రాష్ట్రంలో 46 డిగ్రీలకు పైగా ఉష్ణోగ్రతలు - వడదెబ్బతో ఏడుగురు మృతి - TELANGANA HEAT WAVE NEWS

Heat Wave in Telangana : తెలంగాణపై భానుడు నిప్పులు చెరుగుతున్నాడు. ఒకవైపు అధిక ఉష్ణోగ్రతలు, మరోవైపు వడగాల్పులతో జనం అల్లాడిపోతున్నారు. గత పదేళ్లలో ఎప్పుడూ నమోదుకానంత స్థాయిలో ఎండలు కాస్తూ కొత్త రికార్డులు నెలకొంటున్నాయి. పది జిల్లాల్లోని 20 మండలాల్లో గరిష్ఠ ఉష్ణోగ్రత 46 డిగ్రీల సెల్సియస్‌ను దాటింది. అత్యధికంగా నల్గొండ జిల్లా మునుగోడు మండలం గూడాపూర్‌లో 46.6 డిగ్రీలు నమోదైంది. రాష్ట్రంలో వడదెబ్బకు గురై ఏడుగురు మృతి చెందారు.

Highest Temperature in Telangana : భానుడి భగభగలతో రాష్ట్రంలోని పలుప్రాంతాలు నిప్పుల కొలిమిలా మారుతున్నాయి. గత పదిసంవత్సరాలలో ఎప్పుడూ నమోదుకానంత స్థాయిలో ఎండలు కాస్తూ కొత్త రికార్డులు నెలకొంటున్నాయి. పది జిల్లాల్లోని 20 మండలాల్లో గరిష్ఠ ఉష్ణోగ్రత 46 డిగ్రీల సెల్సియస్‌ను దాటింది. అత్యధికంగా నల్గొండ జిల్లా మునుగోడు మండలం గూడాపూర్‌లో 46.6 డిగ్రీలుగా నమోదయ్యాయి. ఈ జిల్లాలోని పలు మండలాలు 46.5 డిగ్రీల ఎండతో అల్లాడాయి. దీంతో అక్కడి ప్రజలు బయటికి రావాలంటనే బయపడుతున్నారు. ఇది ఆందోళనకర పరిణామమని శాస్త్రవేత్తలు చెబుతున్నారు.

రాష్ట్రంలో సాధారణం కన్నా సగటున 2.1 డిగ్రీలు అధికంగా ఉష్ణోగ్రతలు నమోదవుతున్నాయి. గత ఏడాది మే నెలతో పోల్చితే ఏకంగా 7.5 డిగ్రీలకుపైగా పెరుగుదల కనిపిస్తోంది. ఉదాహరణకు జగిత్యాలలో గతేడాది ఇదే రోజున 35.6 డిగ్రీలు నమోదు కాగా బుధవారం 45.6 డిగ్రీలు నమోదయ్యాయి. జగిత్యాల జిల్లాలో 2 మండలాలతో పాటు ఖమ్మం నగరంలో వడగాలులు వీచినట్లు వాతావరణశాఖ పేర్కొంది. రాష్ట్రంలోని పలు జిల్లాలకు ఈ నెల 5వ తేదీ వరకు వడగాలుల ముప్పు ఉన్నట్లు వాతావరణశాఖ హెచ్చరించింది.

People Died Due to Heat Stroke :కరీంనగర్‌ జిల్లా రామడుగు మండలం గోపాల్‌రావుపేట బూడిగజంగాల కాలనీకి చెందిన దివ్యాంగ బాలుడు కల్లెం యశ్వంత్‌(5) బుధవారం మధ్యాహ్నం ఇంట్లో రేకుల వేడికి తాళలేక మృతిచెందాడు. జనగామ పట్టణంలోని గుండ్లగడ్డకు చెందిన మహ్మద్‌ మొహినొద్దీన్‌(52) కూలీ పనులు చేస్తూ తీవ్ర అస్వస్థతకు గురయ్యారు. తెల్లవారుజామున ఇంట్లోనే కుప్పకూలి మృతిచెందారు. ఆదిలాబాద్‌ జిల్లా సొనాల మండలం పార్డి బి గ్రామ పంచాయతీ పరిధిలోని పర్పులపల్లెకు చెందిన ఆత్రం జంగు(48) పొలం పనులు చేసుకొని మధ్యాహ్నం ఇంటికి తిరిగి రాగానే ఒక్కసారిగా కుప్పకూలి అక్కడికక్కడే మరణించారు.

మంచిర్యాల జిల్లా కేంద్రంలోని ప్రభుత్వ ఆసుపత్రిలో ఏపీలోని కాకినాడ జిల్లా తునికి చెందిన బదావతి హటియా(68) వడదెబ్బకు చికిత్స పొందుతూ చనిపోయారు. కరీంనగర్‌ జిల్లా తిమ్మాపూర్‌ మండలం నుస్తులాపూర్‌లో ఆటోడ్రైవర్‌ రొడ్డ నర్సయ్య(46) ఎండదెబ్బకు గురై హాస్పటల్​లో చికిత్స పొందుతూ పరిస్థితి విషమించి మృతి చెందారు. హనుమకొండ జిల్లా కమలాపూర్‌ మండలం గూడూరు గ్రామానికి చెందిన పత్తిపాక రమేశ్‌(55) దుస్తులు విక్రయిస్తుంటారు. ఈయన ఎండలో అమ్మతుండటంతో వడదెబ్బకు గురైయ్యారు. వెంటనే హైదరాబాద్‌లోని నిమ్స్‌కు తరలించగా అప్పటికే మృతిచెందారు.

వడదెబ్బతో ఉపాధ్యాయురాలు మృతి : వడదెబ్బతో ఉపాధ్యాయురాలు మృతి చెందిన సంఘటన వికారాబాద్‌ జిల్లా తాండూరులో జరిగింది. దోమ మండలానికి చెందిన రాణి(35) బషీరాబాద్‌ మండలం టాకీతండా ప్రాథమిక పాఠశాలలో పని చేస్తున్నారు. ఎంపీ ఎన్నికలపై బుధవారం తాండూరు పట్టణంలో నిర్వహించిన శిక్షణకు హాజరయ్యారు. సాయంత్రం తిరిగి బషీరాబాద్‌ వెళ్లేందుకు బస్టాండుకు వచ్చారు. తలనొప్పిగా ఉందంటూ వాంతి చేసుకొని సొమ్మసిల్లి పడిపోయారు. వెంటనే తోటి ఉపాధ్యాయులు తాండూరు జిల్లా ఆసుపత్రికి తరలించగా పరీక్షించిన వైద్యులు అప్పటికే మృతిచెందినట్లు నిర్ధారించారు.