'విశ్వంభర'లో బాలీవుడ్‌ హీరో - అధికారికంగా ప్రకటించిన టీమ్‌

Chiranjeevi Viswambara Movie Bollywood Hero : కొద్ది రోజులుగా మెగాస్టార్ చిరంజీవి నటిస్తున్న విశ్వంభరలో బాలీవుడ్‌ స్టార్‌ కునాల్‌ కపూర్‌ నటిస్తున్నట్లు వార్తలు వచ్చిన సంగతి తెలిసిందే. విలన్​గా ఆయన కనిపించనున్నారని కథనాలు కనపడ్డాయి. తాజాగా ఈ విషయాన్ని అధికారికంగా ప్రకటించింది మూవీటీమ్. అయితే కునాల్​ ఏ పాత్రలో కనిపించనున్నారనే విషయాన్ని మాత్రం గోప్యంగా ఉంచింది. ఇందులో కునాల్‌ పాత్ర చాలా పవర్‌ఫుల్‌గా ఉంటుందని మాత్రం టాక్ వినిపిస్తోంది. ఇప్పటికే ఆయనపై కొన్ని కీలకమైన సన్నివేశాలను కూడా చిత్రీకరించినట్లు తెలిసింది. కాగా, జులై చివరి నాటికి చిత్రీకరణ పూర్తి చేయాలనే లక్ష్యంతో శరవేగంగా షూటింగ్​ చేస్తున్నారు. ప్రస్తుతం షూటింగ్‌ హైదరాబాద్‌లో జరుగుతోంది. ఈ షెడ్యూల్‌లో కునాల్‌ కూడా పాల్గొంటున్నారట. ఇంకా ఈ చిత్రంలో విజువల్‌ ఎఫెక్ట్స్‌కు ప్రాధాన్యం ఎక్కువ ఇస్తున్నారు. అందుకే పోస్ట్‌ ప్రొడక్షన్‌పై మూవీటీమ్​ ప్రత్యేక దృష్టి పెట్టనుంది.