Ind vs SL ODI Seires Records:శ్రీలంక పర్యటనలో టీమ్ఇండియాకు షాక్ తగిలింది. బుధవారం జరిగిన మూడో వన్డేలో శ్రీలంక 110 పరుగుల తేడాతో నెగ్గింది. 249 పరుగుల లక్ష్య ఛేదనలో టీమ్ఇండియా 26.1 ఓవర్లలో 138 పరుగులకే ఆలౌటైంది. దీంతో ఆతిథ్య శ్రీలంక మూడు వన్డేల సిరీస్ను 2-0తేడాతో దక్కించుకుంది. ఈ క్రమంలో దాదాపు 27ఏళ్ల తర్వాత శ్రీలంక తొలిసారి భారత్పై వన్డే సిరీస్ దక్కించుకొని సంచలనం సృష్టించింది. చివరగా 1997లో శ్రీలంక 3-0తో భారత్పై వన్డే సిరీస్ కైవసం చేసుకుంది. తాజాగా చరిత్ అసలంక నేతృత్వంలోని లంక జట్టు అలా 27ఏళ్ల నిరీక్షణకు తెరదించింది.
ఈ సిరీస్లో మరికొన్ని రికార్డులు
- దునిత్ వెల్లలగె ప్లేయర్ ఆఫ్ ది సిరీస్ అవార్డు దక్కించుకున్నాడు. వెల్లలగే బ్యాటింగ్లో 108 పరుగులతో రాణించగా, 7 వికెట్లతో అదరగొట్టాడు.
- ఈ సిరీస్లో టీమ్ఇండియా స్పిన్నర్లకు 27 వికెట్లు సమర్పించుకుంది. 3మ్యాచ్ల వన్డే ద్వైపాక్షిక సిరీస్లో ఓ జట్టు స్పిన్నర్లు పడగొట్టిన అత్యధిక వికెట్లు ఇవే.
- భారత్పై వన్డేల్లో రెండుసార్లు 5+వికెట్లు తీసిన ఏకైక స్పిన్నర్గా దునిత్ వెల్లలగే ఘనత సాధించాడు. అతడు తాజా మ్యాచ్లో 5వికెట్లు కూల్చగా, 2023లోనూ 5వికెట్లు దక్కించుకున్నాడు.
- ఈ సిరీస్లో టీమ్ఇండియా ప్రతి మ్యాచ్లోనూ స్పిన్నర్లకు 9 వికెట్లు ఇచ్చుకుంది.
- ఈ సిరీస్లో టీమ్ఇండియా కెప్టెన్ రోహిత్ శర్మ టాప్ స్కోరర్గా నిలిచాడు. రోహిత్ మూడు మ్యాచ్ల్లో కలిపి 157 పరుగులు చేశాడు. అందులో 2 హాఫ్ సెంచరీలు ఉన్నాయి.
- శ్రీలంకపై వన్డే సిరీస్ ఓడిన మూడో కెప్టెన్గా రోహిత్ చెత్త రికార్డు మూటగట్టుకున్నాడు. రోహిత్ కంటే ముందు 1993లో అజారుద్దిన్, 1997లో సచిన్ తెందూల్కర్ లంకతో సిరీస్ కోల్పోయారు.