How to Do Perform Gopuja in Sravana Masam:శ్రావణ మాసం వచ్చిదంటే ప్రతి ఇంట్లో సందడే సందడి. పెళ్లిళ్లు, ఫంక్షన్లతో ఈ నెల మొత్తం కోలాహలంగా మారుతుంది. ఇక ముత్తైదువులు మంగళగౌరీ వ్రతం, శ్రావణ శుక్రవారం వ్రతం ఆచరిస్తూ ఇంటికి కొత్త శోభను తెస్తారు. అలాగే లక్ష్మీదేవి అనుగ్రహం కోరుతూ పూజలు నిర్వహిస్తారు. గ్రామదేవతలకు బోనాలు చెల్లిస్తారు. ఇలా ఒక్కటేమిటి శ్రావణం మొదలు నెలంతా ఏదో ఒక పండగలు ఉంటూనే ఉంటాయి. అయితే.. శ్రావణ మాసంలో కేవలం లక్ష్మీదేవిని మాత్రమే కాకుండా గోపూజ కూడా చేయాలని.. గోమాతలను పూజించడం వల్ల కోరిన కోర్కెలు తొందరలోనే నెరవేరతాయని ప్రముఖ జ్యోతిష్యులు మాచిరాజు కిరణ్ కుమార్ చెబుతున్నారు. అలానే గోపూజ ఎలా చేసుకోవాలో కూడా ఆయన వివరిస్తున్నారు. ఆ విధానం ఏంటో ఈ స్టోరీలో చూద్దాం..
గోపూజ వెనక కారణాలు: శ్రావణమాసంలో లక్ష్మీదేవిని మాత్రమే కాకుండా గోపూజ చేయడమనేది విశేషమైన ఫలితాలను అందిస్తుందని మాచిరాజు కిరణ్ కుమార్ చెబుతున్నారు. ఎందుకంటే దేవతలు, దానవులు పాల సముద్రాన్ని చిలికినప్పుడు ఆ పాల సముద్రం నుంచి లక్ష్మీదేవి ఉద్భవించిందని తెలిసిందే. అయితే ఆ సమయంలో లక్ష్మీదేవితోపాటుగా నంద, సుభద్ర, సుశీల, సురభి, బహుళ అనే 5 గోవులు కూడా వచ్చినట్లు భవిష్య పురాణం చెబుతోందని ఆయన చెబుతున్నారు. కాబట్టి లక్ష్మీ కటాక్షం సంపూర్ణంగా కలగాలంటే అమ్మవారితో పాటు గోవులను కూడా పూజించాలని వివరిస్తున్నారు. శ్రావణ మాసంలో ముహూర్తంతో సంబంధం లేకుండా ఏరోజైనా ప్రత్యేకంగా గోపూజ చేస్తే అమ్మవారి సంపూర్ణ అనుగ్రహం లభిస్తుందని చెబుతున్నారు.
శ్రావణమాసంలో గోపూజ ఎలా చేయాలంటే:ఇంటి ముందు గోవు వచ్చినా లేదంటే దగ్గరలోని గోశాలకు వెళ్లైనా గోమాతకు పూజ చేయవచ్చు.
- ముందుగా గోవు తోకకు పసుపు రాసి కుంకుమ బొట్లు పెట్టాలి.
- ఆ తర్వాత గోవు పాదాలకు తెల్ల పూలు, జిల్లేడు పుష్పాలతో పూజ చేస్తూ "ఓం సురభ్యే నమః" అనే మంత్రాన్ని 21 సార్లు జపించాలి.
- అనంతరం గోమాతకు అర్ఘ్యం సమర్పించాలి. అంటే రాగి చెంబులో నీళ్లు తీసుకుని అందులో అక్షింతలు, పూలు వేసి ఆ నీటిని గోవు పాదాల మీద పడే విధంగా అర్ఘ్యం సమర్పించాలి.
- ఆ తర్వాత గోవుకు ఆహారాన్ని తినిపించాలి. అంటే గడ్డి లేదా పచ్చి ఆకుకూరలు లేదా అరటి పండ్లు వంటి వాటిని తినిపించి.. గోమాత చుట్టూ 3 లేదా 9 లేదా 11 ప్రదక్షిణలు చేయాలి. దీంతో గోపూజ పూర్తయినట్లే.