Cyber Criminals Frauds During Diwali : దీపావళి ముంగిట సైబర్ నేరగాళ్లు నకిలీ టపాసులు పేలుస్తున్నారు. ప్రముఖ ఈ-కామర్స్‌ సంస్థల పేర్లతో మోసపూరిత వెబ్‌సైట్ల లింకులు పంపించి ఆర్డర్‌ చేయాలంటూ డబ్బు కొట్టేసేందుకు ప్రయత్నిస్తున్నారు. వారం రోజులుగా దీపావళి ధమాకా పేరుతో మోసపూరిత లింకులు పెద్దఎత్తున వెళ్తున్నట్లు సైబర్‌క్రైమ్‌ పోలీసులు తెలిపారు.
దీపావళి ఆఫర్ల పేరుతో :వెబ్‌లింకులు, ఏపీకే ఫైళ్లు, దీపావళికి చాలామంది దుస్తులు, వాహనాలు, వంట, ఇంటి సామగ్రి, ఎలక్ట్రానిక్‌ వస్తువులు, ఫర్నీచర్‌ తదితర వస్తువుల్ని కొనేందుకు ఆసక్తి చూపుతుంటారు. దీనికి తగ్గట్టే ఈ-కామర్స్‌ వెబ్‌సైట్లు పోటాపోటీగా స్పెషల్ ఆఫర్లను ప్రకటిస్తున్నాయి. ఇదే అవకాశంగా సైబర్ ముఠాలు రెచ్చిపోతున్నాయి. పండగ ఆఫర్‌ పేరుతో వెబ్‌లింకులు, ఫోన్‌ డేటా మొత్తం గ్రహించే మోసపూరిత ఏపీకే ఫైళ్లను వాట్సాప్‌నకు పంపిస్తున్నారు. వీటిని క్లిక్ చేస్తే వెబ్‌సైట్‌లోకి రీ డైరెక్ట్ చేస్తుంది. పొరపాటున డబ్బు చెల్లించినప్పటికీ వస్తువులు మాత్రం డెలివరీ అవ్వవు.
ఆ లింక్లు క్లిక్ చేస్తే జేబు ఖాళీ :సైబర్ నేరగాళ్లు ఈ-కామర్స్‌ వెబ్‌సైట్లలో 50 శాతం రాయితీ పొందాలంటూ ఏపీకే ఫైల్స్‌తో కూడిన లింకులు పంపిస్తున్నారు. వీటిని క్లిక్ చేస్తే ఫోన్‌లోని వ్యక్తిగత ఫోటోలు, ఇతర ముఖ్యమైన వివరాలన్నీ నేరగాళ్ల చేతుల్లోకి వెళ్తుంది. కార్లు, బైకులు గెలుచుకోవడానికి బంపర్‌ డ్రా, లాటరీల పేరుతో ఈ-కామర్స్‌ సంస్థల పేర్లతో మేసేజ్లను పంపిస్తున్నారు. నిజమేనని నమ్మితే జేబు ఖాళీ అవుతుంది తస్మాత్ జాగ్రత్త.
మోసపూరిత ప్రకటనలు :సాధారణంగా పండగ ఆఫర్ల కోసం గూగుల్‌లో ఎక్కువగా సెర్చ్‌ చేస్తుంటాం. ఇలా వెతికినప్పుడు గూగుల్‌ ఆల్గారిథమ్‌ ఆధారంగా ఆ వస్తువులకు సంబంధించి యాడ్స్ వస్తుంటాయి. సైబర్ కేటుగాళ్లు ప్రజల్ని బోల్తా కొట్టించేందుకు గూగుల్‌లోనూ నకిలీ ప్రకటనలు ఇస్తున్నట్లుగా పోలీసులు గుర్తించారు. రూ.50 వేల విలువ చేసే ఫర్నీచర్‌ రూ.10 వేలకు, రూ.5 వేలకు రిఫ్రిజరేటర్‌ వంటి ఆకర్షణీయమైన ప్రకటనలు ఈ కోవలోకే వస్తున్నాయి. పండగ రోజు ఆత్మీయులు, స్నేహితులకు వాట్సాప్, ఇతర వేదికల ద్వారా ఇటీవల శుభాకాంక్షల పేరుతోనూ కొన్ని నకిలీ లింకులు వస్తున్నాయి. పొరపాటున వాటిని క్లిక్ చేస్తే ప్రమాదకర యాప్‌లు డౌన్‌లోడ్‌ అవుతున్నట్లుగా పోలీసు అధికారులు హెచ్చరిస్తున్నారు.
'అన్నీ దొరుకును - ఎవరికీ దొరకము' - నేరాలకు అడ్డాగా 'స్నాప్ చాట్' - Snapchat Crimes
సైబర్ నేరగాళ్ల వికృత చేష్టలు - టార్గెట్ రీచ్ కాకుంటే 15 అంతస్తుల భవనం 7సార్లు ఎక్కాలి - hyderabad man escape Laos cyber den
