మేడారం మహా జాతరకు సిద్ధమైన ఆర్టీసీ - ఈసారి 6 వేల బస్సుల ఏర్పాటు

TSRTC Special Buses for Medaram Jatara 2024 : నిత్యం లక్షల మంది ప్రయాణికులను సురక్షితంగా గమ్యస్థానాలకు చేరుస్తున్న తెలంగాణ ఆర్టీసీ మేడారం మహా జాతరకు సమాయత్తమవుతోంది. గత జాతరలో 3,500 బస్సులు నడిపిన ఆర్టీసీ, ఈసారి మహిళల కోసమే ప్రత్యేకంగా 6 వేలకు పైగా బస్సులు నడిపేందుకు సిద్ధమైంది. ఈ బస్సులను నేటి నుంచి ఫిబ్రవరి 25 వరకు నడపనున్నారు. ఇక రాష్ట్ర ప్రభుత్వం ప్రవేశపెట్టిన మహాలక్ష్మి పథకంతో మహిళలు, ఆర్టీసీ బస్సుల్లో అధిక సంఖ్యలో మేడారానికి తరలి వస్తున్నారు.

TSRTC Special Buses for Medaram Jatara 2024 :ములుగు జిల్లా మేడారం భక్తులతో రద్దీగా మారుతోంది. ఇంచుమించు వారంలో అన్ని రోజులూ భక్తులు ఆ వన దేవతల సన్నిధికి వచ్చి దర్శనాలు చేసుకుంటున్నారు. సమ్మక్క సారలమ్మలను(Sammakka Saralamma Jatara 2024) దర్శించుకుని బంగారాన్ని కానుకగా సమర్పించి మొక్కులు చెల్లించుకుంటున్నారు. మేడారం జాతర నేపథ్యంలో ఆర్టీసీ ప్రత్యేక బస్సులను నడుపుతోంది. ఈ బస్సులను నేటి నుంచి ఈ నెల 25 వరకు నడిపించనున్నారు. రాష్ట్రవ్యాప్తంగా 51 పాయింట్ల నుంచి, ఉమ్మడి వరంగల్​ జిల్లాలో 18 ప్రాంగణాల నుంచి ప్రత్యేకంగా 6000 బస్సులను నడిపిస్తోంది.

ఈ ప్రత్యేక బస్సులను ఉమ్మడి వరంగల్, కరీంనగర్, ఖమ్మం, ఆదిలాబాద్, నిజామాబాద్, రంగారెడ్డి జిల్లాలతో పాటు ఇతర రాష్ట్రాల నుంచి కూడా బస్సులను నడిపేందుకు ఆర్టీసీ(TSRTC) అధికారులు ప్రణాళికలు సిద్ధం చేశారు. గత జాతరకు ఆర్టీసీ బస్సుల ద్వారా 1.50 లక్షల మందికి పైగా భక్తులు చేరవేశారు. ప్రభుత్వం మహాలక్ష్మి పథకంలో భాగంగా మహిళలకు ఉచిత ప్రయాణ సౌకర్యం కల్పించడంతో ఈసారి భక్తులు ఎక్కువగా వస్తారని భావిస్తోంది. ఇప్పటికే మహిళలు ఆర్టీసీ బస్సుల్లో (TSRTC Special Buses) అధిక సంఖ్యలో మేడారానికి తరలి వస్తున్నారు. దీంతో మేడారం సమ్మక్క, సారలమ్మ ఆలయ పరిసరాలు జనసంద్రంగా మారుతున్నాయి. ప్రభుత్వం మేడారానికి కూడా ఉచిత ప్రయాణ సౌకర్యం కల్పించడంతో అతివలు ఆనందం వ్యక్తం చేస్తున్నారు.

Medaram Sammakka Saralamma Jatara 2024 :మేడారంలో ఆర్టీసీకి కేటాయించిన స్థలంలో మొత్తం 55 ఎకరాల విస్తీర్ణంలో బస్​ పార్కింగ్​, అధికారులకు వసతి, తాగునీటి సౌకర్యం, క్యాంటీన్, మరుగుదొడ్లు ఏర్పాటుతో పాటు, ప్రయాణీకులు బస్సులు తిరిగి వెళ్లే క్రమంలో విశ్రాంతి తీసుకునేందుకు ప్రత్యేక ఏర్పాట్లు చేశారు. బస్సుల సంఖ్య పెంచగా, కార్మికులు పెరుగుతుండడంతో గతంలో రెండు ప్యూరిఫైడ్​ వాటర్ ప్లాంట్లు ఏర్పాటు చేయగా, ఈసారి నాలుగింటిని ఏర్పాటు చేశారు.

TSRTC Special Buses for Medaram : ట్రాఫిక్​ క్రమబద్ధీకరణ కోసం కమాండ్​ కంట్రోల్ రూమ్​, కార్మికులకు 160 రెస్ట్​ రూమ్​లు, ఒక్క రూమ్​లో 15 మంది సిబ్బంది ఉండేందుకు వీలుగా వీటిని నిర్మించారు. అలాగే బస్సులు మొరాయించిన సమయంలో వాటిని ఆఘమేఘాల మీద తరలించేందుకు 12 రిలీఫ్​ వ్యాన్లు, 2 క్రేన్లను సిద్ధంగా ఉంచారు. ఈ జాతరలో మొత్తం 15 వేలకు పైగా అధికారులు, సిబ్బంది జాతర విధుల్లో పాల్గొంటారని వరంగల్ రీజినల్​ మేనేజర్ శ్రీలత తెలిపారు. జాతర(Medaram Jatara) సమయంలో భక్తులకు ఆటంకాలు తలెత్తకుండా ఆర్టీసీ సేవలందించేందుకు సిద్ధంగా ఉందని పేర్కొన్నారు. ఇప్పటికే రెండు లక్షల మంది భక్తులు బస్సుల ద్వారా మేడారానికి వెళ్లగా, ఈ జాతరకు దాదాపు 30 లక్షల మేర ప్రయాణికులు ఆర్టీసీని వినియోగించుకుంటారని అధికారులు అంచనా వేస్తున్నారు.