'ఇంజినీర్లు, డాక్టర్లు చాలా ఉన్నారులే నాన్న - నేను కళారంగం వైపు అడుగేస్తా'

Artist Sreeja Yuva story: ఆ అమ్మాయి తల్లికి హాబీల్లేవు. అందుకే తన బిడ్డలకు కచ్చితంగా అభిరుచులు నేర్పాలనుకుంది. అమ్మ ఆలోచనను కుమార్తె సరిగ్గా ఆకళింపు చేసుకుంది. తన అభిరుచిని ఒక లక్ష్యంతో ముడివేసి ముందుకు సాగుతోంది. ఒక్కో మెట్టు ఎదుగుతూ తనదైన మార్క్ ప్రదర్శిస్తోంది. అందమైన బొమ్మలేస్తూ భారత హైకమిషన్‌కు మ్యూరెలు రూపొందించే స్థాయికి చేరింది. ఇంతకీ ఆ యువతి ఎవరు? ఏం చేస్తోందీ తెలుసుకోవాలంటే ఈ కథనం చదవాల్సిందే.

Artist Sreeja Yuva story : అభిరుచులను తల్లి నేర్పించే క్రమంలో ఆసక్తిగా నేర్చుకుంది. ఇంజినీర్, డాక్టర్ ఏం కావాలనే ఆలోచన వచ్చినప్పుడు దేశంలో చాలామంది ఉన్నారులే నాన్న నేను కళారంగం వైపు అడుగేస్తా అని స్పష్టంగా చెప్పింది. అందరి సహకారంతో అంచెలంచెలుగా ఎదుగుతూ తనదైన మార్క్ చాటుకుంటోంది. ఏదో అభిరుచి ఉండాలని ఆర్ట్​ నేర్చుకునే స్థాయి నుంచి సింగపూర్​లోని భారత హైకమిషన్​కు మ్యూరెల్ రూపొందించిన 75 మంది బృందానికి ప్రాజెక్ట్​ మేనేజర్‌గా వ్యవహరించే స్థాయికి ఎదిగింది.

ఇక్కడ అందంగా బొమ్మలేస్తున్న ఈ యువతి పేరు శ్రీజ కనుమూరి. హైదరాబాద్లోనే పుట్టి పెరిగింది. తండ్రి రూరల్ పవర్ డిస్ట్రీబ్యూషన్​ అండ్ రూరల్ ఎలక్ట్రిఫికేషన్​ వ్యాపారి. తల్లి సౌజన్య గృహిణి. చిన్నప్పటి నుంచి ఇంటర్మీడియట్ వరకు విద్యాభ్యాసమంతా హైదరాబాద్​లోనే సాగింది. డిగ్రీ మాత్రం సింగపూర్​లో పూర్తి చేసింది. ఇంటర్ పూర్తైన తర్వాత నుంచి కళారంగంలో తనదైన ముద్ర వేయాలని బలమైన కోరిక మొదలైందని చెబుతోంది శ్రీజ.

కేవలం ఆర్ట్ వేయడమే కాదు. కూచిపూడి లాంటి పలు కళారంగాల్లోనూ ఆసక్తి కనబరుస్తోం దీ యువతి. ఆర్ట్ వేయడంలో విభిన్నరకాలు ఉంటాయని, వీలైనంత త్వరగా వాటిని అవగతం చేసుకుని అనుకరించేందుకు ప్రయత్నిస్తానని చెబుతోంది. తాను వేయగలిగే ఆర్ట్స్ గురించి ఇలా వివరిస్తోంది. చిన్నప్పటి నుంచి ఇందులో రంగ ప్రవేశం ఉన్న శ్రీజ గ్రాడ్యుయేషన్ అయ్యాక సింగపూర్​లోనే ఉద్యోగం చేస్తుండేది.

ఆ సమయంలోనే భారత్ హైకమిషన్​కు మ్యూరెల్​ రూపొందించాలని అందుకోసం ఆయా దేశాల్లో ఉన్న భారతీయులకు అవకాశం కల్పించింది. అప్పటికే గ్యాలరీ మేనేజర్​గా పనిచేస్తున్న ఈ యువతి ఆ టీమ్​కు​ మేనేజర్​గా ఉండడమే కాదు భారతీయత ప్రతిబింబించేలా మ్యూరెల్​ను తయారు చేశారు. ఆ అనుభవం తనకు చాలా ఆనందాన్ని ఇచ్చిందని చెబుతోంది శ్రీజ. తనలో ఉన్న కళను అందరికీ పంచాలనే ఉద్దేశంతో సింగపూర్​లో కొన్ని రోజులు బోధన చేసింది శ్రీజ. తర్వాత స్వదేశానికి వచ్చిన తర్వాత కూడా ఫ్రీలాన్సర్​గా టీచింగ్ చేస్తోంది.

తానీ స్థాయిలో ఉండేందుకు ఉమ్మడి కుటుంబమే కారణమని చెబుతోంది శ్రీజ. చేసే ప్రతి పనిలో తోడు నిలుస్తారని చెబుతోంది. ఆర్టిస్ట్​గా ఎదిగేందుకు గురువులు, మిత్రులతో పాటు కుటుంబ సహకారం తోడ్పడిందని అంటోంది శ్రీజ. ఆమెకు ఎంత వరకైనా దేనికైనా అండగా నిలుస్తామని చెబుతున్నారు శ్రీజ తల్లిదండ్రులు. తమ కుమార్తె ఈ స్థాయికి చేరుకోవడం సంతోషంగా ఉందని ఆనందం వ్యక్తం చేస్తున్నారు. పిల్లల అభిరుచులను తెలుసుకుని, వాటిని ఓ లక్ష్యానికి ముడిపెట్టి ప్రోత్సహిస్తే ప్రతి ఒక్కరూ అద్భుతాలు చేయగలరని శ్రీజతో పాటు ఆమె తల్లిదండ్రులు అంటున్నారు.