'4G కంటే 5G యూజర్ల డేటా వినియోగం 3.6 రెట్లు ఎక్కువ'

4G Vs 5G Nokia Report : దేశంలో 4జీ కంటే 5జీ యూజర్లు 3.6 రెట్లు ఎక్కువ డేటాను వినియోగిస్తున్నారని ప్రముఖ మొబైల్​ ఫోన్ల తయారీ సంస్థ నోకియా వెల్లడించింది. అంతేకాకుండా 2023లో 15 శాతం డేటా ట్రాఫిక్​కు 5జీ వినియోగదారులే కారణమని తన నివేదికలో పేర్కొంది.

4G Vs 5G Nokia Report :భారత్​లో 4జీ యూజర్లతో పోలిస్తే 5జీ నెట్​వర్క్​ వినియోగదారులు 3.6 రెట్లు ఎక్కువ డేటాను వాడుతున్నారని ప్రముఖ మొబైల్​ ఫోన్ల తయారీదారు నోకియా ప్రకటించింది. తాజాగా విడుదల చేసిన మొబైల్​ బ్రాడ్‌బ్యాండ్​ ఇండెక్స్​ (MBiT)-2024 నివేదికలో ఈ విషయాన్ని వెల్లడించింది. దీంతో పాటు మరికొన్ని ఆసక్తికర అంశాలను అందులో ప్రస్తావించింది.

ఇందులో 2023లో డేటా ట్రాఫిక్​లో 15 శాతానికి కేవలం 5జీ యూజర్లే కారణమని స్పష్టం చేసింది. మెట్రో నగరాల పరిధిలో అయితే మొబైల్​ డేటా ట్రాఫిక్‌లో వీరి వాటా 20 శాతంగా ఉందని పేర్కొంది.

భవిష్యత్​లో మరింత పెరగవచ్చు!
భారత దేశంలో టెలికాం సంస్థలు 5G సేవలను ప్రారంభించి దాదాపు ఏడాదిన్నర గడుస్తుంది. గత ఐదేళ్లలో, దేశంలో మొబైల్​ డేటా ట్రాఫిక్​ (సీఏజీఆర్) 26% మేర పెరిగింది. 2023లో నెలకు 17.4 ఈబీ-ఎక్సాబైట్​కు చేరుకుంది. అయితే ఈ డేటా వినియోగంలో పెరుగుదలకు ప్రధాన కారణం మాత్రం 5జీ డేటా వినియోగదారులే అని నోకియా తెలిపింది. ఈ పరిస్థితికి ముఖ్య కారణం- టెలికాం కంపెనీలు ఎటువంటి అదనపు ఛార్జీలు విధించకుండా అన్​లిమిటెడ్​ 5జీ డేటా సేవలను తమ కస్టమర్స్​కు అందించడమే. ఇక మున్ముందు 5జీ సేవలను మరిన్ని పట్టణాలు, నగరాలకు విస్తరిస్తే గనుక మరింత మంది 4జీ వినియోగదారులు 5జీ ఫోన్​లకు అప్​గ్రేడ్​​ అయ్యే అవకాశాలు లేకపోలేవు. అప్పుడు 5జీ వినియోగం విరివిగా పెరిగి డేటా ట్రాఫిక్​కు తీవ్ర అంతరాయం ఏర్పడవచ్చు అని నిపుణులు చెబుతున్నారు.

ఇక ప్రతి 5GB డేటా వినియోగంలో 1GB డేటాను 5జీ సేవల ద్వారానే యూజర్స్​ పొందుతున్నారని నోకియా తన నివేదికలో ప్రస్తావించింది. అయితే మన దేశంలో 5జీ సేవలకు సంబంధించి సంపూర్ణమైన వ్యవస్థ రానప్పటికీ మార్కెట్​లో వస్తోన్న మరిన్ని పరికరాలు సాయంతో 5జీ వినియోగం వేగంగా విస్తరిస్తోందని టెక్​ నిపుణులు అంటున్నారు.

నెలకు 24.1GB డేటా వినియోగం
నోకియా నివేదిక ప్రకారం భారత్​లో 796 మిలియన్ల యూజర్లలో 134 మిలియన్ల మంది 5జీ సేవలను వినియోగిస్తున్నారు. రాబోయే రోజుల్లో 4జీ నుంచి 5జీకి అప్​గ్రేడ్​ అయ్యే వారి సంఖ్య మరింత విస్తరించే అవకాశం ఉన్నందున 5G సేవల వినియోగం గణనీయంగా పెరిగే ఆస్కారం ఉంది. ఇక ఇదే నివేదికలో ప్రతి వినియోగదారుకు నెలకు 24.1GB డేటాను వినియోగిస్తున్నట్లు ఉంది. నెలవారీ సగటు డేటా ట్రాఫిక్​ కూడా సంవత్సరానికి 24% పెరిగిందని నోకియా తేల్చింది.

5జీకి దీటుగా 5G FWA
మరోవైపు దేశంలో 5జీ సేవలు ఇంకా పూర్తిస్థాయిలో విస్తరించకముందే దీనికి అడ్వాన్స్​డ్​గా 5జీ ఫిక్స్‌డ్​-వైర్‌లెస్​ యాక్సెస్ (5G FWA) పేరుతో హై స్పీడ్​ డేటాను అందిస్తోంది ప్రముఖ కంపెనీ జియో. ఈ సర్వీసులు కూడా ఇప్పుడిప్పుడే దేశవ్యాప్తంగా వేగంగా విస్తరిస్తున్నాయి. ఈ విషయంలో జియోనే ముందుంది. ఇక 5G FWA వినియోగదారులు 5G యూజర్స్​ కంటే సగటున 2.5 రెట్లు ఎక్కువ డేటాను వాడుతున్నారని నోకియా తన నివేదికలో పేర్కొంది.

'ప్రపంచంలోనే నెం.1 భారత్​'
'ఈరోజు భారతదేశం దాదాపు 17.5 ఎక్సాబైట్ల డేటాను వినియోగిస్తోందని నోకియా నివేదిక స్పష్టం చేస్తోంది. ఇది సంవత్సరానికి దాదాపు 20% వృద్ధిని నమోదు చేస్తుంది. భారత్​ బహుశా ప్రపంచంలోని అతిపెద్ద డేటా-వినియోగ మార్కెట్లలో ఒకటి' అని నోకియా మార్కెటింగ్​ అండ్​ కార్పొరేట్​ వ్యవహారాల అధిపతి అమిత్​ మార్వా అన్నారు.