Ind vs Ire T20 World Cup 2024:2024 టీ20 వరల్డ్కప్లో టీమ్ఇండియా బోణీ కొట్టింది. న్యూయార్క్ వేదికగా ఐర్లాండ్తో బుధవారం జరిగిన మ్యాచ్లో టీమ్ఇండియా 8 వికెట్ల తేడాతో నెగ్గింది. ఐర్లాండ్ నిర్దేశించిన 97 పరుగుల స్వల్ప లక్ష్యాన్ని భారత్ 2 వికెట్లు కోల్పోయి 12.2 ఓవర్లలో సునాయసంగా ఛేదించింది. కెప్టెన్ రోహిత్ శర్మ (52 పరుగులు: 37 బంతుల్లో: 4x4, 3x6) హాఫ్ సెంచరీతో ఆకట్టుకున్నాడు. రిషభ్ పంత్ (36* పరుగులు) రాణించాడు. ఐర్లాండ్ బౌలర్లలో మార్క్ అదైర్, బెంజామిన్ వైట్ చెరో 1 వికెట్ దక్కించుకున్నారు.
రోహిత్- విరాట్ జోడీ: అందరూ అన్నట్లుగానే ఈ మ్యాచ్లో రోహిత్తో కలిసి విరాట్ కోహ్లీ ఇన్నింగ్స్ ప్రారంభించాడు. దీంతో ఈ స్టార్ జోడీయే మ్యాచ్ ముగిస్తుందని అనుకున్నారు. కానీ, మూడో ఓవర్లో భారీ షాట్కు ప్రయత్నించిన విరాట్ క్యాచౌట్గా పెవిలియన్ చేరాడు. దీంతో 22 పరుగులకే తొలి వికెట్ కోల్పోయింది. ఇక వన్డౌన్లో దిగిన పంత్తో రోహిత్ స్కోర్ బోర్డును ముందుకు నడిపించాడు. ఆ పిచ్పై ఇతర బ్యాటర్లు సింగిల్స్ తీయడానికి కష్టపడుతుంటే రోహిత్ బౌండరీలతో అలరించాడు. ఈ క్రమంలో టీ20ల్లో 30వ హాఫ్ సెంచరీ పూర్తి చేసుకున్నాడు. ఇక 52 పరుగుల వద్ద రిటైర్డ్ హర్ట్గా రోహిత్ క్రీజును వదిలాడు. చివర్లో సూర్య భారీ షాట్కు యత్నించి ఔటయ్యాడు. తర్వాత పంత్ మ్యాచ్ ముంగించాడు.
రోహిత్ @4000: రోహిత్ శర్మ టీ20ల్లో 4 వేల పరుగులు పూర్తి చేసుకున్నాడు. 26 పరుగులు వ్యక్తిగత స్కోర్ వద్ద రోహిత్ ఈ మైలురాయి అందుకున్నాడు. ఇప్పటి వరకు రోహిత్ టీ20ల్లో 4026 పరుగులు బాదాడు. ఈ క్రమంలో టీ20ల్లో అత్యధిక పరుగులు బాదిన టాప్ 2 బ్యాటర్గా నిలిచాడు. విరాట్ కోహ్లీ (4038) టాప్లో ఉండగా పాక్ బ్యాటర్ బాబర్ ఆజమ్ (4023) మూడో స్థానంలో కొనసాగుతున్నాడు. ఇక ఈ మ్యాచ్లో రోహిత్ 1000 టీ20 వరల్డ్కప్ పరుగులు కూడా పూర్తి చేసుకున్నాడు.