MG Windsor EV Price Increase:ప్రముఖ ఆటో మొబైల్‌ కంపెనీ JSW MG మోటార్‌ ఇండియా తన పాపులర్‌ ఎలక్ట్రిక్ కారు విండ్సార్ ఈవీ ధరల్ని పెంచింది. దీని అన్ని వేరియంట్ల ధరను రూ.50,000 పెంచుతున్నట్లు ప్రకటించింది. దీంతోపాటు ఫ్రీ ఛార్జింగ్ సదుపాయాన్ని కూడా నిలిపివేస్తున్నట్లు కంపెనీ వెల్లడించింది.
కంపెనీ ఈ కారు లాంఛ్ సమయంలోనే దీని ప్రారంభ ధరను కేవలం 10వేల యూనిట్లు వరకు లేదా డిసెంబర్‌ 31 వరకు మాత్రమే పరిమితం అని తెలిపింది. ఈ క్రమంలోనే 2024 డిసెంబర్‌ నాటికి విండ్సార్ ఈవీ విక్రయాలు 10వేల యూనిట్ల మైలురాయిని చేరుకోవడంతో అనుకున్నట్లుగానే కంపెనీ దీని అన్ని వేరియంట్ల ధరలను సవరించింది.
దీంతోపాటు కంపెనీ విండ్సార్ ఈవీ కొనుగోలు చేసిన కస్టమర్లకు అందింస్తున్న ఫ్రీ ఛార్జింగ్ సదుపాయాన్ని కూడా నిలిపివేసింది. ఇప్పటివరకు కాంప్లిమెంటరీ ఆఫర్‌ కింద ఎంజీ ఇ-హబ్‌ యాప్‌ను ఉపయోగించి ఛార్జింగ్ స్టేషన్లలో వినియోగదారులకు ఉచితంగా ఛార్జ్‌ చేసుకునే వెసులుబాటు ఉండేది. అయితే ఇక నుంచి ఆ వెసులుబాటు ఉండదని కంపెనీ స్పష్టం చేసింది.
అంతేకాక ఈ కారు కొనుగోలు చేసిన ఫస్ట్ ఓనర్కు ఈవీ బ్యాటరీపై లైఫ్‌టైమ్‌ ఫ్రీ వారెంటీ సదుపాయం ఉండగా.. వారి నుంచి కారు కొనుగోలు చేసేవారికి 8 ఏళ్ల పాటు లేదా 1,60,000 కిలోమీటర్ల వరకు మాత్రమే వారెంటీని పరిమితం చేసింది.
సవరించిన తర్వాత ధరలు ఇలా!: ఈ కొత్త ధరల సవరణ అనంతరం విండ్సార్ బేసిక్‌ వేరియంట్‌ ధర రూ.13.99 లక్షలకు (ఎక్స్‌-షోరూమ్‌) చేరుకుంది. ఇక దీని మిడ్ లెవల్‌ ధర రూ.14.99 లక్షలకు చేరుకోగా టాప్‌ వేరియంట్‌ ధర రూ.15.99 లక్షలుగా ఉంది.