিত মাতৃ নিৱাসত আজীৱন এক হোৱাৰ প্ৰতিশ্ৰুতিৰে হোমৰ গুৰিত বহিল ৭১ বছৰীয়া ককা পদ্মেশ্বৰ গোৱালা আৰু ৬৫ বছৰীয়া আইতা জয়াপ্ৰভা বৰা । সামাজিক ৰীতি-নীতিৰে হোমৰ জুইক সাক্ষী কৰি দুয়ো-দুয়োকে দিলে আজীৱন এক হৈ ৰোৱাৰ প্ৰতিশ্ৰুতি ।
কেনেদৰে চিনাকি হৈছিল ককা-আইতাৰ ?
বিগত বৰ্ষৰ জানুৱাৰী ৩০ তাৰিখে তেজপুৰৰ আইতা জয়াপ্ৰভা বৰা আহিছিল বেলাতলাৰ প্ৰমোদ তালুকদাৰ সোঁৱৰণী বৃদ্ধাৱাসলৈ । ইফালে সেই বৰ্ষৰে মার্চ মাহত বোকাখাতৰ ৭১ বছৰীয়া ককা পদ্মেশ্বৰ গোৱালা আহিছিল সেই একেখন বৃদ্ধাশ্ৰমলৈ । বৃদ্ধাশ্ৰমখনৰ পৰিচালক উৎপল হৰ্ষবৰ্ধনে জনায়,"ককা-আইতাৰ এইয়া প্ৰথম বিবাহ । ককাই সৰুৰে পৰা বেলেগৰ ঘৰত কাম কৰিছিল । আনহাতে আইতা আছিল ভাতৃৰ লগত । ভাতৃৰ মৃত্যু পাছত ভতিজাৰ লগত আইতা আহে বৃদ্ধাশ্ৰমখনলৈ । বৃদ্ধাশ্ৰমলৈ আহি মনে বিচৰা সংগীজনক বিচাৰি পালে দুয়োগৰাকীয়ে ।"
ইফালে ককা-আইতাই জনোৱা অনুসৰি ককায়ে ভাল গান গায় । আৱাসত অনুষ্ঠিত হোৱা বিভিন্ন অনুষ্ঠানত গীত গাইছিল ককাই । ককাৰ গীত শুনি প্ৰেমত পৰিছিল আইতা । বিশেষকৈ 'অচিনাকী ভণ্টিজনীৰ নাজানো ক’ত ঘৰ’ এই গীতজুৰিয়ে প্ৰেমত পেলাইছিল আইতাক । পৰৱৰ্তী সময়ত ককাৰ প্ৰেমত পৰি আইতাই দিছিল প্ৰেমৰ প্ৰস্তাৱ । আইতাৰো মাত-কথা, আচাৰ-ব্যৱহাৰ ভাল লাগিছিল ককাৰ ।
প্ৰেমে পালে পূৰ্ণতা:
পৰৱৰ্তী সময়ত ককা-আইতাৰ প্ৰেমক পূৰ্ণতা দিয়াৰ বাবে প্ৰমোদ তালুকদাৰ সোঁৱৰণী বৃদ্ধাৱাসৰ পৰিচালক উৎপল হৰ্ষবৰ্ধনে দুয়োগৰাকীকে বিয়া পাতি দিয়াৰ সিদ্ধান্ত গ্ৰহণ কৰিলে । ইফালে বিয়া ঠিক হোৱাৰ পাছত কইনা আইতা জয়াপ্ৰভা বৰাক ২ নং মঠঘৰীয়াস্থিত মাতৃ নিৱাসলৈ স্থানান্তৰ কৰা হয় । শেষত সকলোৰে সিদ্ধান্তত শুকুৰবাৰে ২ নং মঠঘৰীয়াস্থিত মাতৃ নিৱাসত ৰাইজৰ উপস্থিতিত পূৰ্ণতা লাভ কৰিলে ককা-আইতাৰ এই প্ৰেমে ।
ককা-আইতাৰ বিয়লি বেলাটো যাতে মধুৰ হয় তাৰে কামনাৰে ৰভাতলীত উপস্থিত হ'লহি বহুজন । গালে জোৰানাম, দিলে উৰুলি । শ্বাশ্বত প্ৰেমে পালে পূৰ্ণতা । দুটি চকুৰ মিলনৰ পৰা দুয়ো দুয়োৰে হোৱাৰ ক্ষণটি যেন হৈ পৰিল বাৰুকৈয়ে বিশেষ । আপোনজনে আঁতৰাই ৰখা এই দুই হৃদয়ে যেন বিচাৰি পালে নিজৰ সুখৰ বাট । আমিও কামনা কৰিলোঁ ককা-আইতাৰ যুগ্ম জীৱন সুখৰ হওক ।
