How to Find Adulterated Milk : ఉదయం నిద్ర మేల్కొన్న వెంటనే టీ తాగకపోతే కొంతమందికి ఆరోజే గడవనట్లుగా ఉంటుంది. చిన్న పిల్లలకు పాలు, అన్నంలోకి పెరుగు, మజ్జిగ తయారీకి మిల్క్ నిత్యావసరంగా మారాయి. ఇటువంటి పాలను కొంతమంది ప్రబుద్ధులు కల్తీ చేస్తున్నారు. గతంలో చిక్కని పాలల్లో కొంచెం నీళ్లు కలిపేవారు. కానీ ఇప్పుడు ఏకంగా నకిలీ పాలనే తయారు చేస్తున్నారు. కొందరైతే విషపూరిత డిటర్జెంట్, యూరియా లాంటివి కలుపుతున్నారు. పాల కల్తీపై పలుచోట్ల కేసులు నమోదవుతున్నాయి. నమ్మకమైన వ్యక్తుల లేదా సంస్థల నుంచి మాత్రమే కొనుగోలు చేయాలని, అనుమానం వస్తే పరీక్షించి చూసుకోవాలని నిపుణులు సూచిస్తున్నారు.
పాలను ఎలా కల్తీ చేస్తున్నారంటే? : పాల వినియోగం రోజురోజుకూ పెరుగుతోంది. ఈ క్రమంలోనే కొంతమంది ప్రబుద్ధులు కల్తీకి పాల్పడుతున్నారు. పరిశుభ్రం కాని నీరు కలపడంతో పాటు విషపూరిత రసాయనాలు వాటిలో మిళితం చేస్తున్నారు. కొన్ని రకాల పొడులు, నురగ వచ్చేలా సబ్బు పొడి, తెల్లదనం కోసం యూరియాను కలుపుతున్నట్లు గతంలో పోలీసులు గుర్తించారు. కల్తీ పాలను వినియోగిస్తే అనారోగ్యంతో పాటు దీర్ఘకాలిక సమస్యలు తలెత్తుతాయని వైద్యులు హెచ్చరిస్తున్నారు.
మిల్క్ కల్తీని గుర్తించే పద్ధతులు :
- నీళ్లను కలిపిన పాలు : ఓ చుక్క మిల్క్‌ను నున్నని, ఏటవాలు ప్రదేశంలో ఉంచినప్పుడు స్వచ్ఛమైనవి నెమ్మదిగా కదులుతూ అవి జారిన తలంపై తెల్లని మచ్చ ఏర్పడుతుంది. నీళ్లు కలిసిన పాలు ఐతే త్వరగా ప్రవహించి, ఎటువంటి మచ్చ జాడ కనిపించదు.
- పిండి పదార్థాలతో కల్తీ : పాలల్లో కొన్ని చుక్కల అయోడిన్‌ ద్రావణాన్ని కలిపినప్పుడు నీలి రంగుకు మారినట్లయితే పిండి పదార్థాల కల్తీ జరిగినట్లు.
- యూరియా కలిపితే : టీస్పూను మిల్క్‌కు ఆఫ్ టేబుల్‌ స్పూన్‌ సోయాబీన్‌ పిండిని కలిపి మిశ్రమాన్ని బాగా కలియదిప్పి 5 నిమిషాల తరువాత ఆ పాలలో రెడ్‌ లిట్మస్‌ కాగితాన్ని ముంచితే నీలి రంగుకు మారుతుంది. లిట్మస్‌ పేపర్లు అన్ని మందుల దుకాణాల్లో లభ్యమవుతాయి.
- డిటర్జెంట్ కల్తీ : 5 మిల్లీలీటర్ల పాలు, 5 మిలీ నీళ్లు కలిపి బాగా కలిపి తిప్పితే నురగ ఏర్పడితే డిటర్జెంట్ కల్తీ జరిగినట్లు లెక్క.
- కృత్రిమ పాలు : ఈ కృత్రిమ పాలు చేదు రుచి కలిగి, వేళ్ల మధ్యలో తీసుకొని రుద్దినప్పుడు సబ్బు వంటి భావన కలుగుతుంది. వేడి చేసినప్పుడు పసుపు రంగులోకి మారతాయి. కృత్రిమ పాల తయారీకి నీళ్లు, రంగులు, తక్కువ ధర నూనెల, క్షార ద్రావణాలు, యూరియా, డిటర్జెంట్లు వాడతారు.