ఆదాయ, వ్యయాలపై వాస్తవిక అంచనాలతో ఓట్ ఆన్ ఆకౌంట్ బడ్జెట్ - సంక్షేమానికి గ్యారంటీ!

Telangana Budget 2024 : ప్రస్తుత ఆర్థిక సంవత్సరం బడ్జెట్ అంచనాలను 23 శాతం వరకు తగ్గించి సవరణలు చేసిన రాష్ట్ర ప్రభుత్వం, సవరించిన అంచనాలపై దాదాపుగా అంతే శాతాన్ని పెంచుతూ కొత్త పద్దును తీసుకొచ్చింది. అమ్మకం పన్ను, గ్రాంట్ల రూపంలో ఆశించిన మేర రాబడులు లేకపోవడంతో ఆ మేరకు కొత్త బడ్జెట్‌లో కోత విధించారు. అయితే కేంద్ర ప్రాయోజిత పథకాలను పూర్తి స్థాయిలో వినియోగించుకునేలా ప్రతిపాదనలు రూపొందించారు. పద్దు వెలుపలి రుణాలపై ఆసక్తిగా లేని తెలంగాణ సర్కార్, ఇందిరమ్మ ఇండ్లకు మాత్రమే ఆ తరహా రుణం తీసుకునే ఆలోచనలో ఉన్నట్లు సమాచారం. రైతుల రుణభారాన్ని కొత్త కార్పోరేషన్‌కు బదలాయించుకోవాలన్న భావనలో ప్రభుత్వం ఉంది.

Telangana Budget 2024 : రానున్న ఆర్థిక సంవత్సరానికి వార్షిక బడ్జెట్‌ను ప్రవేశపెట్టిన రాష్ట్ర ప్రభుత్వం, 2022-23లో చేసిన వ్యయం రూ.2,04,523 కోట్లుగా పేర్కొంది. 2023-24 బడ్జెట్ అంచనాలను రూ.2,90,296 కోట్ల నుంచి రూ.2,24,625 కోట్లకు సవరించారు. రూ.65,000ల కోట్లకు పైగా మొత్తాన్ని దాదాపు 23 శాతం మేర తగ్గిస్తూ సవరణ పద్దు ప్రవేశపెట్టారు. సవరించిన బడ్జెట్‌పై (TS Budget 2024) దాదాపుగా అంతే శాతాన్ని పెంచి 2024-25 బడ్జెట్‌ను ప్రతిపాదించారు. రూ.51,000ల కోట్లకు పైగా మొత్తాన్ని పెంచి రూ.2,75,891 కోట్లతో పద్దును ఖరారు చేశారు.

Telangana Vote on Account Budget 2024 :ప్రస్తుత ఆర్థిక సంవత్సరంలో పన్ను ఆదాయాన్ని రూ.1,18,195 కోట్లకు సవరించి, రానున్న ఏడాది రూ.1,38,228 కోట్లు పన్నుల రూపంలో వస్తాయని అంచనా వేశారు. సీజీఎస్టీ ద్వారా రూ.7,838 కోట్లు, ఎస్​జీఎస్టీ ద్వారా రూ.50,762 కోట్లు వస్తాయని ప్రతిపాదించారు. కార్పొరేషన్ పన్నుల ద్వారా రాష్ట్రానికి రూ.8051 కోట్లు, కార్పొరేషన్ మినహా ఇతర ఆదాయంపై పన్ను రూ.8872 కోట్లు రానున్నట్లు అంచనా వేశారు. ఇతర ఆదాయాలపై పన్నుల ద్వారా మరో రూ.900 కోట్లు వస్తాయని భావిస్తున్నారు.

స్టాంపులు - రిజిస్ట్రేషన్ల ద్వారా ప్రస్తుత ఆర్థిక సంవత్సరంలో రూ.18,500 కోట్లు ప్రతిపాదించిన ప్రభుత్వం, ఆ మొత్తాన్ని రూ.15,000ల కోట్లకు సవరించింది. 2024-25లో మళ్లీ రూ.18,228 కోట్ల ఆదాయం వస్తుందని అంచనా వేసింది. రాష్ట్ర ఎక్సైజ్ పన్నుల ద్వారా ప్రస్తుత సంవత్సరంలో రూ19,884 కోట్ల ఆదాయం చూపగా, వచ్చే ఏడాదికి ఆ మొత్తాన్ని రూ.25,617 కోట్లుగా ప్రతిపాదించారు. అమ్మకం పన్ను ద్వారా 2023-24లో రూ.39,500ల కోట్లు వస్తాయని మొదట అంచనా వేశారు. ఆశించిన మేర రాబడులు లేకపోవడంతో ఆ మొత్తాన్ని రూ.34,166 కోట్లకు సవరించారు. రానున్న ఆర్థిక సంవత్సరంలో ఇంకాస్త తగ్గించి రూ.33,449 కోట్లు మాత్రమే ప్రతిపాదించారు.

Telangana Budget Sessions 2024 : వాహనాలపై పన్ను ద్వారా రూ.8477 కోట్లు వస్తాయని అంచనా వేశారు. కేంద్ర పన్నుల్లో రాష్ట్ర వాటాగా ఈ ఏడాది రూ.25,639 కోట్లు వస్తాయని పేర్కొన్నారు. పన్నేతర ఆదాయాన్ని రూ.20,658 కోట్లుగా అంచనా వేశారు. మైనింగ్ ద్వారా రూ.6587 కోట్లు వస్తాయని అంచనా వేసిన ప్రభుత్వం, ఇతర సాధారణ సర్వీసుల కింద రూ.11,320 కోట్లను పేర్కొంది.

ప్రస్తుత ఆర్థిక సంవత్సరంలో కేంద్రం నుంచి భారీగా గ్రాంట్లను ఆశించిన రాష్ట్ర ప్రభుత్వం, ఏకంగా రూ.41,259 కోట్లు ప్రతిపాదించింది. అయితే ఈ ఏడాది గ్రాంట్లు చాలా తక్కువగా వచ్చినందున ఆ మొత్తాన్ని ఏకంగా రూ.13,953 కోట్లకు కుదించారు. రానున్న సంవత్సరంలో కేంద్ర ప్రభుత్వం నుంచి గ్రాంట్ల రూపంలో రూ.21,075 కోట్లు వస్తాయని బడ్జెట్‌లో పేర్కొన్నారు. ఈ గ్రాంట్లలో ఆర్థిక సంఘం నిధులతో పాటు జాతీయ ఆరోగ్య పథకం నుంచి వచ్చే నిధులు సహా కేంద్ర ప్రభుత్వ ప్రాయోజిత పథకాల నిధులు ఉన్నాయి.

తెలంగాణ సర్కార్ వాటా జమ చేయకపోవడంతో గత కొన్నేళ్లుగా కేంద్ర ప్రభుత్వ ప్రాయోజిత పథకాల నుంచి వచ్చే నిధులు రాష్ట్రానికి చాలా తక్కువగా వస్తున్నాయి. అయితే ఈ విషయంలో కొత్త ముఖ్యమంత్రి రేవంత్‌రెడ్డి (CM Revanth Reddy) అధికారులకు స్పష్టమైన ఆదేశాలు జారీ చేశారు. కేంద్ర ప్రాయోజిత పథకాలను పూర్తిగా సద్వినియోగం చేసుకోవాలని అవసరమైన రాష్ట్ర వాటా చెల్లించి వీలైనంత ఎక్కువగా కేంద్రం నుంచి నిధులు రాబట్టుకోవాలని సీఎం ఆదేశించారు. అందుకనుగుణంగా గ్రాంట్ల మొత్తాన్ని ఎక్కువగా ప్రతిపాదించారు.

2024-25లో ఎఫ్​ఆర్​బీఎంకు లోబడి రూ.59,625 కోట్ల అప్పులు తీసుకునేందుకు ప్రభుత్వం ప్రతిపాదించింది. 2023-24లో రూ.40,615 కోట్ల రుణాన్ని ప్రతిపాదించగా జీఎస్​డీపీ పెరుగుదల, కేంద్రం ఇచ్చే ప్రత్యేక వెసులుబాటును దృష్టిలో ఉంచుకొని ఆ మొత్తాన్ని రూ.59,625 కోట్లకు పెంచారు. ఎఫ్​ఆర్​బీఎం కింద రుణాలు అంచనాలకనుగుణంగా వస్తాయన్న విశ్వాసంతో ఉన్న తెలంగాణ సర్కార్, కేంద్రం నుంచి రూ.3900 కోట్ల రుణాలను ప్రతిపాదించింది.

బడ్జెట్‌కు వెలుపల కార్పొరేషన్ల ద్వారా తీసుకునే రుణాల విషయంలో కాంగ్రెస్ సర్కార్ వ్యతిరేక ధోరణితో ఉన్నందున ఆ మేరకు ఆఫ్ బడ్జెట్ రుణాల భారం తగ్గుతుందని ఆర్థికశాఖ వర్గాలు చెబుతున్నాయి. మూలధన వ్యయాన్ని రూ.29,000ల కోట్లుగా ప్రతిపాదించారు. ఆరు గ్యారంటీలకు రూ.53,196 కోట్లు, కొత్త ఉద్యోగ నియామకాల కోసం వెయ్యి కోట్లు కేటాయించిన ప్రభుత్వం, అప్పుల చెల్లింపులకు రూ.17,001 కోట్ల కేటాయింపులు చేసింది. రెవెన్యూ వ్యయంలో వడ్డీల చెల్లింపులకు రూ.22,751 కోట్లుగా ప్రతిపాదించింది.

2 Lakh Rythu Runa Mafi in Telangana 2024 :రైతులకు రూ.2 లక్షలలోపు రుణాలు మాఫీ(Rythu Runa Mafi in Telangana)చేస్తామని ఇచ్చిన హామీకి అనుగుణంగా కార్పొరేషన్ ఏర్పాటు చేసి, రైతుల మొత్తం రుణాలను దానికి మళ్లించాలన్న ఆలోచనలో ఉన్నట్లు ప్రభుత్వం తెలిపింది. ఈ మేరకు బ్యాంకులతో సంప్రదింపులు జరుపుతున్నట్లు వెల్లడించింది. ప్రతి నియోజకవర్గానికి 3500 ఇందిరమ్మ ఇండ్లు ఇవ్వనున్నట్లు బడ్జెట్‌లో పేర్కొంది. అయితే పద్దులో రూ.7500 కోట్లు మాత్రమే కేటాయింపులు చేశారు. దీంతో ఇందిరమ్మ ఇండ్ల కోసం బడ్జెట్ వెలుపల రుణాలు తీసుకునే ఆలోచనలో సర్కార్ ఉన్నట్లు సమాచారం.

మొదటి సారి తగ్గిన రాష్ట్ర వృద్ధిరేటు : గత పదేళ్లలో మొదటి సారి రాష్ట్ర వృద్ధిరేటు తగ్గింది. ప్రధానంగా వర్షాభావం, భూగర్భ జలాల క్షీణత, కృష్ణా బేసిన్‌లో తగిన నీటి లభ్యత లేకపోవడంతో కీలక పంటల విస్తీర్ణం తగ్గి, వ్యవసాయ రంగంలో స్థూల విలువ రూ.49,059 కోట్ల నుంచి రూ.45,723 కోట్లకు తగ్గింది. దీంతో వ్యవసాయ రంగంలో వృద్ధిరేటు మైనస్ 6.8గా నమోదైంది. ఇతర కొన్ని రంగాల్లోనూ తగ్గుదల నమోదు కాగా తయారీ, స్థిరాస్థి, నిర్మాణం, మైనింగ్ రంగాల్లో వృద్ధి రేటు పెరుగుదల ఉంది.

Telangana Budget 2024-25 :మొత్తంగా వృద్ధి రేటు తగ్గినప్పటికీ అంచనా వేసిన ఆదాయం వచ్చే అవకాశం ఉందని ఆర్థికశాఖ వర్గాలు చెప్తున్నాయి. వంద శాతం అంచనాలు చేరుకుంటామని, ఇదే తరహాలో ఓట్​ ఆన్​ అకౌంట్ బడ్జెట్ ప్రవేశపెట్టినపుడు 2018-19 లో 98 శాతం అంచనాలు అందుకున్నట్లు వివరించారు. 4 నెలల కాలానికి ఓట్​ ఆన్​ అకౌంట్ కోసం రూ.78,911 కోట్ల వినియోగానికి రాష్ట్ర ప్రభుత్వం ప్రతిపాదించింది. దీని గడువు జూలై నెల వరకు ఉండనుండగా ఆలోగా తెలంగాణ సర్కార్ పూర్తి బడ్జెట్‌కు ఆమోదం పొందాల్సి ఉంటుంది.