సౌతాఫ్రికా శుభారంభం - నోకియా మెరుపులకు లంక చిత్తు - 2024 T20 World Cup

SL vs SA T20 World Cup 2024 : టీ20 ప్రపంచకప్‌లో సౌతాఫ్రికా సత్తా చాటింది. సోమవారం జరిగిన గ్రూప్‌-డి మ్యాచ్‌లో 6 వికెట్ల తేడాతో శ్రీలంకపై గెలుపొందింది.

SL vs SA T20 World Cup 2024:టీ20 ప్రపంచకప్‌లో సౌతాఫ్రికా సత్తా చాటింది. సోమవారం జరిగిన గ్రూప్‌-డి మ్యాచ్‌లో 6 వికెట్ల తేడాతో శ్రీలంకపై గెలుపొందింది. నోకియా (4/7) ధాటికి మొదట లంక 19.1 ఓవర్లలో 77 పరుగులకే కుప్పకూలగా, రబాడ (2/21), కేశవ్‌ మహరాజ్‌ (2/22) కూడా ఆ జట్టును తమ ఇన్నింగ్స్​లో దెబ్బతీశారు. 19 పరుగులు చేసిన కుశాల్‌ మెండిస్‌ టాప్‌ స్కోరర్​గా నిలిచాడు.

ఇక లంక నిర్దేశించిన లక్ష్యాన్ని సౌతాఫ్రికా 16.2 ఓవర్లలో 4 వికెట్లు కోల్పోయి ఛేదించింది. క్లాసెన్‌ (19 నాటౌట్‌), డికాక్‌ (20) రాణించారు. నోకియాకు 'ప్లేయర్‌ ఆఫ్‌ ద మ్యాచ్‌' అవార్డు లభించింది.

మ్యాచ్​ సాగిందిలా
టాస్​ నెగ్గి బ్యాటింగ్ ఎంచుకున్న శ్రీలంకకు ఘనమైన ఆరంభమేమీ దక్కలేదు. సౌతాఫ్రికా బౌలర్ల దెబ్బకు లంక బ్యాటింగ్ ఆర్డర్టపటపా కూలిపోయింది. ఓపెనర్లు పాతుమ్ నిస్సంకా (3), కుశాల్ మెండీస్ (19) తక్కువ స్కోర్లకే పరిమితమయ్యారు. వన్​డౌన్​లో కామిందు మెండిస్ (11) కూడా విఫలమయ్యాడు. ఇక కెప్టెన్ వానిందు హసరంగ (0), సదీర సమరవిక్రమ (0) వరుస బంతుల్లో పెవిలియన్ చేరారు. ఇక అసలంక (6), శనాక (9), మ్యాథ్యూస్ (16), మతీషా పతిరణ (0), నువాన్ తుషారా (0) స్పల్ప స్కోర్లకే వెనుదిరిగారు. సఫారీ బౌలర్లలో అన్రిట్ నోకియా 4 వికెట్లతో లంక పతనాన్ని శాసించాడు. కేశవ్ మహారాజ్, కగిసో రబాడా చెరో 2, బార్త్​మన్ 1 వికెట్ దక్కించుకున్నారు.

లంక చెత్త రికార్డు:ఈ మ్యాచ్​లో శ్రీలంక చెత్త రికార్డు మూటగట్టుకుంది. టీ20 ఫార్మాట్​లో గతంలో కంటే అతి తక్కువ స్కోర్ నమోదు చేసింది. 2016లో భారత్​తో మ్యాచ్​లో 82 పరుగులు చేసిన లంక తాజా మ్యాచ్​లో తన చెత్త రికార్డు తామే బ్రేక్ చేసింది. కాగా, ఈ మ్యాచ్​లో నమోదైన స్కోర్ (77) లంకకు టీ20ల్లో అత్యల్పం.

ఔరా 'నోకియా': సఫారీ బౌలర్ అన్రీచ్ నోకియా ఈ మ్యాచ్​లో నిప్పులు చెరిగాడు. బుల్లెట్ లాంటి బంతులతో లంక బ్యాటర్లను వణికించాడు. కుశాల్ మెండీస్, కామిందు మెండీస్, అసలంక, మ్యాథ్యూస్​లాంటి కీలక బ్యాటర్లను పెవిలియన్ చేర్చి ప్రత్యర్థిని దెబ్బకొట్టాడు. ఈ మ్యాచ్​లో తన 4 ఓవర్ల కోటాలో కేవలం 1.80 ఎకనమీతో 7 పరుగులే ఇచ్చి 4 వికెట్లు కూల్చడం విశేషం. ఈ క్రమంలో వరల్డ్​కప్​లో 4 ఓవర్ల కోటాలో అతి తక్కువ ఎకనమీతో పరుగులిచ్చిన బౌలర్​గా నోకియా రికార్డు కొట్టాడు.

ప్రపంచకప్​లో అతి తక్కువ ఎకనమీ నమోదు చేసిన బౌలర్లు (4 ఓవర్ల పూర్తి కోటా)

• 1.75 ఎకనమీ- నోకియా vs శ్రీలంక (2024)
• 2.00 ఎకనమీ- అజంతా మెండీస్ vs జింబాబ్వే (2012)
• 2.00 ఎకనమీ- మహ్మదుల్లా vs అఫ్గానిస్థాన్ (2014)
• 2.00 ఎకనమీ- హసరంగ vs యూఏఈ (2022)