Prakashraj Reaction on Pawan Kalyan Comments : సున్నితమైన అంశాలపై మాట్లాడే ముందు ప్రకాశ్రాజ్ తెలుసుకుని మాట్లాడాలని, సనాతన ధర్మంపై ఇష్టమొచ్చినట్లు మాట్లాడితే ఊరుకునేది లేదని ఏపీ ఉప ముఖ్యమంత్రి చేసిన వ్యాఖ్యలపై నటుడు ప్రకాశ్రాజ్ స్పందించారు. తాను చెప్పిన విషయాన్ని పవన్ కల్యాణ్ అపార్థం చేసుకున్నారని పేర్కొన్నారు. ప్రస్తుతం తాను విదేశాల్లో సినిమా షూటింగ్‌లో ఉన్నానని, ఈ నెల 30 తర్వాత వచ్చి పవన్ ప్రతి ప్రశ్నకు జవాబిస్తానన్నారు. తన ట్వీట్‌ను మళ్లీ చదివి అర్థం చేసుకోవాలని కోరుతున్నానని స్పష్టం చేశారు. ఈ మేరకు ఓ వీడియో విడుదల చేశారు.
నేను చెప్పిన విషయాన్ని పవన్ అపార్థం చేసుకున్నారు. ప్రస్తుతం నేను విదేశాల్లో సినిమా చిత్రీకరణలో ఉన్నాను. ఈ నెల 30 తర్వాత వచ్చి, పవన్ ప్రతి ప్రశ్నకు జవాబిస్తాను. నా ట్వీట్ మళ్లీ చదివి అర్థం చేసుకోవాలని కోరుతున్నా. - నటుడు ప్రకాశ్రాజ్
అసలు ఏం జరిగిందంటే? తిరుమల లడ్డూ వివాదం దేశవ్యాప్తంగా చర్చనీయాంశంగా మారిన సంగతి తెలిసిందే. బాధ్యులపై చర్యలు తీసుకోవాలంటూ భక్తులతో పాటు పలువురు రాజకీయ, సినీ ప్రముఖులు సైతం డిమాండ్‌ చేస్తున్నారు. ఈ క్రమంలోనే ఇటీవల ప్రకాశ్రాజ్ పవన్‌కల్యాణ్‌ను ట్యాగ్‌ చేస్తూ ట్వీట్ చేశారు. 'మీరు డిప్యూటీ సీఎంగా ఉన్న రాష్ట్రంలో ఈ ఘటన జరిగింది. విచారణ చేపట్టి, బాధ్యులపై తగిన చర్యలు తీసుకోండి. భక్తులకు అనవసర భయాలు కల్పించి, దీనిని జాతీయ స్థాయిలో చర్చించుకునేలా ఎందుకు చేస్తున్నారు. మన దేశంలో ఇప్పటికే ఉన్న మతపరమైన ఉద్రిక్తతలు చాలు.' అని ఆ ట్వీట్‌లో పేర్కొన్నారు.