'ఊత కర్ర' ఉంటేనే ఇందిరమ్మ ఇళ్ల సర్వే - ఆ ఊళ్లో అధికారులకు వింత అనుభవం

ఇందిరమ్మ ఇళ్ల ఇంటింటి సర్వేకు సిగ్నల్ ఇబ్బందులు - గ్రామీణ ప్రాంతాల్లో సిగ్నల్‌ లేక కట్టెకు సెల్​ఫోన్ కట్టి సర్వే చేస్తున్న అధికారులు

Technical Issues in Indiramma House Survey :నిరుపేదలకు సొంతింటి కలను నిజం చేసే దిశగా రాష్ట్ర ప్రభుత్వం ఇందిరమ్మ ఇళ్ల పథకాన్ని తీసుకొచ్చింది. ఇందులో భాగంగా ప్రభుత్వం చేపట్టిన ఇంటింటి సర్వేకు కొన్ని ఇబ్బందులు ఎదురవుతున్నాయి. కొన్ని గ్రామీణ ప్రాంతాల్లో సిగ్నల్‌ సమస్యతో సర్వే ఆగిపోతుంటే, పట్టణాల్లో సర్వర్‌ మొరాయిస్తుండటంతో సర్వేకు ఆటంకాలు ఏర్పడుతున్నాయి. ఈ నేపథ్యంలో సర్వే యాప్‌ అప్‌డేట్‌ అయిన తర్వాత సర్వేయర్లు మరిన్ని సమస్యలు ఎదుర్కొంటున్నారు. రోజుకు ఒక్కో సర్వేయర్‌ సుమారు 40 కుటుంబాల వరకు సర్వే చేయాల్సి ఉండగా, సాంకేతిక సమస్యలతో 20 కుటుంబాల వివరాలు నమోదు చేయడమే పెద్ద సవాల్​గా మారిందని సర్వే అధికారులు చెబుతున్నారు.

సెల్‌ఫోన్‌ సిగ్నల్స్‌ లేక ఇబ్బందులు : తాజాగా పెద్దపల్లి జిల్లా మంథని మండలం ఉప్పట్లలో ఇందిరమ్మ ఇళ్ల సర్వే నిర్వహిస్తున్న సిబ్బందికి ఇలాంటి ఇబ్బందే ఎదురవుతుంది. ఇందిరమ్మ ఇళ్ల సర్వే చేపడుతున్న సిబ్బందికి పలుచోట్ల సెల్‌ఫోన్‌ సిగ్నల్స్‌ సరిగా లేక ఇబ్బంది పడుతున్నారు. ఇక్కడి గ్రామం పక్కన గోదావరి ప్రవహిస్తుంది. గతంలో నది అవతలి వైపున ఉన్న టవర్​తో సిగ్నల్స్ ఉండేవి. ఆ తర్వాత కాళేశ్వరం ప్రాజెక్టులో భాగంగా సుందిళ్ల బ్యారేజీ కరకట్టలను నిర్మించినప్పటి నుంచి సిగ్నల్స్ ఇబ్బందులు ఎదురవుతున్నాయి.

పొడవున్న వెదురు కర్ర పైభాగంలో సెల్​ఫోన్ : ఈ క్రమంలో సర్వే నిర్వహిస్తున్న పంచాయతీ కార్యదర్శి రామనబోయిన హరికృష్ణ వినూత్నంగా ఆలోచించారు. సెల్​ఫోన్​లో ఇంటర్నెట్ ఆన్​ చేసి, 15 అడుగులకు పైగా పొడవున్న వెదురు కర్ర పైభాగంలో కట్టి ట్యాబ్​కు హాట్​స్పాట్​తో అనుసంధానించారు. పంచాయతీ ఉద్యోగి ఆ కర్రను చేతిలో పట్టుకుని వీధుల్లో తిరుగుతూ సిగ్నల్ వచ్చిన వద్ద ఆగుతుండగా, సమీపంలోని దరఖాస్తుదారులను అక్కడికి పిలిచి కార్యదర్శి వివరాలు నమోదు చేసుకుంటున్నారు. ప్రజా పాలనలో భాగంగా గ్రామంలో ఇళ్ల కోసం 390 దరఖాస్తులు రాగా, శుక్రవారం వరకు 228 దరఖాస్తుల సర్వే పూర్తయింది.

చేతిలో కర్రతో పంచాయతీ ఉద్యోగి (ETV Bharat)