శెభాష్ హిమబిందు - 10 ఏళ్లు కష్టపడి 5 సర్కార్ కొలువులు సాధించిన గృహిణి

Housewife Govt 5 Government Jobs in Warangal : ప్రభుత్వ ఉద్యోగం సాధించాలన్నది ఎంతో మంది కల. అందుకోసం రేయింబవళ్లు కష్టపడుతుంటారు. అయినా విజయం వరిస్తుందని కచ్చితంగా చెప్పలేం. అందులోనూ, ఒక గృహిణి ప్రభుత్వ కొలువు సాధించడం అంటే అదంత ఆషామాషీ కాదు. ఒక్క ప్రభుత్వ ఉద్యోగం రావడమే కష్టమవుతున్న ఈ తరుణంలో, గృహిణి అయి ఉండి ఏలాంటి కోచింగ్‌ లేకుండా అయిుదు ప్రభుత్వ కొలువులు కొల్లగొట్టింది. ఒకవైపు కుటుంబ భాద్యతలు మోస్తూనే, పది సంవత్సరాల తన సుదీర్ఘ శ్రమకు ఫలితం దక్కించుకుంది. మరి ఇంతకు ఎవరా మహిళ, తన లక్ష్య సాధనలో ఏ విధంగా ముందుకు వెళ్లిందో ఈ కథనంలో చుద్దాం.

Housewife Got 5 Government Jobs in Warangal : చిన్నప్పటి నుంచి ప్రభుత్వ ఉద్యోగం సాధించాలన్నది ఈ మహిళ కల. కాని కుటుబ పరిస్థితుల నేపథ్యంలో తన కల నేరవేరకుండానే వివాహం జరిగింది. ‌అయినా తన కల నెరవేర్చుకోవడానికి వివాహం అడ్డుగా మారకూడదు అని నిర్ణయించుకుంది. కుటుంబ వ్యవహరాలు చూసుకుంటూనే ఖాళీ సమయాలలో తన సమయాన్ని చదువుకు కేటాయించేది. ఎన్ని ఆటుపోట్లు ఎదురైన చదువును మాత్రం దూరం పెట్టకుండా తన లక్ష్యాన్ని ముద్దాడింది.

Warangal Woman Five Govt Jobs : వరంగల్ జిల్లా ఖిలావరంగల్ మండలానికి చెందిన హిమబిందు విద్యాభ్యాసం వరంగల్‌లోనే పూర్తి చేసింది. ప్రభుత్వ కొలువు కోసం దశాబ్ద కాలంగా నిరంతర శ్రమ చేసింది. 2023లో గురుకుల బోర్డు ప్రకటించిన ఉద్యోగాల్లో జూనియర్ కళాశాల లెక్చరర్, డిగ్రీ కళాశాల అసిస్టెంట్ ఫ్రోఫెసర్, లైబ్రేరీయన్ ఉద్యోగాలు సాధించింది. అంతేకాకుండా పాలిటెక్నిక్ జేఎల్‌, ఇంటర్మీడియెట్ జేఎల్‌ పోస్టులను సైతం కైవసం చేసుకొని ఏకంగా 5 ప్రభుత్వ ఉద్యోగాలు కైవసం చేసుకుంది ఈ మహిళ.

కాకతీయ విశ్వవిద్యాలయంలో పీజీ : హిమబిందు లైబ్రరీ సైన్స్‌పై ఆసక్తితో అంబేడ్కర్ వర్శిటీలో మరోసారి పీజీ చేసింది. అనేక పోటీ పరీక్షలు రాసిన ఈ మహిళకి అతి తక్కువ పాయింట్లలో ఉద్యోగాలు చేజారాయి. అయినా ఏనాడు కృంగిపోకుండా ఆత్మ విశ్వాసంతో నిరంతర సాధన చేసి 5 ప్రభుత్వ ఉద్యోగాలు సాధించింది. ఇద్దరు పిల్లలున్నా నువ్వు ఎలా ఉద్యోగం సాధిస్తావన్న వారితోనే శభాష్‌ అనిపించుకుంది.

పాలిటెక్నిక్ లైబ్రరీ సైన్స్ ఉద్యోగాల్లో మహిళా విభాగంలో రాష్ట్ర స్థాయిలో రెండో ర్యాంకు సాధించి శభాష్ అనిపించుకుంది హిమబిందు. ఎలాంటి కోచింగ్ లేకుండా ఓకే సబ్జెక్టును ఎంచుకొని ప్రిపేర్ అవ్వడం వల్లనే ఈ విజయం సాధ్యమైందని చెప్తోంది. ఆర్థిక ఇబ్బందులు ఉన్నప్పటికీ కుటుంబ సహకారంతోనే తన లక్ష్యాన్ని చేరుకున్నానని అంటోంది ఈ ఓరుగల్లు ఆణిముత్యం.

ఆర్థిక పురోగతిని సాధించడానికి ప్రతి ఒక్కరూ శక్తి వంచన లేకుండా కృషి చేయాలని సూచిస్తోంది హిమబిందు. మహిళలకు ఆర్ధిక స్వాతంత్య్రం ఉండాలని తన కాళ్ల మీద తాను నిలబడినప్పుడే అది సాధ్యమంటోంది. పది సంవత్సరాల నుంచి నిత్య విద్యార్థిగా కష్టపడిన హిమబిందు. ఇల్లు, పిల్లలు పోషణలో అనేక రకాల ఒత్తిళ్లు ఎదురైనప్పటికీ ఆత్మ విశ్వాసంతో వాటిని అధిగమించింది.

జీవితంలో అపజయాలు వస్తుంటాయి పోతుంటాయి. వాటికి కుంగిపోకుండా ఎంచుకున్న మార్గంలో వెనకడగు వేయకుండా ప్రయత్నిస్తే ఖచ్చితంగా విజయం చేరువవుతుందనడానికి హిమబిందు మంచి ఉదాహరణ. ఎంతో మంది గృహిణిలకు దిక్సూచిగా నిలిచిన ఆమె పట్టుదల అభినందనీయం.