చాలెంజ్ : "బాహుబలి గ్రాఫిక్స్​ను మించిపోయేలా!" - మీ కళ్లను మీరే నమ్మలేరు!

వెండి మబ్బుల్లో విహారం - వంజంగిలో పర్యాటకుల వినోదం

Tourists in Vanjangi Hills Paderu :ప్రకృతి ఒడిలో సేద తీరడం కంటే ఆహ్లాదకరమైన అనుభూతి మరొకటి ఉండదు. కానీ మనం నివసించే కాంక్రీట్​ వరల్డ్​లో అలాంటి దృశ్యాలు ఉండటమే గగనం. ఎటు చూసినా ఆకాశాన్ని తాకే భవనాలు, మేఘాలకు మసి పూసే పొగలు, రణగొణ ధ్వనులు ఇవే అలవాటయ్యాయి ఇప్పటి పట్టణవాసులకు. కానీ మనం ఉండే ఈ భూమ్మీదే స్వర్గాన్ని తలపించే ప్రదేశాలూ లేకపోలేదు.

ప్రకృతి అందాలతో, పక్షుల కిలకిల రావాలతో, ఆకాశాన్ని తాకే కొండలు, మబ్బుల్ని తలపించే స్వచ్ఛమైన పొగమంచు, చెక్కిలిని తాకే చల్లని నీటి తెంపరులు.. ఊహించుకుంటేనే ఎంతో రమణీయంగా ఉంది కదా! అదే నిజంగా మన కళ్లముందు ఉంటే! అవును ఇది నిజమే మిమ్మల్ని మేఘాల నడుమ ఉంచే చోటు మన అల్లూరి జిల్లాలోనే ఉంది.

అల్లూరి జిల్లాలోని పాడేరులో పర్యాటక ప్రాంతాల వద్ద రద్దీ నెలకొంది. ప్రముఖ పర్యాటక కేంద్రం పాడేరులోని వంజంగి కొండల్లో ప్రకృతి రమణీయమైన అద్భుత సౌందర్య దృశ్యం ఆవిష్కృతమైంది. పొగ మంచు దట్టంగా కమ్మి కొండల్లో వెండి మబ్బులు దర్శనమిచ్చాయి. కొండలకు సమాంతరంగా వచ్చిన మంచు పొగలో సూర్యోదయం పర్యాటకులను విశేషంగా ఆకర్షించింది. మంచు కురిసే వేళలో అంటూ పర్యాటకులు కొండల్లో విహరిస్తున్నారు. పొగ మంచు సొగసులను కెమెరాల్లో బంధిస్తున్నారు.

దీపావళి వేళ వెండి మబ్బులు తెలియాడుతూ చూపరులను కనువిందు చేశాయి. పర్యాటకులు మరో కైలాసానికి వెళ్లినట్లు అనుభూతి పొందామని హర్షం వ్యక్తం చేశారు. వంజంగి మేఘాల కొండ వద్దకు పర్యాటకులు తరలివచ్చారు. ప్రకృతి అందాలను వీక్షించేందుకు పెద్దఎత్తున ఇక్కడికి చేరుకున్నారు. పలువురు ఇక్కడి ప్రకృతి అందాలను తమ చరవాణుల్లో బంధించి మురిసిపోయారు.

మేఘాల్లో తేలిపోతున్న అనుభూతిని కలిగించే ఈ ప్రాంతానికి పర్యాటకులు భారీగా తరలి వస్తున్నారు. వంజంగి కొండపై పొగమంచుపై సూర్యోదయం వేళలో అందాలు ఊహాతీతంగా ఉన్నాయని పర్యాటకులు ఆనందం వ్యక్తం చేస్తున్నారు. సుదూర ప్రాంతాల నుంచి పర్యటకులు వంజంగి కొండల్లో సేద తీరడానికి అధిక సంఖ్యలో తరలివచ్చారు. ఎత్తైన మేఘాల కొండల్లో పర్యాటకులు విహరించారు. అలాగే ఘాట్ రోడ్​లో ప్రయాణం చేస్తూ ప్రకృతి ఇచ్చే స్వచ్చమైన గాలిని ఆస్వాదిస్తూ అలా కొద్దిసేపు ఆ కొండల్లో ప్రకృతి ప్రేమికులు సేద తీరారు.