Maha shivratri Special Sweet Recipes : హిందూవులకు ఎంతో పవిత్రమైన పండుగలలో మహా శివరాత్రి ఒకటి. కాగా ఈ ఏడాదిమహా శివరాత్రిమార్చి 8 తేదీన వచ్చింది. శివలింగాలకు అభిషేకం, ఉపవాసం, జాగరణ, శివనామస్మరణతో శైవ క్షేత్రాలు మార్మోగుతాయి. అయితే ఈ రోజున ఆ పరమ శివుడికి అరటి, ద్రాక్ష వంటి వివిధ రకాల పండ్లను నైవేద్యంగా సమర్పించడంతో పాటు, కొన్నిరకాల స్వీట్లనుకూడా పెట్టవచ్చు. మరి మీరు కూడా పండగ నాడు స్వామి వారికి వేటిని నైవేద్యంగా పెట్టాలని ఆలోచిస్తున్నారా ? అయితే ఈ కథనం మీ కోసమే! మంచి రుచికరమైన ఆ స్వీట్‌ వంటకాలు ఏంటో ఇప్పుడు చూద్దాం.
అంజీర్‌ బర్ఫీ :
అంజీర్‌ బర్ఫీ తయారు చేయడానికి కావాల్సిన పదార్థాలు :
- అంజీర్‌ - 12
- ఖర్జూరపండ్లు - 15
- నెయ్యి - 4 టేబుల్‌ స్పూన్లు
- బాదం, జీడిపప్పు, పిస్తా పలుకులు - అరకప్పు
- యాలకుల పొడి - పావు చెంచా
అంజీర్‌ బర్ఫీ తయారు చేయు విధానం :
- ముందుగా అంజీర్‌, ఖర్జూరాలను కడిగి, మూడు గంటలు విడివిడిగా నానబెట్టాలి. ఈ రెండింటిలో కూడా స్వీట్‌ ఉంటుంది కాబట్టి, షుగర్‌ వేయాల్సిన అవసరం లేదు.
- ఇప్పుడు అంజీర్‌ను నీటి నుంచి తీసి గ్రైండ్‌ చేయాలి. అలాగే ఖర్జూర పండ్లలో గింజలు తీసేసి వాటిని కూడా గ్రైండ్‌ చేయాలి.
- ఆ తర్వాత స్టవ్ మీద కడాయి పెట్టి అందులో 4 టేబుల్‌ స్పూన్లు నెయ్యి వేయండి.
- ఇప్పుడు వేడిగా ఉండే నెయ్యిలో బాదం, జీడిపప్పు, పిస్తా పలుకులు, పండ్ల గుజ్జు, యాలకుల పొడి వేసి కలియ తిప్పుతూ వేయించాలి.
- ఈ మిశ్రమం చిక్కబడి, మంచి సువాసన వస్తున్నప్పుడు దించేయాలి.
- ఇప్పుడు వెడల్పయిన పళ్లెంలో కొద్దిగా నెయ్యి రాసి, పండ్ల మిశ్రమాన్ని సమంగా సర్దాలి. అంతే నచ్చిన ఆకృతిలో కట్‌ చేసుకుంటే అంజీర్‌ బర్ఫీ సిద్ధం.
అనాస కేసరి (Pineapple kesari) :
అనాస కేసరి తయారు చేయడానికి కావాల్సిన పదార్థాలు :
- ఉప్మారవ్వ- అర కప్పు
- పంచదార - అర కప్పు
- అనాస ముక్కలు - కప్పు
- నెయ్యి - 4 టేబుల్‌ స్పూన్లు
- జీడిపప్పు - 16
- కిస్‌మిస్‌ - కొన్ని
- యాలకుల పొడి - పావు చెంచా
- కుంకుమ పువ్వు - కాస్త
- ఎల్లో ఫుడ్ కలర్ - చిటికెడు
- పైనాపిల్‌ ఎసెన్స్‌ - కొద్దిగా
అనాస కేసరి తయారు చేయు విధానం :
- ముందుగా మందపాటి పాత్రలో అనాస ముక్కలు, పంచదార వేసి కప్పున్నర నీళ్లతో ఉడికించాలి.
- ఇప్పుడు పంచదార కరిగి, ముక్కలు మెత్తగా అయ్యాక కుంకుమ పువ్వు, ఫుడ్ కలర్, పైనాపిల్‌ ఎసెన్స్‌ వేసి బాగా కలిపి నిమిషం తర్వాత దించేయాలి.
- ఇప్పుడు మరొక కడాయిలో నెయ్యి వేసి జీడిపప్పు, ఉప్మారవ్వ, యాలకుల పొడి వేసి వేయించాలి.
- అవి బంగారు రంగులోకి మారగానే కిస్‌మిస్‌, పైనాపిల్‌ మిశ్రమాన్ని యాడ్‌ చేయండి.
- ఈ మిశ్రమం ఉండలు కట్టకుండా కలియ తిప్పుతూ ఉడికించి, నాలుగు నిమిషాల తర్వాత దించేయాలి.
- అంతే ఎంతో టేస్టీగా ఉండే చిక్కటి పైనాపిల్‌ కేసరి రెడీ.
బాదం హల్వా :
బాదం హల్వా తయారు చేయడానికి కావాల్సిన పదార్థాలు :
- బాదంపప్పు - అర కిలో
- పంచదార - కప్పున్నర
- పాలు - రెండు కప్పులు
- నెయ్యి - అర కప్పు
- యాలకుల పొడి - పావు చెంచా
- కుంకుమపువ్వు - కొద్దిగా
- ఫుడ్ కలర్ - రెండు చుక్కలు
బాదం హల్వా తయారు చేయు విధానం :
- ముందుగా అర కప్పు పాలలో కుంకుమపువ్వు వేసి మరిగించి శాఫ్రన్‌ మిల్క్‌ను రెడీ చేసి పక్కనుంచుకోవాలి.
- ఇప్పుడు రెండు గంటలు నానబెట్టిన బాదంపప్పును, ఒక నిమిషం వేడి నీళ్లలో వేసి తీస్తే, పొట్టు తీయడం తేలికవుతుంది.
- ఆ బాదంపప్పులకు కొన్ని పాలు జతచేసి గ్రైండ్‌ చేయాలి.
- ఇప్పుడు కడాయిలో కాస్త నెయ్యి, బాదం మిశ్రమం వేసి సన్న సెగ మీద కలియబెడుతూ ఉడికించాలి.
- తర్వాత అందులో మిగిలిన పాలు, నెయ్యి, పంచదార, యాలకుల పొడి, ఫుడ్ కలర్ వేసి అడుగంటకుండా మిశ్రమాన్ని బాగా తిప్పుతూ ఉడికించాలి.
- చివర్లో శాఫ్రన్‌ మిల్క్‌ యాడ్‌ చేసి ఇంకో నిమిషం ఉంచి, దించేస్తే సరిపోతుంది. అంతే వారెవా అనిపించే బాదం హల్వా తయారైపోతుంది.
కార్తికమాసం స్పెషల్ - ఉసిరి-గోధుమరవ్వ పులిహోరతో స్వామివారికి నైవేద్యం పెట్టండి!
పెసర పప్పుతో అధిక బరువుకు చెక్.. ఈ డిఫరెంట్ వంటకాలు ట్రై చేస్తారా?
