Electric Vehicle Engineering Course : విద్యుత్ వాహనాల పరిశ్రమలో రోజురోజుకీ పెరుగుతున్న అవకాశాల గురించి మనకి తెలుసు కానీ వాటిని అందిపుచ్చుకునేలా తాజాగా సరికొత్త ఈవీ కోర్సులు అందుబాటులోకి వచ్చాయనే విషయం మాత్రం కొందరికే తెలుసు. ఆ వివరాలు తెలుసుకోవడం ద్వారా ఈ విద్యుత్ వాహనాల పరిశ్రమలో మెరుగైన అవకాశాలు అందుకునే వీలుంది.
ఫార్చ్యూన్‌ బిజినెస్‌ ఇన్‌సైట్స్‌ రిపోర్ట్ : ఫార్చ్యూన్‌ బిజినెస్‌ ఇన్‌సైట్స్‌ విడుదల చేసిన నివేదిక ప్రకారం 2029 నాటికి ప్రపంచవ్యాప్తంగా ఉన్న ఈవీ వెహికల్‌ మార్కెట్ ఏకంగా 114 బిలియన్‌ డాలర్లకు చేరుకుంటుందని అంచనా వేసింది. ఏటా మార్కెట్‌లో విద్యుత్ వాహనాల సంఖ్యలో సరాసరి 60 శాతం పెరుగుదల కనిపిస్తున్నట్లు నిపుణులు అంచనా వేస్తున్నారు. విదేశాల్లో ఇప్పటికే అభివృద్ధి చెందుతూ దూసుకుపోతున్నప్పటికీ మనదేశంలోనూ ఈ రంగం అభివృద్ధి చెందడానికి ఎంతో ఆస్కారం ఉంది.
- అయితే ఇంతటి ప్రాముఖ్యం ఉన్న విద్యుత్ వాహనాల తయారీ రంగం గురించి నేరుగా అభ్యసించడానికి ఇప్పటివరకూ విద్యార్థులకు సరైన కోర్సులు లేవు. ఇంజినీరింగ్, ఇతర టెక్నికల్‌ చదువుల్లో ఒకటిగానే ఈ సబ్జెక్టును చదువుకుంటూ వచ్చారు. కానీ ఇప్పుడు పరిస్థితి పూర్తిగా మారుతోంది. దేశంలోని ప్రముఖ విద్యాసంస్థలు ఈవీ కోసం ప్రత్యేకంగా కోర్సులను ప్రవేశపెడుతున్నాయి.
- ఈవీ డిప్లొమా అనేది వెహికల్‌ టెక్నాలజీలో ఒక మలుపుగా చెప్పవచ్చు. ఇవి విద్యార్థులను ఎలక్ట్రిక్ వెహికల్‌ ఇండస్ట్రీకి పూర్తిస్థాయిలో సిద్ధం చేయనున్నాయి. ఇందులో వీరు ఇంజినీరింగ్ అంశాలు, పరికరాల వినియోగం, డిజైన్‌ ప్రాథమిక అంశాలు ఇంకా మరెన్నో నేర్చుకునేందుకు మంచి అవకాశాలున్నాయి.
- బిట్స్‌ పిలానీలో దీనికి సంబంధించి వర్క్‌ ఇంటిగ్రేటెడ్‌ లెర్నింగ్‌ ప్రోగ్రామ్‌ కూడా అందుబాటులో ఉంది. దీని ద్వారా ఆన్‌లైన్‌లో విద్యార్థులు ఎక్కడి నుంచైనా క్సాసెస్ వినే వీలుంది. లైవ్‌ క్లాసెస్ను వారాంతాలు, వ్యాపార పని గంటల తర్వాత నిర్వహిస్తారు.
- ఐఐటీ దిల్లీ విద్యాసంస్థ సైతం దీనికి సంబంధించిన కోర్సు అందిస్తోంది. సర్టిఫైడ్‌ ప్రోగ్రామ్‌ ఇన్‌ హైబ్రిడ్‌ ఎలక్ట్రిక్ వెహికల్స్‌ (హెచ్‌ఈవీఎస్‌) డిజైన్‌ రూపంలో ఈ ఆన్‌లైన్‌ ప్రోగ్రామ్‌ను అందిస్తున్నారు.
- ఈ కోర్సుల్లో చేరేందుకు ఎక్కువగా ఇంజినీరింగ్, డిప్లొమా, ఎమ్మెస్సీ చివరి సంవత్సరం ఇంజినీరింగ్ చదువుతున్న విద్యార్థులను అనుమతిస్తున్నారు.
ఈ కోర్సులు పూర్తి చేయడం ద్వారా ప్రముఖ విద్యుత్ వాహనాల తయారీ సంస్థల్లో కొలువులను సాధించే వీలుంటుంది. ఎప్పటికప్పుడు జాబ్‌ మార్కెట్‌లో వస్తున్న మార్పులను గమనిస్తూ మనకున్న స్కిల్స్ను మెరుగుపరుచుకుంటూ ఉండాలి.
ఎక్కడ? : ఇండియన్ ఇన్‌స్టిట్యూట్‌ ఆఫ్‌ సోలార్‌ ఎనర్జీ విద్యార్థుల కోసం ఏడాది వ్యవధి గల ఎలక్ట్రిక్ వెహికల్‌ టెక్నాలజీ ప్రోగ్రామ్‌ కోర్సును అందిస్తోంది.
ఇంపీరియల్‌ సొసైటీ: ఈవీ ఇంజినీరింగ్ సర్టిఫైడ్‌ డిప్లొమా కోర్సు అందుబాటులో ఉంది.
ఏమేం నేర్పిస్తారు?
ఈవీ డిజైన్‌ : ఇంజినీరింగ్ కాన్సెప్ట్‌లను, టూల్స్‌ను ఉపయోగించి ఎలక్ట్రిక్ వెహికల్స్‌ను ఎలా తయారు చేయాలనే దానిపై ఉంటుంది.
బ్యాటరీ డిజైన్‌: బ్యాటరీ ప్యాక్స్‌ను రూపుదిద్దడం, థర్మల్‌ కూలింగ్‌, సెల్‌ సార్టింగ్, వంటివి.
పవర్‌ట్రైన్‌: ఈవీ పవర్‌ ట్రైన్‌ లెక్క కట్టడం, మోటార్‌ డిజైన్‌ తయారుచేయడం లాంటి అంశాలుంటాయి.
భద్రత: ఈవీ క్రాష్‌ టెస్టులు, బాడీ పార్ట్స్‌ను ఎలా తయారుచేయాలి, సిమ్యులేషన్స్‌ ఎలా నిర్వహించాలనేది నేర్చుకోవచ్చు.
నిర్వహణ: విద్యుత్ వాహనాలను ఎలా మెయింటేన్ చేయాలో తెలియజేస్తారు.
ఛార్జింగ్‌ : ఈవీలను గ్రిడ్‌లోకి ఇంటిగ్రేట్‌ చేయడం ఇందులో భాగం, ఛార్జింగ్‌ హబ్స్‌ను తయారుచేయడం, పైన చెప్పిన అంశాలన్నీ ఈ కోర్సుల్లో నేర్చుకోవచ్చు.
త్వరలో ఇండియన్ మార్కెట్లోకి అతి పెద్ద ఈవీ కారు!- సింగిల్ ఛార్జ్తో 580km రేంజ్!
ఈవీ రంగంపై కేంద్రం వరాల జల్లు- ఇకపై తగ్గనున్న ఎలక్ట్రిక్ కార్లు, బైక్లు, ఫోన్ల ధరలు!
