Green Dot on Your Android Phone : మీరు ఆండ్రాయిడ్ ఫోన్ వాడుతున్నారా? మీ మొబైల్ స్క్రీన్ కుడిపక్క ఎగువ మూలలో ఎప్పుడైనా గ్రీన్ డాట్ను (ఆకుపచ్చ చుక్క) గమనించారా? అదేంటో అని ఎప్పుడైనా సందేహం వచ్చిందా? అయితే ఈ స్టోరీ మీ కోసమే. ఆండ్రాయిడ్ ఫోన్లలో ఈ గ్రీన్ డాట్ కనిపించడానికి ప్రత్యేక కారణం ఉంది. గోప్యతా సెట్టింగ్లపై యూజర్కు మరింత నియంత్రణ ఉండటానికి ఈ స్పెషల్ ఫీచర్ను తీసుకొచ్చారు. అసలు ఈ ఫీచర్ ఎలా పనిచేస్తుంది? దీని వల్ల యూజర్లకు కలిగే లాభాలేంటో ఇప్పుడు తెలుసుకుందాం.
చాలా మంది సురక్షితమైనదిగా భావించే ఐఫోన్ లాగానే అనేక వార్నింగ్ సింబల్స్తో ఆండ్రాయిన్ ఫోన్లను రూపొందించారు. అందులో ముఖ్యంగా స్క్రీన్పై కుడి పైభాగంలో కనిపించే ఆకుపచ్చ చుక్క ఫీచర్ చాలా ప్రత్యేకం. దాన్ని చూసినప్పుడు యూజర్లకు ఏదో ఆన్లో ఉంది అనే భావన కలుగుతుంది. కానీ అది ఏ ఫీచర్తో ముడిపడి ఉందో అనేది మాత్రం తెలియదు.
యూజర్లు వారి ప్రైవసీ సెట్టింగ్లపై మరింత నియంత్రణ సాధించేందుకు ఈ ఫీచర్ను తీసుకొచ్చారు. ఈ గ్రీన్ డాట్ను చూసిన తర్వాత, మీ ప్రైవసీ సెట్టింగ్లు, ఫోన్ పర్మిషన్లను సమీక్షించాల్సిన అవసరం ఉందా లేదా అనే విషయం అర్థమవుతుంది.
గ్రీన్ డాట్ అంటే ఏమిటి?
ఐఫోన్లో వివిధ ఫీచర్లను సూచించడానికి గ్రీన్, ఆరెంజ్ డాట్లు ఉంటాయి. కానీ ఆండ్రాయిడ్లో అన్ని ఫీచర్లను సూచించడానికి ఒక గ్రీన్ డాట్ మాత్రమే ఉంటుంది. ఒకవేళ మీ మొబైల్ స్క్రీన్పై గ్రీన్ డాట్ ఉంటే- మీరు ప్రస్తుతం ఓపెన్ చేసిన యాప్, మీ డివైజ్ కెమెరా మైక్రోఫోన్ ఉపయోగిస్తున్నట్లు అర్థం. అయితే కెమెరా తెరిచి ఉంచితే ఇది సమస్య కాకపోయినా, ఓపెన్ యాప్‌లకు కెమెరా లేదా మైక్రోఫోన్ యాక్సెస్ ఇచ్చి ఆ విషయం మీకు గుర్తులేకపోతే గ్రీన్ డాట్ మిమ్మల్ని అప్రమత్తం చేయవచ్చు.
గ్రీన్ డాట్ చూస్తే ఏం చేయాలి?
శామ్సంగ్ కంపెనీ చెప్పిన వివరాల ప్రకారం- మీ కెమెరా లేదా మైక్రోఫోన్‌ను ఏ యాప్ ఉపయోగిస్తుందో నాలుగు దశల్లో మీరు గుర్తించవచ్చు. మొదట నోటిఫికేషన్ కనిపించినప్పుడు, అక్కడ ఒక ఐకాన్ కనిపిస్తుంది. దాని వల్ల అలర్ట్ వచ్చింది కెమెరా కోసమా లేదా మైక్రోఫోన్ లేదా రెండింటి కోసమా అని యూజర్లకు తెలియజేస్తుంది. అనంతరం ఆ డాట్ మరింత చిన్నగా మారిపోతుంది.
నోటిఫికేషన్ బార్లో ఓపెన్ చేసిన తర్వాత అందులో కనిపిస్తున్న డాట్పై క్లిక్ చేయాలి. దీంతో అది పెద్దగా మారుతుంది. అనంతరం ఒక డైలాగ్ బాక్స్ ఓపెన్ అవుతుంది. అందులో మీ ఫోన్ కెమెరా, మైక్రోఫోన్ లేదా రెండింటినీ ఏ యాప్ ఉపయోగిస్తుందో కనిపిస్తుంది. అయితే యూజర్లు ఉపయోగిస్తున్న ఆ యాప్లు మీ కెమెరా, మైక్రోఫోన్ ఫీచర్లను ఉపయోగించాలనుకుంటే మీరు ముందుకు సాగవచ్చు.
అయితే మీరు ఏ యాప్నకు కెమెరా, మైక్రోఫోన్ లేదా రెండింటికీ యాక్సెస్ ఇచ్చిన విషయం గుర్తులేకపోతే, సెట్టింగ్స్ ఓపెన్ చేసి పర్మిషన్లను ఆఫ్ చేయాలి. ఒక వేళ మీరు వాడుతున్న యాపే దొంగతనంగా కెమెరా, మైక్రోఫోన్ ఉపయోగిస్తోందని నొటిఫికేషన్ వస్తే, దాన్ని ఎట్టి పరిస్థితుల్లోనూ ఉపయోగించొద్దు. అవసరమైతే ఆ యాప్ను మొత్తంగా డిలీట్ కూడా చేయొచ్చు.
