తిరుమల 'పాండవ తీర్థం'- ఒక్కసారి స్నానం చేస్తే చాలు- అన్నింటా విజయం తథ్యం!

తిరుమల క్షేత్రంలోని పవిత్ర 'పాండవ తీర్థం'- ఒక్కసారి స్నానమాచరిస్తే చాలు - అన్నింటా విజయం గ్యారెంటీ!

Tirumala Pandava Theertham :పరమ పవిత్రమైన తిరుమల గిరులలో ఎన్నో పుణ్య తీర్థాలు ఉన్నాయి. ఈ తీర్ధాల గురించి క్షుణ్ణంగా తెలుసుకోవడం వల్ల తిరుమల యాత్రలో భాగంగా ఈ తీర్థాలను కూడా దర్శించుకోవచ్చు. తిరుమల పరిసర ప్రాంతాలలో ఉన్న ఓ పుణ్య తీర్థంలో స్నానం చేస్తే విజయాలు ప్రాప్తిస్తాయని అంటారు. ఈ కథనంలో ఆ తీర్థ విశేషాలను తెలుసుకుందాం.

పుణ్యతీర్ధాల సమాహారం
తిరుమల శ్రీ వేంకటేశ్వరుడు కొలువైన పరమ పవిత్రమైన పుణ్యక్షేత్రం తిరుమల ఎన్నో తీర్థాల సమాహారంగా కనిపిస్తుంది. తిరుమల పరిసర ప్రాంతాలలో 'కుమారధార తీర్థం' 'సనక సనందన తీర్థం', 'తుంబుర తీర్థం'. 'జాబాలీ తీర్థం', 'పాపనాశన తీర్థం', 'పాండవ తీర్థం' ఇలా ఎన్నో పవిత్ర తీర్ధాలతో తిరుమల విరాజిల్లుతోంది. ఒక్కో తీర్థంకు ఒక్కో ప్రత్యేకత ఉంది.

పాండవ తీర్థం
తిరుమల గిరులలో వెలసిన పాండవ తీర్థంలో స్నానమాచరించడం వల్ల, సమస్త పాపాలు నశించి, సకల విజయాలు చేకూరతాయని వేంకటాచల మహాత్యం వంటి ఆధ్యాత్మిక గ్రంథాలు చెబుతున్నాయి.

పాండవ తీర్థం విశిష్టత
తిరుమల శ్రీనివాసుని ఆలయానికి ఈశాన్య దిశలో మైలు దూరంలో ఉన్న పాండవ తీర్థం ఉంది. ఈ తీర్థానికి గోగర్భ తీర్థమని పేరుంది.

స్థల పురాణం
పాండవులు వనవాసం చేస్తున్నప్పుడు, ఈ తీర్థంలో కొంతకాలం పాటు స్నానమాచరించమని శ్రీకృష్ణుడు చెప్పాడట. ఆ విధంగా చేయడం వల్ల విజయం చేకూరుతుందని సెలవిచ్చాడు. దాంతో పాండవులు ఏడాది పాటు ఈ తీర్థం సమీపంలోనే నివాసం ఏర్పాటు చేసుకుని, అందులో స్నానం చేస్తూ వచ్చారట. ఈ కారణంగానే ఆ తరువాత పాండవులు యుద్ధంలో విజయాన్ని సాధించి రాజ్యాన్ని పొందారు. పాండవుల ధర్మబద్ధమైన కోరిక నెరవేర్చిన తీర్థం కావడం వల్ల, ఈ తీర్థానికి 'పాండవ తీర్థం' అనే పేరు వచ్చిందని స్థలపురాణం చెబుతోంది.

పురాణ ప్రాశస్త్యం
తిరుమల శ్రీవారి ఆలయానికి సుమారు 2 కి.మీ దూరంలో ఉన్న ఈ పాండవ తీర్థంలో పాండవులు ఏడాదిపాటు స్నానం ఆచరించిన ఫలం వల్ల పాండవులకు సమర విజయం, రాజ్య ప్రాప్తి కలిగిందని వరాహపురాణం ద్వారా తెలుస్తోంది. అలాగే జ్ఞాతులయిన కౌరవులను చంపడం వల్ల కలిగిన పాపాన్ని పాండవులు ఈ తీర్థ స్నానం వల్ల పోగొట్టుకున్నారని పద్మ పురాణం వివరిస్తోంది.

పాండవ తీర్థంలో ఎప్పుడు స్నానం చేయాలి
పాండవ తీర్థంలో ఏడాది మొత్తం భక్తులు స్నానాలు చేస్తూనే ఉన్నప్పటికినీ వైశాఖమాసంలో శుక్లపక్ష ద్వాదశి, ఆదివారం కలిసి వచ్చిన రోజు లేదా కృష్ణ పక్ష ద్వాదశి మంగళవారం కలిసి వచ్చిన రోజు స్నానం చేయటం సకల శ్రేష్ఠం అని శాస్త్రం చెబుతోంది.

తిరుమల యాత్రకు వెళ్లే వారు పాండవ తీర్థం కూడా దర్శించి. ఈ తీర్థంలో స్నానం చేస్తే వృత్తి ఉద్యోగాలు, చేపట్టిన పనుల్లో ఎలాంటి ఆటంకాలు ఉండవని, అన్నింటా విజయాలు చేకూరుతాయని విశ్వాసం. ఈసారి తిరుమల వెళ్లినప్పుడు మనం కూడా పాండవ తీర్థాన్ని దర్శించి పవిత్ర స్నానం చేద్దాం సకల విజయాలు పొందుదాం. ఓం నమో వేంకటేశాయ!

ముఖ్య గమనిక : పైన తెలిపిన వివరాలు కొందరు నిపుణులు, వివిధ శాస్త్రాల్లో పేర్కొన్న అంశాల ఆధారంగా అందించినవి మాత్రమే. వీటిలో అన్నిటికీ ఆధునిక శాస్త్రీయ ఆధారాలు లేకపోవచ్చుననే విషయాన్ని పాఠకులు గమనించాలి. దీన్ని ఎంతవరకు విశ్వసించాలనేది పూర్తిగా మీ వ్యక్తిగత విషయం.