Paris Paralympics 2024 : పారిస్ ఒలింపిక్స్ 2024 ఇటీవలే ముగిసింది. ఇప్పుడు ఇదే వేదికగా మరో క్రీడోత్సవం పారాలింపిక్స్ షురూ! నేటి(ఆగస్ట్ 28) నుంచే ఈ పారాలింపిక్స్ ప్రారంభం. దివ్యాంగుల కోసం జరగబోయే క్రీడలు ఇవి. ఈ క్రీడల్లో 168 దేశాల నుంచి 4400 మంది అథ్లెట్లు బరిలోకి దిగబోతున్నారు. పూర్తి వివరాలు స్టోరీలో.
- పారిస్ ఒలింపిక్స్లో 3×3 బాస్కెట్‌బాల్‌, బ్రేక్ డ్యాన్స్, స్కేట్‌ బోర్డింగ్ నిర్వహించిన డిలా కాంకార్డ్‌ వేదికగా ఈ పారాలింపిక్స్ ప్రారంభోత్సవం జరగనుంది. పారాలింపిక్స్ చరిత్రలోనే స్టేడియంలో కాకుండా బహిరంగ ప్రదేశంలో ఇలా ప్రారంభోత్సవం నిర్వహించడం ఇదే తొలిసారి. సెప్టెంబర్‌ 8న ముగింపోత్సవం జరుగుతుంది.
- మహిళలకు మరింత ప్రోత్సాహం అందించాలనే ఉద్దేశంతో ఈ సారి 10 కొత్త ఈవెంట్లను(2020 టోక్యో పారాలింపిక్స్‌తో పోలిస్తే) తీసుకొచ్చారు. వీటిలో గోల్‌బాల్, బోచా ఆటలు ప్రత్యేక ఆసక్తిని రేకెత్తిస్తున్నాయి.
- ఈ పారిస్ పారాలింపిక్స్లో చైనా(282) తరఫున అత్యధికంగా అథ్లెట్లు పాల్గొంటున్నారు. 2020 టోక్యో పారాలింపిక్స్లో చైనా 96 గోల్డ్ మెడల్స్, ఓవరాల్గా 207 పతకాలు సాధించింది.
- భారత్ తరఫున ఎంతమందంటే?(Paris Paralympics India) - ఈ పారిస్ పారాలింపిక్స్లో భారత్ తరఫున 84 మంది అథ్లెట్లు పాల్గొంటున్నారు. తైక్వాండో, స్విమ్మింగ్‌ (1), సైక్లింగ్, జూడో, టేబుల్‌ టెన్నిస్, రోయింగ్ (2), పారా కనోయింగ్‌ (3), పవర్‌లిఫ్టింగ్‌ (4), ఆర్చరీ (6), షూటింగ్‌ (10), బ్యాడ్మింటన్‌ (13), అథ్లెటిక్స్(38) పోటీ పడుతున్నారు.
- 25 మెడల్స్ లక్ష్యంగా - అంధుల జూడో, రోయింగ్, సైక్లింగ్ భారత్ తొలి సారి అథ్లెట్లను బరిలోకి దింపింది. 2020 టోక్యో పారాలింపిక్స్లో భారత్ 5 గోల్డ్ మెడల్స్ సహా 19 పతకాలను దక్కించుకుంది. ఈ సారి పారిస్ పారాలింపిక్స్లో 25 మెడల్స్ లక్ష్యంగా బరిలోకి దిగింది. ఆరంభోత్సవ వేడుకలో సుమిత్‌ అంటిల్‌ (అథ్లెటిక్స్), భాగ్యశ్రీ జాదవ్ భారత పతాకధారులుగా వ్యవహరిస్తారు.
- తెలుగు రాష్ట్రాల నుంచి - ఇక రొంగలి రవి (షాట్‌పుట్‌, అనకాపల్లి), కొంగనపల్లి నారాయణ (రోయింగ్, నంద్యాల), జీవాంజి దీప్తి (400 మీటర్ల టీ20 పరుగు, వరంగల్‌), షేక్‌ అర్షద్‌ ( తైక్వాండో, నంద్యాల) తెలుగు రాష్ట్రాల నుంచి పాల్గొంటున్నారు.
- మెడల్ ఛాన్సెస్ - అథ్లెట్ దీప్తి గోల్డ్ మెడల్ గెలిచే అవకాశాలున్నాయి. ఇక టోక్యో పారాలింపిక్స్లో గోల్డ్, సిల్వర్ మెడల్ సాధించిన షూటర్‌ అవని లేఖరాపై(10 మీటర్ల ఎయిర్‌రైఫిల్, 10 మీటర్ల మిక్స్‌డ్‌ ఎయిర్‌ రైఫిల్‌) కూడా మంచి అంచనాలున్నాయి. కృష్ణ నగార్‌ (బ్యాడ్మింటన్‌), సుహాస్‌ యతిరాజ్‌ (బ్యాడ్మింటన్‌), సుమిత్‌ అంటిల్‌ (జావెలిన్‌త్రో, ఎఫ్‌-64), శీతల్‌దేవి (ఆర్చరీ), భవీనా పటేల్‌ (టేబుల్‌టెన్నిస్‌), తంగవేలు మరియప్పన్‌ (హైజంప్‌), యోగేశ్‌ కతూనియా (డిస్కస్‌త్రో), మనీశ్‌ నర్వాల్‌ (షూటింగ్‌) మెడల్స్ సాధించే అవకాశాలున్నాయి.
మరిన్ని విశేషాలు -
- వాలెంటీనా పెట్రిలో (ఇటలీ, అథ్లెటిక్స్) - ఈ క్రీడల్లో పాల్గొంటున్న తొలి ట్రాన్స్‌జెండర్‌.
- షార్క్‌ దాడిలో కాలు పోగొట్టుకున్న అమెరికా స్విమ్మర్ అలీ ట్రువిట్‌పై అంచనాలు ఉన్నాయి.
- పారాలింపిక్స్లో 7 గోల్డ్ మెడల్స్ సహా 17 మెడల్స్ సాధించింది అమెరికా స్టార్‌ ఒక్సానా మాస్టర్స్ (సైక్లింగ్). ఈసారి కూడా ఒక్సానా మాస్టర్స్ మెరుగైన ప్రదర్శన చేస్తుందని అంచనాలు ఉన్నాయి.
- షరిఫ్‌ ఉస్మాన్‌ (ఈజిప్ట్, పవర్‌ లిఫ్టింగ్‌) నాలుగో, బేబ్‌వివో (ఇటలీ, ఫెన్సింగ్‌) మూడో గోల్డ్ మెడల్పై దృష్టి పెట్టారు.
- 16 ఏళ్ల చెక్‌ అమ్మాయి డేవిడ్‌ క్రటోచ్‌విల్‌ 50 మీటర్లు, 100 మీటర్ల బ్యాక్‌స్ట్రోక్‌లో ప్రపంచ రికార్డులు నెలకొల్పింది. ఆమె ఇప్పుడు గోల్డ్ మెడల్ సాధిస్తుందని అంచనాలు ఉన్నాయి. ఒకప్పుడు గతంలో ఆమె ఐస్‌ హాకీ ప్లేయర్‌.
- 2004 ఏథెన్స్‌ పారాలింపిక్స్ నుంచి అంధుల సాకర్‌ క్రీడలో బ్రెజిల్ దేశమే గోల్డ్ మెడల్ సాధిస్తూ వస్తోంది. ఈసారి కూడా ఆ దేశమే ఫేవరెట్‌గా ఉంది.
- పారిస్ ఒలింపిక్స్లో రష్యా, ఉక్రెయిన్‌ అథ్లెట్లు తటస్థ జెండాతో పోటీపడ్డారు. ఇప్పుడు పారాలింపిక్స్‌లోనూ రష్యా, ఉక్రెయిన్‌ అథ్లెట్లు తటస్థ జెండాతోనే పోటీ పడనున్నారు. రష్యా తరఫున 88, ఉక్రెయిన్‌ నుంచి 8 మంది అథ్లెట్లు బరిలోకి దిగుతున్నారు.
- గతంలో 2012, 2020 పారాలింపిక్స్లో 164 దేశాలు పాల్గొన్నాయి. ఈ సారి ఆ రికార్డ్ బ్రేక్ అయింది. అత్యధికంగా పారిస్ పారాలింపిక్స్లో 168 దేశాలు బరిలోకి దిగబోతున్నాయి.
- ఈ పారిస్ పారాలింపిక్స్లో చైనా తరఫున 282 మంది అథ్లెట్లు పాల్గొంటున్నారు. ఈ పారిస్ పారాలింపిక్స్లో అత్యధిక సంఖ్య ఇదే. వీరిలో పరుషులు 124 మంది కాగా, మహిళలు 158 మంది ఉన్నారు. చైనా తర్వాత బ్రెజిల్ 255 మంది అథ్లెట్లతో రెండో స్థానంలో ఉంది.
- ఈ పారిస్ పారాలింపిక్స్లో మొత్తం 4440 మంది అథ్లెట్లు పోటీ పడుతున్నారు. వీరిలో 164 పతక ఈవెంట్లలో 1135 అథ్లెటిక్స్ బరిలో దిగారు.
- ఈ సారి పారిస్ పారాలింపిక్స్లో పోటీ పడే శరణార్థ అథ్లెట్లు 8 మంది ఉన్నారు.