54 Years Old Man Cycling : 5 పదుల వయసులోనూ ఆ వ్యక్తి రోజుకు 300 కి.మీ. దూరం సైక్లింగ్ చేస్తున్నాడు. కేవలం 12 రోజుల్లోనే కశ్మీర్ నుంచి కన్యాకుమారి వరకు 3,758 కి.మీ. ప్రయాణించి ఔరా అనిపించాడు. అది కూడా ఒకసారి కాదు, వరుసగా రెండేళ్లు పూర్తి చేసి సత్తా చాటారు హైదరాబాద్ బండ్లగూడకు చెందిన గెయిల్ ఇంజినీరు బొబ్బా రవీందర్ రెడ్డి. కేవలం గంటసేపు సైకిల్ తొక్కితేనే అమ్మ బాబోయ్ నావల్ల కాదంటూ చేతులెత్తేస్తున్న ఈ యువతరం యువతకు ఈ 54 ఏళ్ల వ్యక్తి సాహసం ఆదర్శమేనని చెప్పాలి.
గెయిల్ ఇంజినీరుగా పని చేస్తున్న ఆయన అమెరికాలో వచ్చే ఏడాది జూన్లో జరగబోయే 5 వేల కి.మీ. వరల్డ్ లాంగెస్ట్ అల్ట్రా సైక్లింగ్ ఛాంపియన్షిప్నకు అర్హత సాధించారు. ఈ రేసుకు మన దేశం నుంచి ఏటా పలువురు సైనికాధికారులు పాల్గొంటున్నా, మొదటిసారి 50 ఏళ్లు పైబడిన కేటగిరీలో రవీందర్ రెడ్డి పాల్గొంటున్నారు. వరంగల్ జిల్లాకు చెందిన రవీందర్ రెడ్డి, 1991లో హైదరాబాద్ రామంతపూర్లో పాలిటెక్నిక్ విద్యను పూర్తి చేశారు. ఆ తర్వాత గెయిల్లో ఉద్యోగం సాధించి, యూపీ, ఏపీ, తమిళనాడు, కర్ణాటక రాష్ట్రాల్లో పని చేసి చివరికి 2015లో హైదరాబాద్లో మార్కెటింగ్ అధికారిగా చేరారు.
ఇలా ఉద్యోగం చేస్తూనే బీటెక్ కెమికల్, ఎంబీఏ పూర్తి చేసి పీహెచ్డీలో చేరినా, అనివార్య కారణాల వల్ల మధ్యలోనే ఆపేశారు. డాక్టరేట్ సాధించలేకపోయాననే బాధలో పడ్డారు. ఈ బాధ నుంచి బయటపడేందుకు 2012లో 42 ఏళ్ల వయసులోనే దిల్లీలో మొదటిసారి హాఫ్ మారథాన్ చేశారు. ఆ తర్వాత 10 రాష్ట్రాల్లో 282 మారథాన్లు పూర్తి చేయగా, అందులో హాఫ్ 21.1 కి.మీ., ఫుల్ 42.2 కి.మీ. మారథాన్లు ఉన్నాయి.
గిన్నిస్ బుక్ రికార్డు కోసం ప్రయత్నించి : గిన్నిస్ బుక్ రికార్డు కోసం ఒకే నెలలో 33 మారథాన్లు చేయగా, అవన్నీ కూడా ఒకే చోటే చేయడంతో గిన్నిస్ బుక్ రికార్డు దక్కలేదు. కానీ హాఫ్ మారథాన్లో మాత్రం ఇంటర్నేషనల్ బుక్ ఆఫ్ రికార్డ్స్ సాధించారు.
ట్రయథ్లాన్ చేసిన రవీందర్ రెడ్డి : 2014లో గోవాలో మొదటిసారి ట్రయథ్లాన్ చేశారు. ఈత, సైక్లింగ్, పరుగు ఈ మూడింటిని కలిపి ట్రయథ్లాన్ అంటారు. వీటిని పూర్తి చేసిన వారిని ఫుల్ ఐరన్ మ్యాన్ అంటారు. హైదరాబాద్ గచ్చిబౌలిలో 2.9 కి.మీ. ఈత, 135 కి.మీ. సైక్లింగ్, 31 కి.మీ. పరుగు పూర్తి చేసిన రవీందర్ రెడ్డి ఐరన్ మ్యాన్ 3/4 అయ్యారు. ఫుల్ ఐరన్ మ్యాన్ పోటీలు ఇండియాలో లేకపోవడంతో అమెరికా వెళ్లేందుకు స్పాన్సర్లు దొరక్కపోవడంతో సాధించలేకపోయారు.
అమెరికాలో ప్రపంచ పోటీలకు అర్హత
- తర్వాత సైక్లింగ్పై దృష్టిపెట్టిన రవీందర్ రెడ్డి, 2022లో కశ్మీర్ నుంచి కన్యాకుమారి వరకు 23 రోజుల రేసులో పాల్గొన్నారు.
- 2023లో ఇండియన్ ఆయిల్ కంపెనీ మొదటిసారి మనదేశంలో వరల్డ్ అల్ట్రా సైక్లింగ్ అసోసియేషన్ గుర్తింపుతో ఏషియా లాంగెస్ట్ అల్ట్రా సైక్లింగ్ ఛాంపియన్షిప్ నిర్వహించగా, ఇందులో రవీందర్ రెడ్డి 50 ఏళ్ల వయసులో పోటీపడి మొదటిస్థానం సాధించారు. ఈ రేసు 12 రాష్ట్రాల మీదుగా 3,651 కి.మీ. సాగి 12 రోజుల్లో పూర్తి చేశారు. అమెరికాలో వరల్డ్ ఛాంపియన్షిప్ పోటీలకు అర్హత సాధించినా వెళ్లలేకపోయారు.
- 2024లో ఇదే పోటీని దూరం పెంచి ఇండియా లాంగెస్ట్ అల్ట్రా సైక్లింగ్ ఛాంపియన్షిప్ పేరుతో నిర్వహించారు. ఈసారి 3,758 కి.మీ. కశ్మీర్ నుంచి కన్యాకుమారి వరకు 12 రోజుల్లో పూర్తి చేశారు. దీంతో రెండోసారి కూడా అమెరికాలో జరిగే ప్రపంచ పోటీలకు అర్హత సాధించారు. ఇది చాలా ఖర్చుతో కూడుకున్నది కావడంతో స్పాన్సర్ల కోసం చూస్తున్నారు.
జస్ట్ 5 నిమిషాలు ఇలా చేస్తే హై బీపీ పరార్! ఎలానో తెలిస్తే షాక్ అవుతారు!!
సైక్లింగ్తో గుండె, లంగ్స్ మరింత పదిలం- ఇంకెన్నో ఆరోగ్య ప్రయోజనాలు! - Health Benefits Of Cycling
