Manchu Manoj Allegations On Vishnu :మంచు ఫ్యామిలీలో వివాదం ముగియలేదు. తాజాగా మరో వివాదం తెరపైకి వచ్చింది. మంచు మనోజ్ తాజా స్టేట్‌మెంటే అందుకు నిదర్శనం. శనివారం తన కుటుంబంలో చోటుచేసుకున్న ఘటన గురించి ఆయన ఒక ప్రకటన విడుదల చేశారు. మంచు విష్ణు తన ఇంటి వద్ద జనరేటర్‌లో పంచదార పోయించి, విద్యుత్తు సరఫరా నిలిపివేశారని మనోజ్ ఆరోపించారు.
'నిన్న నేను సినిమా షూటింగ్లో ఉన్నాను. కుమారుడి పాఠశాలలో ఈవెంట్‌కు నా భార్య హాజరైంది. మా అమ్మ బర్త్డే సందర్భంగా కేకు ఇచ్చే నెపంతో నా సోదరుడు మంచు విష్ణు తన అనుచరులు రాజ్‌ కొండూరు, కిరణ్‌, విజయ్‌ రెడ్డిలతోపాటు కొందరు బౌన్సర్లతో ఇంట్లోకి ప్రవేశించాడు. జనరేటర్లలో షుగర్‌(పంచదార) పోయించాడు. దాంతో, ఇంటికి రాత్రి విద్యుత్తు సరఫరాలో అంతరాయం ఏర్పడింది. దీంతో మేమంతా ఆందోళనకు గురయ్యాము. ఇంట్లో అమ్మ, 9 నెలల కుమార్తె, కుమారుడు, అత్తమామలు ఉన్నారు. ఈ చర్యతో అగ్ని ప్రమాదం(ఫైర్) సంభవించే అవకాశం ఉంది. జనరేటర్లకు సమీపంలో వెహికిల్స్ పార్క్‌ చేసి ఉన్నాయి. అక్కడే గ్యాస్‌ కనెక్షన్‌ కూడా ఉందని' మనోజ్ విడుదల చేసిన ప్రకటనలో పేర్కొన్నారు.
ఇలా జరగడం హృదయాన్ని కలచివేసింది : మంచు విష్ణు టీమ్‌ ఇంటి నుంచి వెళ్లిపోతూ నా వద్ద పనిచేసే వారిని అక్కడ నుంచి పంపించివేసిందని మంచు మనోజ్ ఆరోపించారు. తన దంగల్‌ కోచ్‌ను కూడా బెదిరించిందన్నారు. అమ్మ పుట్టినరోజున ఇలా జరగడం హృదయాన్ని కలచివేసిందని మనోజ్ ఆవేదన వ్యక్తం చేశారు.