لکھنؤ: یوپی کی ویجیلنس ٹیم نے جی ایس ٹی کے ڈپٹی کمشنر دھنیندر کمار پانڈے کو گرفتار کیا ہے۔ لکھنؤ میں جی ایس ٹی زون 20 کے ڈپٹی کمشنر دھنیندر پانڈے 2 لاکھ روپے کی رشوت لے رہے تھے۔ اسی وقت ویجیلنس ٹیم نے اسے رنگے ہاتھوں گرفتار کرلیا۔ افسران کے مطابق دھنیندر پانڈے ایڈم ڈیٹا سروسز سے رشوت لے رہے تھے۔ ڈپٹی کمشنر دھنیندر پانڈے نے کچھ کام کے عوض کمپنی سے 2 لاکھ روپے کی رشوت طلب کی تھی۔ دھنیندر پانڈے کو ویجیلنس ٹیم نے سیلز ٹیکس ہیڈ کوارٹر سے گرفتار کیا ہے۔
معلومات کے مطابق ایڈم ڈیٹا سرویسس کے ایک ملازم نے ویجیلنس کے ہیلپ لائن نمبر پر کال کرکے شکایت درج کروائی تھی کہ ڈپٹی کمشنر آف کمرشل ٹیکس دھنیندر کمار پانڈے ان کی کمپنی کے جی ایس ٹی ریفنڈ پاس کرنے کے عوض 2 لاکھ روپے کی رشوت مانگ رہے ہیں۔ شکایت ملنے پر ایس پی ویجیلنس ڈاکٹر اروند چترویدی نے رشوت کی مانگ کے ثبوت مانگے تھے۔ ملازم نے ویجیلنس کو بتایا کہ ایڈم ڈیٹا سروسز پرائیویٹ لمیٹڈ امریکہ میں مقیم کمپنی کی طرف سے فراہم کردہ سکین شدہ ڈیٹا شیٹس کو ڈیجیٹل شکل میں ڈیش بورڈ میں تیار کرتا ہے اور انہیں واپس بھیج دیتا ہے۔