ఐపీఎల్ 2025లో ధోనీ ఆడటంపై CSK సీఈఓ కామెంట్స్​ - ఆ రోజులోగా మహీ నిర్ణయం వెల్లడి

వచ్చే ఐపీఎల్ సీజన్​లో ధోనీ ఆడడంపై సీఎస్​కే సీఈఓ హింట్ - ఆ రోజులోగా నిర్ణయం వెల్లడిస్తాడని వ్యాఖ్యలు!

Dhoni IPL 2025 Update :ఐపీఎల్ సీజన్ 2025 కోసం అన్ని జట్లు సిద్ధమవుతున్నాయి. అయితే ఎప్పటిలాగే టీమ్ ఇండియా మాజీ కెప్టెన్, సీఎస్​కే ప్లేయర్ మహేంద్ర సింగ్ ధోనీ వచ్చే ఐపీఎల్ సీజన్​లో ఆడతాడా? లేదా అని అందరిలోనూ సందేహం ఉంది. తాజాగా ఈ విషయంపై స్పందించారు చెన్నై సూపర్ కింగ్స్ ఫ్రాంచైజీ సీఈఓ కాశీ విశ్వనాథన్. ఆయన ఏమన్నారంటే?

వచ్చే ఐపీఎల్ సీజన్​లో ధోనీ ఆడుతాడో? లేదో? ఇంకా చెప్పలేదని కాశీ విశ్వనాథన్ తెలిపారు. అక్టోబరు 31లోగా ధోనీ తన నిర్ణయాన్ని వెల్లడిస్తాడని పేర్కొన్నారు. అయితే ఐపీఎల్ 2025లో సీఎస్​కే తరఫున ఆడుతాడని ఆశాభావం వ్యక్తం చేశాడు. ఐపీఎల్ 2025 సీజన్​లో ధోనీ ఆడతాడా? లేదా? కేవలం మెంటార్​గా ఉంటాడా? అనే సందేహాలు వ్యక్తమవుతున్న నేపథ్యంలో కాశీనాథన్ ఈ వ్యాఖ్యలు చేయడం గమనార్హం.

'ధోనీ ఆడాలని కోరుకుంటున్నాం' -"అక్టోబరు 31లోపు తన నిర్ణయాన్ని వెల్లడిస్తానని ధోనీ చెప్పాడు. ఈ తేదీ అన్ని జట్లు తమ రిటెన్షన్ జాబితాను నిర్ధారించడానికి గడువు. ఐపీఎల్ 2025లో సీఎస్​కే తరఫున ధోనీ ఆడాలని మేము కోరుకుంటున్నాము. కానీ ధోని ఇంకా మాకు ఆ విషయంపై క్లారిటీ ఇవ్వలేదు. మహీ సీఎక్​కే తరఫున ఆడుతాడని ఆశిస్తున్నాం." అని కాశీ విశ్వనాథన్ వ్యాఖ్యానించాడు.

ధోనీ కోసమే అన్ క్యాప్డ్ ప్లేయర్ రూల్! -సీఎస్​కే ఆటగాడు ఎంఎస్ ధోనీ కోసమే అన్ క్యాప్డ్ ప్లేయర్ రూల్​ను బీసీసీఐ తీసుకొచ్చిందని గతంలో వార్తలు వచ్చాయి. ఈ రూల్ ప్రకారం ధోనీని రూ.4 కోట్లు పెట్టి సీఎస్​కే రిటైన్ చేసుకోవచ్చు. అయితే కెప్టెన్ కూల్ వచ్చే సీజన్​లో ఆడుతాడా? లేదా? అనే అనుమానం చాలా మందిలో కలుగుతోంది. ఈ విషయంపై ధోనీ క్లారిటీ ఇవ్వాలంటే మరికొన్ని రోజులు వేచి చూడాల్సిందే.

కెప్టెన్​గా అదుర్స్ -సీఎస్కేకు కెప్టెన్​గా వ్యవహరించిన ధోనీ ఆ జట్టును విజయపథంలో నడిపించాడు. ఐదు సార్లు ట్రోఫీలను అందించాడు. అలాగే ప్లేయర్ గానూ అదరగొట్టాడు. అందుకు ధోనీని వదులుకునేందుకు సీఎస్​కే ఎప్పుడూ ఆసక్తి చూపలేదు. ఇకపోతే 264 ఐపీఎల్ మ్యాచ్​లు ఆడి 5243 పరుగులు చేశాడు మహీ. అందులో 24 అర్ధ శతకాలు ఉన్నాయి. అలాగే భారత్ తరఫున 90 టెస్టుల్లో 4876 రన్స్, 350 వన్డేల్లో 10773 పరుగులు చేశాడు. 98 టీ20ల్లో 1617 పరుగులు బాదాడు. అలాగే భారత్​కు ఐసీసీ టీ20, వన్డే వరల్డ్ కప్​ను అందించాడు ధోనీ.