ఒకరు గర్భంతో - మరొకరు మానసిక సమస్యలతో - పతకాలు గెలిచి ఎందరికో స్ఫూర్తిగా నిలిచి! - PARIS OLYMPICS 2024

Paris Olympics Top Perfomances: పారిస్ ఒలింపిక్స్ చివరి అంకానికి చేరుకున్నాయి. అయితే ఈ విశ్వ క్రీడల్లో కొందరు అథ్లెట్లు తమ పోరాట పటిమతో యువతలో స్ఫూర్తిని నింపారు. అనారోగ్య, మానసిక సమస్యలు వెంటాడినా వెనుదిరగకుండా పతకాన్ని దక్కించుకున్నారు. మరెందుకు ఆలస్యం ఆ ఆథ్లెట్లు ఎవరో ఈ స్టోరీలో తెలుసుకుందాం.

Paris Olympics 2024 Top Perfomances :పారిస్ ఒలింపిక్స్ క్రీడలు ముగింపు దశకు చేరుకున్నాయి. ప్రపంచ దేశాల అథ్లెట్లు కష్టపడి తమ దేశానికి పతకాలను అందిస్తున్నారు. అయితే ఈ ఒలింపిక్స్‌ బరిలో దిగిన ఓ నలుగురు అథ్లెట్లు మాత్రం తీవ్ర మానసిక, ఆరోగ్య సమస్యలను ఎదురొడ్డి దేశానికి మెడల్స్‌ను అందించారు. ఎన్ని కష్టాలు ఎదురైనా తగ్గేదేలే అని నిరూపించారు. మరి ఈ పారిస్ ఒలింపిక్స్‌లో ఎందరో యువ అథ్లెట్లకు స్ఫూర్తిగా నిలిచిన ఆ నాలుగు ప్రదర్శనలపై ఓ లుక్కేద్దాం పదండి.

నాడా హఫీజ్ - దేశానికి పతకాన్ని అందించాలనే సంకల్పం గర్భంతో ఉన్న ఆమెను ఒలింపిక్స్‌లో పాల్గొనేలా చేసింది. ఈ ఈజిప్టు ఫెన్సర్ ఏడు నెలల గర్భంతో పారిస్ ఒలింపిక్స్‌లో పాల్గొంది. ప్రపంచ 10వ ర్యాంకర్ ఎలిజబెత్ టార్టకోవ్‌ స్కీపై ఓపెనింగ్ మ్యాచ్‌ లో 15-13 స్కోరుతో విజయం సాధించింది. అయితే హఫీజ్ తర్వాత రౌండ్ ఆఫ్ 16లో దక్షిణ కొరియాకు చెందిన జియోన్ హయోంగ్ చేతిలో 15-7 తేడాతో ఓడిపోయింది. కానీ బలమైన పోటీ ఇచ్చింది. మ్యాచ్ అనంతరం హఫీజ్ తన విజయాలు, ఎదుర్కొన్న సవాళ్ల గురించి గర్విస్తూ సోషల్‌ మీడియా ప్లాట్‌ ఫామ్‌ ఇన్‌ స్టాలో షేర్‌ చేసుకుంది. "పోడియంపై మీకు ఇద్దరు ఆటగాళ్లు కనిపిస్తున్నారు. వాస్తవానికి వారు ముగ్గురు! అది నేను, నా ప్రత్యర్థి, ఇంకా మా ప్రపంచంలోకి రాబోయే, నా లిటిల్‌ బేబీ! నా బిడ్డ, నేను ఫిజికల్‌, ఎమోషనల్‌ ఛాలెంజెస్‌ ను కలిసి ఎదుర్కొన్నాం." అని పోస్ట్ లో తెలిపింది.

సిమోన్‌ బైల్స్‌ - అమెరికా స్టార్‌ జిమ్నాస్ట్‌ సిమోన్‌ బైల్స్‌ టోక్యో ఒలింపిక్స్‌లో ఆరు ఈవెంట్లలో ఫైనల్స్‌కు అర్హత సాధించినా మానసిక ఒత్తిడి కారణంగా ఐదు ఈవెంట్ల నుంచి వైదొలిగింది. అయితే ఆ తర్వాత బలంగా పుంజుకుని పారిస్ ఒలింపిక్స్‌లో రాణించింది. ఆర్టిస్టిక్ జిమ్నాస్టిక్స్‌లోని వివిధ ఈవెంట్స్‌లో మూడు స్వర్ణాలు (టీమ్, ఆల్‌రౌండ్, వాల్ట్‌), ఓ రజతం ఖాతాలో వేసుకుంది. అయితే ఎంత ఒత్తిడి, మానసిక కుంగుబాటు ఉన్నా అనుకున్నది సాధించడానికి ఇవేమీ అడ్డుకావని సిమోన్ బైల్స్ నిరూపించింది. నోవా లైల్స్ - పారిస్ ఒలింపిక్స్‌లో 100 మీటర్ల పరుగు పందెంలో అమెరికా అథ్లెట్ నోవా లైల్స్ విజేతగా నిలిచి పసిడి సాధించాడు. అత్యంత హోరాహోరీగా సాగిన ఫైనల్లో వెంట్రుకవాసి తేడాలో కిషేన్‌ థాంప్సన్‌ను వెనక్కి నెట్టి నోవా స్వర్ణం ఎగరేసుకుపోయాడు. అయితే ఆస్తమా, డిప్రెషన్, డైస్లెక్సియా వంటి పలు అనారోగ్య సమస్యలతో తాను పోరాడుతున్నట్లు గెలుపు అనంతరం ఎక్స్‌లో పోస్ట్ చేశాడు. ఈ పోస్ట్ అతని అభిమానులకు చాలా మంచి సందేశాన్ని ఇచ్చింది. అలాగే స్పూర్తినిచ్చింది. యూసుఫ్ డికేక్ -ఒలింపిక్స్ షూటింగ్ ఈవెంట్‌లో పాల్గొనే షూటర్లు ప్రత్యేకమైన ఎక్విప్‌ మెంట్ ధరిస్తారు. టార్గెట్ మిస్ అవ్వకుండా ఉండేందుకు కళ్లకు లెన్స్ అండ్ ఇయర్ ప్రొటెక్టర్స్‌తో ఈవెంట్‌లో పాల్గొని ఫలితాలు సాధిస్తారు. అయితే పారిస్ ఒలింపిక్స్‌లో ఓ షూటర్ ఇవేమీ వాడకుండానే జేబులో స్టైల్‌గా చేయి పెట్టుకుని ఈవెంట్‌లో పాల్గొని సిల్వర్ మెడల్ సాధించాడు. అది కూడా 51ఏళ్ల వయసులో. అతడే తుర్కియేకు చెందిన యూసుఫ్ డికేక్. తాను బయటకు ప్రశాంతంగా కనిపించినప్పటికీ లోపల తుపాను ఉంటుందని విజయం అనంతరం చెప్పాడు. 51 ఏళ్ల వయసులోనూ చెక్కుచెదరని సంకల్పంతో కాన్ఫిడెంట్‌గా అనుకున్న లక్ష్యాన్ని సాధించాడు యూసుఫ్. వయసు అనేది కేవలం నెంబరు మాత్రమే అని నిరూపించాడు ఈ షూటర్.