Cristiano Ronaldo One Billion Followers :పోర్చుగల్ సాకర్ దిగ్గజ ప్లేయర్క్రిస్టియానో రొనాల్డో తాజాగా ఓ నయా రికార్డును తన పేరిట రాసుకున్నాడు. తన సోషల్ మీడియా ఖాతాలన్నింటిలో కలిపి అతడికి ఉన్న ఫాలోవర్ల సంఖ్య ఇప్పుడు ఏకంగా 100 కోట్లను దాటింది. ఇక ఈ సంతోషకరమైన విషయాన్ని రొనాల్డో తన అభిమానులతో పంచుకున్నాడు. వారికి థ్యాంక్స్ చెప్తూ ఓ స్పెషల్ పోస్టర్ షేర్ చేశాడు.
"మేం చరిత్ర సృష్టించాం. 100కోట్ల ఫాలోవర్లు! ఇది కేవలం ఓ సంఖ్య మాత్రమే కాదు. అంతకుమించిన మీ ప్రేమాభిమానాలకు ఇది నిదర్శనం. మడైరా వీధుల నుంచి ప్రపంచంలోనే అతిపెద్ద వేదికల వరకు. నేను ఎల్లప్పుడూ నా కుటుంబంతో పాటు మీ కోసమే ఆడాను. ఇప్పుడు ఈ వంద కోట్ల మంది నా కోసం నిలబడ్డారు. నా అప్స్ అండ్ డౌన్స్లో, ప్రతి అడుగులోనూ మీరున్నారు. ఇది మన జర్నీ. మనమంతా కలిస్తే ఏదైనా సాధించగలమని నిరూపించాం. నాపై నమ్మకం ఉంచి. నన్ను ఎల్లప్పుడూ అండగా ఉన్నందుకు, నా జీవితంలో భాగమైనందుకు మీ అందరికీ మనస్ఫూర్తిగా కృతజ్ఞతలు తెలియజేస్తున్నాను. నేనింకా బెస్ట్ పెర్ఫామెన్స్ చేయాల్సి ఉంది. మరిన్ని విజయాలు సాధించి సరికొత్త చరిత్ర సృష్టించాలి" అని రొనాల్డో ఫ్యాన్స్ను ఉద్దేశించి పోస్ట్ పెట్టాడు.
ఆరు రోజుల్లో 50 మిలియన్లు!
Cristiano Ronaldo Youtube Channel: ఇటీవలే యూట్యూబ్ ఛానెల్ ప్రారంభించిన రొనాల్డో ఆరు రోజుల్లోనే 50మిలియన్ల సబ్‌స్క్రైబర్ల మార్క్ అందుకున్నాడు. ఈ క్రమంలో అతి తక్కువ సమయంలో 50మిలియన్ల సబ్‌స్క్రైబర్ల మైలురాయి అందుకున్న యూట్యూబర్గా రొనాల్డో రికార్డు కొట్టాడు. కాగా, రొనాల్డో యువర్ క్రిస్టియానో (UR Cristiano) పేరుతో ఆగస్టు 21న యూట్యూబ్ ఛానెల్ ప్రారంభించాడు.