Minister Sridhar Babu Review On Rains Effect :రాష్ట్రంలో భారీ వర్షాల కారణంగా 8 జిల్లాలకు తీవ్రమైన ప్రభావం పడిందని మంత్రి శ్రీధర్ బాబు వెల్లడించారు. ఇప్పటి వరకు 16 మంది చనిపోయినట్లు రిపోర్ట్ వచ్చిందని మంత్రి తెలిపారు. ఎడతెరిపి లేకుండా కురుస్తున్న వర్షాలపై సీఎం రేవంత్ రెడ్డి ఆధ్వర్యంలో సమీక్షా సమావేశం నిర్వహించినట్లు మంత్రి శ్రీధర్ బాబు తెలిపారు. వర్షాలకు నష్టపోయిన రైతులు జిల్లాలపై అధికారులతో రివ్యూ చేశామన్నారు.
ఖమ్మంలో తీవ్ర ప్రభావం ఉండడం వల్ల మంత్రులు భట్టి విక్రమార్క, తుమ్మల నాగేశ్వర రావు అక్కడే ఉన్నారన్నారు. నీటిపారుదలశాఖ అధికారులు పోలీసు, జీహెచ్‌ఎంసీ సిబ్బందితోనూ సమావేశం నిర్వహించామని, వర్షాలతో ప్రాణాలు కోల్పోయిన బాధిత కుటుంబాలకు సహాయం చేయాలని నిర్ణయించినట్లు మంత్రి స్పష్టం చేశారు. రాష్ట్ర ప్రభుత్వం నష్టపోయిన ప్రతి కుటుంబాన్ని ఆదుకుంటుందని ప్రకటించారు. అత్యవసర పరిధిలో తప్ప బయటకు ఎవరూ రాకుండా తగు జాగ్రత్తలు తీసుకోవాలని మంత్రి సూచించారు. అధికారులందరూ క్షేత్రస్థాయిలో ఉండి పరిస్థితులను ఎప్పటికప్పుడు సమీక్షించాలని ఆదేశించినట్లు తెలిపారు.
విపత్కర పరిస్థితులను ప్రతిపక్షాలు రాజకీయం చేయడం తగదు :విద్యుత్ రహదారులు రోడ్డు నిర్మాణాలను వెంటనే పునరుద్దరించాలని కోరినట్లు పేర్కొన్నారు. ముఖ్యమంత్రి రేవంత్ రెడ్డి ప్రతి జిల్లా కలెక్టరలతో నేరుగా మాట్లాడారని తెలిపారు. విపత్కర పరిస్థితులను రాజకీయం చేయడం సరైందికాదని బీఆర్ఎస్ నేతలనుద్దేశించి హితవు పలికారు. హరీశ్రావు, కేటీఆర్ ఇప్పటికైనా తన బుద్ది మార్చుకోవాలన్నారు. ప్రభుత్వ యంత్రాంగంతో పాటు ప్రతిపక్ష నేతలు కూడా సహాయ చర్యల్లో పాల్గొనాలని కోరారు. ప్రధాని నరేంద్రమోదీని రాష్ట్రంలో పర్యటించాలని సీఎం కోరారని పేర్కొన్నారు.