రంజీలో అదరగొట్టిన ప్రముఖ దర్శకుడి కుమారుడు - ఒకే మ్యాచ్​లో సెంచరీ, డబుల్ సెంచరీ!

ఒకే మ్యాచ్​లో సెంచరీ, డబుల్ సెంచరీ బాదిన బాలీవుడ్ దర్శకుడి కుమారుడు!

Agni Chopra Ranji Trophy 2024 : అగ్ని చోప్రా దేశవాళీ క్రికెట్​లో రికార్డుల మీద రికార్డులు నెలకొల్పుతున్నాడు. రంజీల్లో మిజోరంకు ప్రాతినిథ్యం వహిస్తున్న అగ్ని, అరుణాచల్‌ ప్రదేశ్​తో జరిగిన ఒకే టెస్టు మ్యాచ్​లో సెంచరీ, డబుల్​ సెంచరీ చేసి చరిత్ర సృష్టించాడు. దేశవాళీ క్రికెట్​లో ఒకే మ్యాచ్​లో సెంచరీ, డబుల్‌ సెంచరీ చేసిన తొలి ప్లేయర్​గా అగ్ని రికార్డుకెక్కాడు.

భారీ ఇన్నింగ్స్​లతో ప్రత్యర్థి కుదేల్! - అరుణాచల్‌ ప్రదేశ్​తో జరిగిన మ్యాచ్​లో తొలి ఇన్నింగ్స్​లో 110 పరుగులు చేసిన అగ్ని, రెండో ఇన్నింగ్స్​లో 238 పరుగులు చేశాడు. అగ్ని సూపర్‌ శతకాలతో చెలరేగడం వల్ల ఈ మ్యాచ్‌లో మిజోరం 267 పరుగుల తేడాతో ఘన విజయం సాధించింది. ఈ క్రమంలో అగ్నికి 'ప్లేయర్‌ ఆప్‌ ద మ్యాచ్‌' అవార్డు లభించింది.

పరుగుల వరద - 2023-24 రంజీ సీజన్​లో పరుగుల వరద పారించాడు అగ్ని. ఆరు మ్యాచుల్లో 78.25 సగటుతో ఏకంగా 939 పరుగులు బాదాడు. అందులో ఐదు శతకాలు, మూడు హాఫ్ సెంచరీలు ఉన్నాయి. స్ట్రైక్ రేట్ అయితే ఏకంగా 103.30 ఉండడం గమనార్హం. ఓవరాల్​గా 8 లిస్ట్ ఏ మ్యాచులను ఆడిన అగ్ని, 1367 రన్స్ చేశాడు. అందులో 7 సెంచరీలు, 4 అర్ధ శతకాలు ఉన్నాయి.

అవకాశాల కోసం మిజోరం తరఫున - మిచిగాన్​లోని డెట్రాయిట్​లో జన్మించిన అగ్ని చోప్రా గతేడాది మిజోరాం తరఫున రంజీల్లోకి ఎంట్రీ ఇచ్చాడు. ముంబయి ఏజ్ గ్రూప్ లీగ్​లో తన కెరీర్​ను ప్రారంభించిన అగ్ని, ఆ తర్వాత మరిన్ని అవకాశాలను పొందేందుకు మిజోరాంకు మకాం మార్చాడు. 25 ఏళ్ల అగ్ని 2023లో చండీగఢ్​తో జరిగిన లిస్ట్ ఏ మ్యాచ్​లో అరంగేట్రం చేశాడు. అండర్ ప్రెజర్​లోనూ నిలకడగా రాణించడం ఈ యువ ప్లేయర్​లో ఉన్న ప్రత్యేకత. అలాగే బంతిని బలంగా బాదడంలో ఈ లెఫ్ట్ హ్యాండ్ బ్యాటర్ దిట్ట అని చెప్పొచ్చు.

బాలీవుడ్ దర్శకనిర్మాత కుమారుడే అగ్ని - ప్రముఖ బాలీవుడ్ దర్శకుడు, నిర్మాత విధు వినోద్ చోప్రా కుమారుడే అగ్ని చోప్రా. ఇటీవల బ్లాక్ బస్టర్ కొట్టిన '12th ఫెయిల్' సినిమాను తెరకెక్కించింది విధు వినోద్ చోప్రానే. ఈ సినిమాకు నిర్మాత కూడా ఆయనే. అలాగే ఆమిర్ ఖాన్ 'త్రి ఇడియడ్స్', సంజయ్ దత్ 'మున్నాభాయ్ ఎంబీబీఎస్' కు కథను అందించారు. అలాగే నిర్మాతగానూ వ్యవహరించారు. విధు వినోద్ దర్శకుడు, నిర్మాత, రచయితగానూ బాలీవుడ్​లో పేరుపొందారు. అలాగే అగ్ని చోప్రా తల్లి అనుపమ చోప్రాకు బాలీవుడ్​లో మూవీ క్రిటిక్​గా మంచి పేరుంది.