Manu bhaker Neeraj chopra Marriage : పారిస్‌ ఒలింపిక్స్ 2024లో నీరజ్ చోప్రా, మను బాకర్ అద్భుత ప్రదర్శన చేశారు. మను బాకర్ రెండు కాంస్య పతకాలు గెలుచుకోగా నీరజ్ ఓ రజతాన్ని అందుకున్నాడు. అయితే ఒలింపిక్స్ ముగిశాక వీరిద్దరికి సంబంధించిన ఓ వీడియో బయట తెగ చక్కర్లు కొట్టింది. దాంతో వీరిద్దరి ప్రేమలో ఉన్నారని, త్వరలోనే పెళ్లి చేసుకుంటారని అంతా ప్రచారం సాగింది.
తాజాగా దీనిపై షూటర్ మను బాకర్ తండ్రి రామ్‌ కిషన్ బాకర్ స్పందించారు. మను ఇంకా చిన్నపిల్లే అని ఆ వార్తలకు పుల్‌స్టాప్ పెట్టేశారు. "మను ఇంకా చిన్న పిల్లే. ఆమెకు పెళ్లి వయసు ఇంకా రాలేదు. మేం అసలు ఆ విషయం గురించి అస్సలు ఆలోచించడం కూడా లేదు" అని సమాధానం ఇచ్చారు.
అలానే మను తల్లి నీరజ్ చోప్రాతో మాట్లాడటం, తలపై చోప్రా చేతిని ఉంచి ఒట్టు తీసుకున్నట్లుగా వీడియోలో కనిపించడం కూడా బాగా చర్చనీయాంశమైంది. దీంతో నీరజ్ చోప్రా - మను పెళ్లి అంటూ ఊహా గానాలు మరో స్థాయికి చేరుకున్నాయి. తమ కుమార్తెను పెళ్లి చేసుకోవాలి అని నీరజ్ను మను అమ్మ కోరినట్లు చాలా మంది నెటిజన్లు మాట్లాడుకున్నారు.
దీని గురించి రామ్‌ కిషన్ మాట్లాడుతూ నీరజ్ను ఆమె ఓ బిడ్డలా భావిస్తోంది అని అన్నారు. అయితే నిజానికి వాళ్ల మధ్య ఏం చర్చ జరిగింది అన్న విషయంపై క్లారిటీ లేదు.