20:48 November 20
''మహా'లో స్థిర ప్రభుత్వాన్ని ఏర్పాటు చేస్తాం'
మహారాష్ట్రలో కాంగ్రెస్-ఎన్సీపీ సమావేశం ముగిసింది. ఇరు పార్టీల మధ్య సుదీర్ఘ చర్చలు జరిగినట్లు ప్రకటించారు కాంగ్రెస్ నేత పృథ్వీరాజ్ చవాన్. చర్చలు ఇంకా కొనసాగుతాయని.. త్వరలోనే స్థిరమైన ప్రభుత్వాన్ని ఏర్పాటు చేయనున్నట్లు సంకేతాలిచ్చారు.
మహారాష్ట్రలో కచ్చితంగా ప్రత్యామ్నాయ ప్రభుత్వ ఏర్పాటు అవసరముందని వ్యాఖ్యానించారు ఎన్సీపీ నేత నవాబ్ మాలిక్. కాంగ్రెస్-ఎన్సీపీ-శివసేన ఒక్కటి కాకుంటే ఇది సాధ్యం కాదన్నారు. సమస్యల్ని పరిష్కరించుకొని.. త్వరలోనే ప్రభుత్వాన్ని ఏర్పాటు చేస్తామన్నారు మాలిక్.
18:27 November 20
కాంగ్రెస్-ఎన్సీపీ నేతల సమాలోచనలు
కాంగ్రెస్-ఎన్సీపీ నేతలు దిల్లీలోని పవార్ నివాసంలో సమావేశమయ్యారు. కాంగ్రెస్ సీనియర్లు అహ్మద్ పటేల్, జైరాం రమేశ్, మల్లికార్జున్ ఖర్గే, పృథ్వీరాజ్ చవాన్, కేసీ వేణుగోపాల్, బాలాసాహెబ్ థోరట్ తదితరులు హాజరయ్యారు. ఎన్సీపీలో సుప్రియా సూలే, అజిత్ పవార్, జయంత్ పాటిల్, నవాబ్ మాలిక్ తదితరులు సమావేశంలో పాల్గొన్నారు. మహారాష్ట్రలో ప్రభుత్వ ఏర్పాటుపై చర్చించినట్లు సమాచారం.
17:07 November 20
పవార్ నివాసానికి కాంగ్రెస్ నేతలు
కాంగ్రెస్-ఎన్సీపీ సమావేశం మరికాసేపట్లో ప్రారంభం కానుంది. ఇప్పుడిప్పుడే కాంగ్రెస్ నేతలు.. దిల్లీలోని శరద్ పవార్ నివాసానికి చేరుకుంటున్నారు.
16:59 November 20
మోదీతో పవార్ భేటీ.. రైతు సమస్యలపైనేనా..!
ప్రధాని నరేంద్ర మోదీతో ఎన్సీపీ అధినేత శరద్ పవార్ భేటీ అయ్యారు. మహారాష్ట్ర రైతు సమస్యలపై ప్రధానికి మూడు పేజీల లేఖ సమర్పించినట్లు పవార్ తెలిపారు. అయితే... మహారాష్ట్ర రాజకీయ పరిస్థితుల నేపథ్యంలో ఈ సమావేశం చర్చనీయాంశమైంది.
16:57 November 20
సేనతో కూటమికి సోనియా ఒప్పుకున్నట్లేనా..!
మహారాష్ట్ర రాజకీయాల్లో సరికొత్త ఊహాగానాలు వినిపిస్తున్నాయి. కూటమిపై ఓ స్పష్టత వచ్చినట్లు తెలుస్తోంది. సేనతో కలిసేందుకు కాంగ్రెస్ అధ్యక్షురాలు సోనియా గాంధీ సుముఖంగా ఉన్నట్లు వార్తలు వస్తున్నాయి. ఇదే జరిగితే.. కాంగ్రెస్-ఎన్సీపీ-శివసేన నేతృత్వంలో ప్రభుత్వం ఏర్పాటయ్యే అవకాశాలున్నాయి.
16:43 November 20
త్వరలోనే ప్రభుత్వాన్ని ఏర్పాటు చేస్తాం: కాంగ్రెస్-ఎన్సీపీ
మహారాష్ట్ర రాజకీయాలు ఉత్కంఠ రేపుతున్నాయి. ప్రధాని మోదీతో ఎన్సీపీ అధినేత శరద్ పవార్ భేటీ అనంతరం.. నేడు కాంగ్రెస్-ఎన్సీపీ మహారాష్ట్ర సమన్వయ కమిటీ దిల్లీలో సమావేశం కానున్నాయి. కాంగ్రెస్-ఎన్సీపీ భేటీ అనంతరం శివసేన నేత సంజయ్ రౌత్... పవార్ను కలవనున్నారు.
