Ramoji Group Donates Rs.5 crore to Flood Victims in Telugu States : ఎప్పుడు విపత్తులు, ఆపదలు తలెత్తినా ప్రజలకు అండగా నిలిచే రామోజీ గ్రూపు మరోసారి తన పెద్ద మనసు చాటుకుంది. కుండపోత వర్షాలకు కకావికలమైన తెలుగు రాష్ట్రాల్లో బాధితుల సహాయార్థం 5 కోట్ల రూపాయలతో ఈనాడు సహాయ నిధిని ప్రకటించింది. వరదలు ఇరు రాష్ట్రాల్లోనూ భారీ విధ్వంసం సృష్టించాయి. బాధితులు తమ ఇళ్లను, జీవనోపాధిని కోల్పోయి రోడ్డున పడ్డారు.
ప్రకృతి ప్రకోపంతో తలెత్తిన ఈ భయానక పరిస్థితుల్లో బాధితులకు ప్రజలంతా కలిసి అండగా నిలవడం, సామాజిక బాధ్యతని రామోజీ గ్రూపు పిలుపునిచ్చింది. ఈనాడు సహాయ నిధిని బాధితుల తక్షణ సహాయ చర్యలకు కేటాయించినట్లు పేర్కొంది. తీవ్రంగా ప్రభావితమైన వారికి సాయం అందించడం కేవలం మద్దతే కాదని ఈ చీకటి సమయంలో వెలుగు నింపుతుందని రామోజీ గ్రూపు పేర్కొంది. బాధితులకు సాయం చేసేందుకు ప్రతి ఒక్కరూ ఈనాడుతో చేతులు కలపాలని కోరింది. వరద బాధితులకు సాయం చేయాలనుకునేవారు ఈనాడు రిలీఫ్ ఫండ్‌ యూనియన్ బ్యాంక్‌ ఖాతా నంబరు 370602010006658కు పంపాలని కోరింది.