Whatsapp Introduces New Feature:మార్కెట్లో ఎన్నో రకాల మెసేజింగ్ యాప్స్ ఉన్నా వాట్సాప్ క్రేజ్ మాత్రం ఏమాత్రం తగ్గడం లేదు. ఈ యాప్ తన యూజర్స్కు థ్రిల్లింగ్ ఎక్స్పీరియన్స్ ఇచ్చేందుకు ఎప్పటికప్పుడు కొంగొత్త ఫీచర్లను తీసుకురావటమే ఇందుకు కారణంగా చెప్పొచ్చు. వ్యక్తిగత ప్రైవసీకి పెద్దపీట వేస్తూనే సరికొత్త అప్డేడ్స్ ఇస్తూ ఈ యాప్ తన క్రేజ్ను మరింత పెంచుకుంటోంది. ఈ క్రమంలో వాట్సాప్ తాజాగా మరో క్రేజీ ఫీచర్ తీసుకొచ్చింది. ఈ ఫీచర్ వినియోగదారులకు ఇప్పటికే అందుబాటులోకి వచ్చింది. ఇంతకీ అసలేంటీ ఫీచర్? దీన్ని ఎలా ఉపయోగించాలి? వంటి వివరాలు మీకోసం.
గత కొంతకాలంగా వాట్సాప్ 'మెన్షన్' అనే కొత్త ఫీచర్ను తీసుకొస్తుందనే వార్తలు చక్కర్లు కొట్టాయి. దీని ద్వారా ఇన్స్టాగ్రామ్ తరహాలో స్టోరీ అప్లోడ్ చేసే సమయంలో నచ్చిన వ్యక్తులకు ట్యాగ్ చేసుకునే అవకాశం ఉండటంతో యూజర్లు ఈ ఫీచర్ ఎప్పుడెప్పుడు అందుబాటులోకి వస్తుందా అని ఎదురుచూశారు. అయితే ఎట్టకేలకూ వాట్సాప్ ఈ ఫీచర్ను తాజాగా అందుబాటులోకి తీసుకొచ్చింది. ఇన్నాళ్లూ ఇన్స్టాలో మాత్రమే ఉన్న ఈ ఫీచర్ ఇప్పుడు వాట్సాప్లోనూ అందుబాటులోకి రావడంతో యూజర్స్ ఎగిరి గంతేస్తున్నారనే చెప్పొచ్చు.
ఈ ఫీచర్ ఉపయోగాలేంటి?:సాధారణంగా ఇన్‌స్టాగ్రామ్లో మనం స్టోరీ అప్లోడ్ చేసేటప్పుడు మెన్షన్ అనే ఫీచర్ వాడుతూ ఉంటాం. నచ్చిన వ్యక్తులను '@' సాయంతో ట్యాగ్ చేస్తుంటాం. అలా ట్యాగ్ చేసిన వ్యక్తులకు మనం స్టోరీ పెట్టినట్లు నోటిఫికేషన్ అందుతుంది. దీంతో వాళ్లు మన స్టోరీని చూస్తారు. ఇప్పుడు అచ్చం అలాంటి సదుపాయాన్నే వాట్సాప్ కూడా తన యూజర్స్కు అందుబాటులోకి తీసుకొచ్చింది. దీంతో ఇకపై వాట్సాప్లో స్టేటస్ పెట్టే సమయంలో కాంటాక్ట్‌లో నచ్చిన వ్యక్తులను ట్యాగ్ చేసుకోవచ్చు.