తులసి మాలను ఏ స్వామి భక్తులు ధరిస్తారు? - ఎంతటి పుణ్యం లభిస్తుందో తెలుసా? - Tulsi Mala Benefits

Tulsi Mala Benefits : తులసి మొక్కకు హిందూ మతంలో ఎంతో ప్రాముఖ్యత ఉంది. ఉదయాన్నే తులసి కోటకు పూజచేస్తే అంతా శుభం కలుగుతుందని భక్తులు నమ్ముతారు. అయితే.. తులసి మాల కూడా ధరిస్తారని మీకు తెలుసా? ఆ మాల ఎవరి భక్తులు ధరిస్తారు? దానివల్ల కలిగే ప్రయోజనాలు ఏంటి? అన్నది ఇప్పుడు చూద్దాం.

Tulsi Mala Significance and Rules :హిందూ ధర్మంలో.. తులసి మొక్కను అత్యంత పవిత్రమైన మొక్కగా పరిగణిస్తారు. అయితే.. తులసి మొక్కను పూజించడం అందరికీ తెలుసు. కానీ.. తులసి మాలను ధరిస్తారని చాలా మందికి తెలియదు. ఈ 'తులసి మాల' హారాన్ని పవిత్రమైన తులసి(Tulsi)మొక్క కాండం నుంచి తయారుచేస్తారు. దీనిని ధరించడం వల్ల ఎంతో మేలు జరుగుతుందని పండితులు చెబుతున్నారు. మరి.. ఈ మాల ఏ దేవుడి భక్తులు ఎక్కువగా ధరిస్తారు? దాని ప్రాముఖ్యత ఏంటి? పాటించాల్సిన నియమాలేంటి? అనే వివరాలు ఈ స్టోరీలో తెలుసుకుందాం.

ఎవరు ధరిస్తారు..?

హిందూ పురాణాల ప్రకారం.. తులసి మాల లేదా తులసి జపమాలను శ్రీకృష్ణుని భక్తులు, వైష్ణవులు ధరిస్తారు. ఈ మాలను మెడలో మూడు తంతువులుగా ధరిస్తారు. ఈ దండను విష్ణువు, శ్రీకృష్ణుడికి ప్రియమైనదిగా భావిస్తారు. ఈ మాలను లక్ష్మీదేవి అవతారంగా కూడా భావిస్తారు. తులసి మాల ధరించిన భక్తులు.. భగవంతునికి ప్రియమైన వారుగా ఉంటారని నమ్ముతారు.

తులసి మాల ధరించడం వల్ల కలిగే ప్రయోజనాలు :

• తులసి మాల ధరించడం వల్ల ప్రతికూల శక్తులు, పీడకలలు, ప్రమాదాలు, ఇతర దాడుల నుంచి రక్షణ ఉంటుంద. ఇది ధరించిన వారికి సంపద, అదృష్టం కలిసి వస్తాయని పండితులు చెబుతున్నారు.
• ధ్యానం వంటి ఆధ్యాత్మిక కార్యక్రమాలలో నిమగ్నమైనప్పుడు తులసి మాల ధరించడం వల్ల.. శ్రద్ధ, దృష్టి, ఏకాగ్రత పెరుగుతాయట.
• తులసిలో అడాప్టోజెనిక్ లక్షణాలు ఉంటాయి. ఇవి ఒత్తిడిని, భావోద్వేగాలను సమతుల్యం చేయడంలో ప్రయోజనకరంగా ఉంటాయని వైద్య నిపుణులు కూడా చెబుతారు.
• తులసి మాల ధరించడం వల్ల నాడీ వ్యవస్థపై సానుకూల ప్రభావం చూపి, ఆందోళన స్థాయిలు తగ్గుతాయట.

తులసి మాల ధరించడానికి నియమాలు :

• తులసి మాల ధరించేవారు ముఖ్యంగా నాలుగు సూత్రాలకు కట్టుబడి ఉండాలని పండితులు చెబుతున్నారు.
• మాంసాహారం, జూదం, మత్తు, అక్రమ లైంగిక సంబంధాలు. అనే వాటికి దూరంగా ఉండాలని సూచిస్తున్నారు.
• తులసి మాల ధరించాలనుకునే భక్తులు టీ, కాఫీలకు సైకతం దూరంగా ఉండాలని చెబుతున్నారు.
• అలాగే ఈ మాల ధరించాలనుకునే వారు.. ఆహారం విషయంలో ప్రత్యేక శ్రద్ధ తీసుకోవాలి. ముఖ్యంగా ఉల్లిపాయలు, వెల్లుల్లిని ఉపయోగించిన ఆహారాన్ని తీసుకోకూడదట.
• అన్నిటికన్నా ప్రధానమైన విషయమేమిటంటే.. ఈ మాలను ఒకసారి ధరిస్తే ఎప్పటికీ తీసివేయకూడదట!
• ఈ నియమ నిబంధనలకు కట్టుబడి ఉండేవారు మాత్రమే తులసి మాల ధరించాలని సూచిస్తున్నారు.

Note :పైన తెలిపిన వివరాలు కొందరు జ్యోతిష్యశాస్త్ర నిపుణులు, జ్యోతిష్యశాస్త్రంలో పేర్కొన్న అంశాల ఆధారంగా అందించినవి మాత్రమే. అంతేకానీ, వీటిలో ఎలాంటి శాస్త్రీయ ఆధారాలు లేవనే విషయాన్ని పాఠకులు గమనించాలి. దీన్ని ఎంతవరకూ విశ్వసించాలి అనేది పూర్తిగా మీ వ్యక్తిగత విషయం.