Ganesh Immersion Routes In Hyderabad :నగరంలోని బొజ్జ గణపయ్య నిమజ్జనాలకు ఏర్పాట్లు పూర్తయ్యాయి. ఈ మేరకు గణేశ్ నిమజ్జనం శోభాయాత్ర రూట్ మ్యాప్ ఏర్పాటు చేసినట్లు ట్రాఫిక్ ఏసీపీ విశ్వప్రసాద్ తెలిపారు. రెండు రోజుల పాటు హైదరాబాద్లో ట్రాఫిక్ ఆంక్షలు ఉంటాయని పేర్కొన్నారు. వినాయక నిమజ్జనం నేపథ్యంలో బందోబస్తు కోసం 25 వేల మంది పోలీసులను సిద్ధం చేశారు. ఏర్పాట్లపై కసరత్తు చేసిన పోలీసులు, కేవలం హుస్సేన్సాగర్ చుట్టూ 3 వేల మందితో బందోబస్తు ఏర్పాట్లు చేశారు. మంగళవారం ఉదయం 6 గంటల నుంచి బుధవారం రాత్రి 10 గంటల వరకూ ట్రాఫిక్ పోలీసులు అంక్షలను విధించారు. హైదరాబాద్లో 64 ప్రాంతాల్లో ట్రాఫిక్ మళ్లింపులు ఉంటాయని ట్రాఫిక్ ఏసీపీ విశ్వప్రసాద్ తెలిపారు.
బాలాపూర్ నుంచి ఎన్టీఆర్ మార్గ్ వరకు సాగే ప్రధాన గణేశ్ నిమజ్జనం శోభాయాత్ర రహదారుల్లో సాధారణ ప్రజల వాహనాల రాకపోకలకు అనుమతించమని పోలీసులు వెల్లడించారు. ఇతర రాష్ట్రాలు, జిల్లాల నుంచి వచ్చే భారీ వాహనాలను సోమవారం అర్ధరాత్రి నుంచి హైదరాబాద్లోకి అనుమతి లేదని అధికారులు తెలిపారు. నగరం నుంచి ఇతర ప్రాంతాలకు వెళ్లే ప్రైవేటు బస్సులు ఓఆర్‌ఆర్‌తో పాటు ఇతర మార్గాల ద్వారా వెళ్లాలని సూచించారు. హైదరాబాద్ పాతబస్తీలో కేశవగిరి, మహబూబ్నగర్ చౌరస్తా, ఇంజిన్ బౌలి, నాగుల్ చింత, హిమ్మత్‌పురా, హరిబౌలి, అస్రా హాస్పిటల్, మొఘల్ పురా, మదీనా చౌరస్తా, ఎంజే బ్రిడ్జి, దారుల్ షిఫా చౌరస్తా, సిటీ కాలేజి వద్ద వాహనాలను మళ్లిస్తామని తెలిపారు.
ఆయా ప్రాంతాల్లో ట్రాఫిక్ ఆంక్షలు : గణేశ్ నిమజ్జన సమయంలో పలు ప్రాంతాల్లో ఆర్టీసి బస్సులకు ఆంక్షలు ఉన్నాయని అధికారులు వెల్లడించారు. మెహదీపట్నం నుంచి వచ్చే బస్సులను మాసబ్ ట్యాంక్ వద్ద నిలిపివేస్తారు. కూకట్‌పల్లి నుంచి వచ్చే బస్సులు ఖైరతాబాద్ వద్ద, సికింద్రాబాద్ నుంచి వచ్చే బస్సులు సీటీఓ ప్లాజా, ఎస్‌బీహెచ్‌, క్లాక్ టవర్, చిలకలగూడ క్రాస్ రోడ్ వరకు మాత్రమే పోలీసులు అనుమతి ఇస్తారు. గడ్డి అన్నారం, చాదర్ఘాట్ వైపు వచ్చే వాహనాలు దిల్సుఖ్నగర్ వద్ద, మిధాని, ఇబ్రహీంపట్నం వైపు నుంచి వచ్చే వాహనాలు ఐఎస్‌ సదన్ వద్ద, ఇంటర్ సిటీ స్పెషల్ బస్సులు వైపీఎంఏ నారాయణ గూడ వద్ద నిలిపివేస్తామని పోలీసులు వివరించారు.
ఎంజీబీఎస్‌ నుంచి అంతరాష్ట్రతోపాటు వివిధ జిల్లాలకు వెళ్లే బస్సులకు కోసం ప్రత్యేక రూట్ మ్యాప్ను ఏర్పాటు చేశామని అధికారులు వెల్లడించారు. రాజీవ్ రహదారి నుంచి వచ్చే వాహనాలను జేబీఎస్‌, సంగీత్, తార్నాక, విద్యానగర్ టీ జంక్షన్, ఫివర్ ఆస్పత్రి, బర్కత్ పూర్, నింబోలి అడ్డా మీదుగా ఎంజీబీఎస్‌కు వెళ్లాలని పోలీసులు సూచించారు. బెంగళూరు వైపు నుంచి వచ్చే వాహనాలతోపాటు ముంబై ఎన్‌హెచ్‌ 9 నుంచి వచ్చే వాహనాలు వై జంక్షన్ బోయిన్పల్లి వైసీఎంఏ సంగీత్, తార్నాక, విద్యానగర్ టీ జంక్షన్, ఫివర్ ఆస్పత్రి, బర్కత్పూర్ నింబోలి అడ్డా మీదుగా ఎంజీబీఎస్‌ వెళ్లాలని ట్రాఫిక్ పోలీసులు కోరారు.