తప్పు చేసిన వారే భయపడతారు - కేసీఆర్​లో దడ మొదలైంది : మంత్రి జూపల్లి - కేసీఆర్‌పై మంత్రి జూపల్లి కామెంట్స్

Minister Jupally Comments on KCR : రాష్ట్ర నీటి ప్రాజెక్టులను కేంద్రానికి అప్పగించే ప్రసక్తే లేదని మంత్రి జూపల్లి కృష్ణారావు స్పష్టం చేశారు. పార్లమెంట్ ఎన్నికల్లో కేసీఆర్ పరువు కోసం తాపత్రయపడుతున్నారని విమర్శించారు. రాష్ట్ర నీటి వాటాను బీఆర్​ఎస్​ ప్రభుత్వమే వదిలి పెట్టిందని ఆరోపించారు. తప్పు చేసిన వారే ఎప్పుడూ భయపడతారని, ఇప్పుడు మాజీ ముఖ్యమంత్రి కేసీఆర్​లో భయం మొదలైందని అన్నారు. గాంధీ భవన్‌లో ఏఐసీసీ కార్యదర్శి వంశీచంద్​తో కలిసి జూపల్లి కృష్ణారావు మీడియా సమావేశంలో మాట్లాడారు.  

Minister Jupally On Projects Handover to KRMB : కేంద్ర ప్రభుత్వానికి బీఆర్​ఎస్​ ప్రభుత్వం తలొగ్గిందని, ఇప్పుడు దొంగే దొంగ అన్నట్లుగా ఆ పార్టీ పరిస్థితి మారిందని మంత్రి జూపల్లి కృష్ణారావు విమర్శించారు. 2014 నుంచి 2023 వరకు బీఆర్​ఎస్​ చేసిన పనులను సభ ద్వారా ప్రజలకు తెలియజేస్తామని చెప్పారు. రాష్ట్ర నీటి వాటాను కేసీఆర్ సాధించలేకపోయారని ఏఐసీసీ కార్యదర్శి వంశీచంద్ అన్నారు. అపెక్స్‌ కౌన్సిల్ మీటింగ్‌కు బీఆర్​ఎస్​ ప్రభుత్వం ఎందుకు హాజరు కాలేదో సమాధానం చెప్పాలని డిమాండ్ చేశారు. బీఆర్‌ఎస్ ప్రభుత్వంలో కృష్ణానది కింద ఒక్క ఎకరాకు కొత్తగా నీరు ఇవ్వలేదన్నారు.