Spam Tracking System:దేశంలో సైబర్ నేరాలు అంతకంతకూ పెరిగిపోతున్నాయి. ప్రస్తుత డిజిటల్ ప్రపంచంలో రోజుకో వేషంతో సైబర్ మోసగాళ్లు అమాయక ప్రజలను బురిడీ కొట్టిస్తున్నారు. ఈ మధ్య కొన్ని కొత్త నంబర్ల నుంచి వస్తున్న కాల్స్ను గుర్తించడం చాలా కష్టంగా మారింది. ఒకవేళ పొరపాటున ఈ నంబర్ల నుంచి వచ్చిన కాల్స్ లిఫ్ట్ చేసి వ్యక్తిగత సమాచారాన్ని ఇచ్చామో ఇక అంతే. ఈ నేపథ్యంలో సైబర్ నేరాలను తగ్గించేందుకు కేంద్ర ప్రభుత్వం సరికొత్త 'స్పామ్ ట్రాకింగ్ సిస్టమ్'ను తీసుకొచ్చింది.
ఈ సిస్టమ్ ఇండియన్ నంబర్లతో వచ్చే ఇంటర్నేషనల్ ఫేక్ కాల్స్ను ఆటోమేటిక్గా బ్లాక్ చేసేస్తుంది. దీంతో అమాయకులు మోసపోకుండా ఉండొచ్చు. ప్రభుత్వం మంగళవారం తీసుకొచ్చిన ఈ కొత్త ట్రాకింగ్ సిస్టమ్ అద్భుతంగా పనిచేయడం ప్రారంభించింది. దీన్ని తీసుకొచ్చిన 24 గంటల్లోనే ఇది దాదాపు 1.35 కోట్లు లేదా 90 శాతం ఇన్‌కమింగ్ ఇంటర్నేషనల్ ఫేక్ కాల్స్ను గుర్తించింది. దీంతో టెలికాం సర్వీస్ ప్రొవైడర్లు (TSPs) ఆ స్కామ్ కాల్స్ ఇండియన్ టెలికాం సబ్స్క్రైబర్లకు రాకుండా బ్లాక్ చేయగలిగారు.
ఎలా మోసం చేస్తారంటే?:సైబర్ నేరగాళ్లు ఇండియన్ మొబైల్ నంబర్ +91 నంబర్తో ఇంటర్నేషనల్ ఫేక్కాల్స్ చేస్తారు. అవి మనకు దేశీయ కాల్స్గానే కన్పిస్తాయి. కానీ వాస్తవానికి కాలింగ్ లైన్ ఐడెంటిఫికేషన్ (CLI) మార్చడం ద్వారా విదేశాల నుంచి కాల్స్ చేయగలుగుతారు. ప్రభుత్వ సంస్థలు, బ్యాంకులు లేదా ఇతర నమ్మదగిన సంస్థల నుంచి చేస్తున్నట్లు నమ్మిస్తారు. దీంతో ఇది నిజమేనని నమ్మి వ్యక్తిగత సమాచారాన్ని పంచుకుని అమాయక ప్రజలు మోసపోతున్నారు.