హైదరాబాద్​లో భారీ వర్షం - పలు ప్రాంతాల్లో ట్రాఫిక్​ జామ్​ - Heavy Rains In Hyderabad

Heavy Rains In Hyderabad : హైదరాబాద్​లోని పలు ప్రాంతాల్లో మంగళవారం సాయంత్రం భారీ వర్షం కురిసింది. దీంతో కిలోమీటర్ల మేర ట్రాఫిక్‌ జామ్‌ అయింది. రహదారులు జలమయంకావడంతో వాహనాల రాకపోకలు నెమ్మదిగా సాగుతున్నాయి. పంజాగుట్ట-అమీర్‌పేట రహదారి చెరువును తలపించేలా వరద నీటితో నిండిపోయింది.

Heavy Rains In Hyderabad : ఉదయం నుంచి ఉక్కపోతతో అల్లాడుతున్న హైదరాబాద్ వాసులకు వర్షం ఉపశమనం కలిగించింది. నగరంలో ఒక్కసారిగా కురిసిన వర్షానికి రహదారులు జలమయమయ్యాయి. సచివాలయం, లక్డీకపూల్, హిమాయత్‌నగర్‌, ఖైరతాబాద్‌, బషీర్‌బాగ్, అబిడ్స్, నాంపల్లి, కోఠి, జూబ్లీహిల్స్, బంజారాహిల్స్, పంజాగుట్ట, అమీర్‌పేట, ఎస్ఆర్ నగర్, ఎర్రగడ్డ, కూకట్‌పల్లి, హైదర్‌నగర్, ఆల్విన్‌కాలనీ, నిజాంపేట్‌, కేపీహెచ్‌బీ కాలనీ, మూసాపేట్‌, ప్రగతినగర్‌, జగద్గిరిగుట్ట, జీడిమెట్ల, షాపూర్‌నగర్‌లో భారీ వర్షం కురిసింది. గండి మైసమ్మ నుంచి బాచుపల్లి వెళ్లే రహదారిలో వర్షరు నీరు నిలవడంతో వాహనదారులు తీవ్ర ఇబ్బందులు పడుతున్నారు.

దీంతో ప్రధాన రహదారులపై నీరు చేరడంతో వాహనదారులు తీవ్ర ఇబ్బందులు ఎదుర్కొన్నారు. పలుచోట్ల డ్రైనేజీలు పొంగిపొర్లుతున్నాయి. ప్రధాన రహదారులలో ట్రాఫిక్ అంతరాయం ఏర్పడడంతో వాహనాలు నెమ్మదిగా కదులుతున్నాయి. ఉద్యోగులు ఇళ్లకు వెళ్లే సమయం కావడంతో తీవ్ర ఇబ్బందులు పడ్డారు. పంజాగుట్ట-అమీర్‌పేట రహదారి చెరువును తలపించేలా వరద నీటితో నిండిపోయింది. హైదరాబాద్‌లో పలు ప్రాంతాల్లో రోడ్లపై నిలిచిన వర్షపు నీటిని హైడ్రా సిబ్బంది తొలిగిస్తున్నారు.

వర్షం కారణంగా ట్రాఫిక్ సమస్య :మాదాపూర్, గచ్చిబౌలి, రాయదుర్గం, కొండాపూర్ ప్రాంతాల్లో భారీ వర్షం కురిసింది. దీంతో మాదాపూర్ నెక్టార్ గార్డెన్ రహదారిపై భారీగా వరద నీరు చేరడంతో ట్రాఫిక్ జామ్ ఏర్పడింది. మాదాపూర్ ట్రాఫిక్ పోలీసులు, జీహెచ్ఎంసీ సిబ్బంది కలిసి వాహనదారులను దారి మళ్లించారు.