IND VS ENG 2nd Test KL Rahul Jadeja : ఇంగ్లాండ్తో విశాఖపట్నం వేదికగా జరగనున్న రెండో టెస్టుకు ముందు టీమ్ ఇండియాలో కొన్ని మార్పులు జరిగాయి. గాయాల కారణంగా రవీంద్ర జడేజా, కేఎల్ రాహుల్ ఈ రెండో టెస్టుకు అందుబాటులో ఉండట్లేదని బీసీసీఐ తెలిపింది. సర్ఫరాజ్‌ ఖాన్, సౌరభ్‌ కుమార్‌, వాషింగ్టన్‌ సుందర్‌కు జట్టులో స్థానం కల్పించినట్లు పేర్కొంది.
"వైజాగ్‌లో ఇంగ్లాండ్తో జరగనున్న రెండో టెస్టుకు రవీంద్ర జడేజా, కేఎల్ రాహుల్ దూరమయ్యారు. తొలి టెస్ట్ నాలుగో రోజు ఆటలో గాయపడిన జడేజా తొడకండరాల గాయంతో బాధపడుతున్నాడు. రాహుల్ కూడా కుడి కాలి కండరాల నొప్పితో ఇబ్బంది పడుతున్నాడు. వీరిద్దరూ ప్రస్తుతం బీసీసీఐ మెడికల్ పర్యవేక్షణలో ఉన్నారు" అని బీసీసీఐ సోమవారం ఓ ప్రకటనలో తెలిపింది.
హైదరాబాద్‌ వేదికగా జరిగిన తొలి టెస్టు నాలుగో రోజు ఆటలో జడేజాకు తొడకండరాలు పట్టేశాయి. దీంతో అతడు ఇబ్బంది పడుతూనే మైదానాన్ని వీడాడు. ఇప్పుడా గాయం తీవ్రత ఎక్కువగా ఉండడం వల్ల రెండో టెస్టుకు దూరమయ్యాడు. ఇక రాహుల్ కూడా ఫీల్డింగ్‌ చేసినప్పుడు కండరాల నొప్పితో బాధపడినట్లు తెలిసింది. అందుకే అతడికి కూడా రెస్ట్ ఇచ్చింది బోర్డు.