అమిత్‌షా వీడియో మార్ఫింగ్ కేసులో ఐదుగురి అరెస్ట్ - కఠిన చర్యలు తీసుకోవద్దని హైకోర్టు ఆదేశం - Amit Shah Video Morphing Case

Central Home Minister Amit Shah Video Morphing Case : అమిత్‌షా వీడియో మార్ఫింగ్ కేసులో హైకోర్టు మధ్యంతర ఉత్తర్వులు జారీ చేసింది. ఈ కేసులో అరెస్ట్ అయిన ఐదుగురు నిందితులపై కఠిన చర్యలు తీసుకోవద్దంటూ దిల్లీ పోలీసులకు హైకోర్టు ఆదేశాలు జారీ చేసింది. విచారణను హైకోర్టు నాలుగు వారాలకు వాయిదా వేసింది.

Amit Shah Video Morphing Case Update : అమిత్‌షా వీడియో మార్ఫింగ్ కేసులో హైకోర్టు మధ్యంతర ఉత్తర్వులు జారీ చేసింది. ఈ కేసులో అరెస్ట్ అయిన ఐదుగురు నిందితులపై కఠిన చర్యలు తీసుకోవద్దంటూ దిల్లీ పోలీసులకు హైకోర్టు ఆదేశాలు జారీ చేసింది. ఈ కేసులో దిల్లీ పోలీసులు నిందితులుగా చేర్చిన మన్న సతీష్ ఈ పిటిషన్ వేశారు. ఈ పిటిషన్​పై హైకోర్టు విచారణ జరిపి నిందితులపై కఠిన చర్యలు తీసుకోవద్దని దిల్లీ పోలీసులను ఆదేశిస్తూ విచారణను నాలుగు వారాలకు వాయిదా వేసింది.

ఐదుగురు నిందితులు అరెస్టు : మరోవైపు ఈ ఘటనలో హైదరాబాద్​లో మరో కేసు నమోదైంది. బీజేపీ నేత ప్రేమేందర్​ రెడ్డి ఇచ్చిన ఫిర్యాదు ఆధారంగా పోలీసులు తెలంగాణ కాంగ్రెస్​ సోషల్​ మీడియా యూనిట్​లో పని చేస్తున్న పెండ్యాల వంశీకృష్ణ, మన్నె సతీష్​, పెట్టం నవీన్​, ఆస్మా తస్లీమ్​, కోయా గీతలను అరెస్టు చేశారు. వారి నుంచి ఐదు సెల్​ఫోన్లు, రెండు ల్యాప్​టాప్​లు, రెండు సీపీయూలు స్వాధీనం చేసుకున్నారు. దర్యాప్తులో భాగంగా పోలీసులు పలు అంశాలను గుర్తించారు.

గత నెల 23న మెదక్​లో అమిత్​ షా మీటింగ్​లో పాల్గొన్నారు. అయితే రిజర్వేషన్లకు సంబంధించి అమిత్​ షా మాట్లాడినట్లు మార్ఫింగ్​ చేసిన వీడియో ప్రధాన నిందితుడు పెండ్యాల వంశీకృష్ణకు వాట్సాప్​కి వచ్చింది. ఆ వీడియోను పలు వాట్సాప్​ గ్రూపులకు అతను ఫార్వర్డ్​ చేయడమే కాకుండా, కాంగ్రెస్​ అధికారిక ఎక్స్​(ట్విటర్​) ఖాతాలో కూడా అతడు పోస్ట్​ చేశాడు. మిగిలిన వారు కూడా వారి వ్యక్తిగత ఎక్స్​ ఖాతాల్లో అప్​లోడ్​ చేశారు. ఈ వీడియోలో నిజం లేకపోవడంతో ట్విటర్​ దానిని డిలీట్​ చేసినట్లు పోలీసులు తెలిపారు.

ప్రతి సోమ, శుక్రవారం కోర్టులో హాజరు కావాలి :విచారణ అనంతరం నిందితులను కోర్టులో హాజరుపరచగా, ఐదుగురు నిందితులకు కోర్టు రూ.10వేలతో ఇద్దరు పూచీకత్తుపై బెయిల్ మంజూరు చేసింది. ప్రతి సోమవారం, శుక్రవారం దర్యాప్తు అధికారి ఎదుట హాజరవ్వాలని ఆదేశించింది. అమిత్ షా వీడియో మార్ఫింగ్​పై కేంద్ర హోంశాఖ ఫిర్యాదు మేరకు దిల్లీ పోలీసులు ఇప్పటికే సీఎం రేవంత్​ రెడ్డితో సహా ఐదుగురు కాంగ్రెస్​ నేతలకు దిల్లీ పోలీసులు నోటీసులు ఇచ్చారు. మే 1వ తేదీన విచారణకు హాజరు కావాలని లేని పక్షంలో సీఆర్​పీసీ 91/160 కింద క్రిమినల్​ ప్రొసీడింగ్స్​ ప్రకారం చర్యలు తీసుకుంటామని చెప్పారు. అయితే పీసీసీ లీగల్​ సెల్​ మాత్రం నాలుగు వారాల గడువు కోరింది. సీఎం రేవంత్​ రెడ్డి ఎన్నికల ప్రచారంలో బిజీగా ఉండడం వల్ల ఈ సమయం కోరుతున్నట్లు తెలిపింది.