CM Revanth Reddy Felicitates poet AndeSri :రాష్ట్ర గీతం జయ జయహే తెలంగాణ గీత రచయిత అందెశ్రీదంపతులను సీఎం రేవంత్ రెడ్డి దంపతులు జూబ్లీహిల్స్లోని తమ నివాసంలో సన్మానించారు. ఇవాళ అందెశ్రీ దంపతులు సీఎం నివాసానికి వచ్చారు. ముఖ్యమంత్రి ఇరువురితో సమావేశమై యోగక్షేమాలు అడిగి తెలుసుకున్నారు. తరువాత ముఖ్యమంత్రి దంపతులు అందెశ్రీ దంపతులను సన్మానించారు.
అలాగే మరో సినీ గేయ రచయిత సుద్దాల అశోక్ తేజ కూడా ముఖ్యమంత్రి రేవంత్ రెడ్డిని కలిశారు. అశోక్ తేజతో పాటు ఉస్తాద్ బిస్మిల్లాఖాన్ అవార్డు గ్రహీతలు అయిన అందె భాస్కర్ ( డప్పు వాయిద్యం), పేరిణి నృత్య కళాకారుడు పేరణి రాజ్ కుమార్ నాయక్లు కూడా ముఖ్యమంత్రిని మర్యాద పూర్వకంగా కలిశారు. అవార్డు గ్రహీతలను ముఖ్యమంత్రి రేవంత్ సన్మానించి అభినందించారు. ఈ సందర్భంగా సుద్దాల అశోక్ తేజ తాను రచించిన పుస్తకాలు, అందె బాస్కర్ డప్పును ముఖ్యమంత్రికి బహూకరించారు.