ఎమ్మెల్యే, ఎంపీ అభ్యర్థులతో టీడీపీ వర్క్ షాప్ - TDP workshop with MLA MP candidates

TDP workshop with MLA MP candidates: విజయవాడలోని ఎ కన్వెన్షన్​లో ఈ రోజు ఉదయం 10 గంటల నుంచి మధ్యాహ్నం 1.30 గంటల వరకు వర్క్ షాప్ జరుగుతుంది. ఈ కార్యక్రమంలో తెలుగుదేశం అధినేత నారా చంద్రబాబునాయుడు స్వయంగా పాల్గొంటారు. ఎన్నికల ప్రవర్తనా నియమావళి, అభ్యర్థులకు ఉండే హక్కులు, అధికార పార్టీ కుట్రలు వంటి అంశాలపై ఎంపీ, ఎమ్మెల్యే అభ్యర్థులకు అవగాహన కల్పిస్తారు.

TDP workshop with MLA MP candidates: సార్వత్రిక ఎన్నికల కోసం తెలుగుదేశం పార్టీ, జనసేన, భారతీయ జనతా పార్టీ సిద్దం అవుతున్నాయి. ఇప్పటికే టీడీపీ, జనసేన అభ్యర్థులను ప్రకటించాయి. మరోవైపు బీజేపీ సైతం అభ్యర్థుల ప్రకటనపై కసరత్తు చేస్తోంది.షెడ్యూల్ విడుదలతో కోడ్ అమల్లోకి వచ్చింది. ఈ సందర్భంగా ఎన్నికల వ్యూహాలను చర్చించేందుకు అభ్యర్థులతో తెలుగుదేశం పార్టీ అధ్వర్యంలో విజయవాడలో వర్క్ షాప్​ను నిర్వహిస్తోంది.

తెలుగుదేశం అధినేత నారా చంద్రబాబు నాయుడ అధ్వర్యంలో విజయవాడలోని ఎ కన్వెన్షన్​లో ఈ రోజు ఉదయం 10 గంట లనుంచి మధ్యాహ్నం 1.30 గంటల వరకు ఈ వర్క్ షాప్ జరుగుతుంది. ఈ వర్క్ షాప్​నకు తెలుగు దేశం పార్టీ నుంచి లోక్ సభ, అసెంబ్లీకి అభ్యర్థులుగా ప్రకటించిన వారితో పాటు ఇతర నియోజకవర్గాల్లోని ఇంచార్జ్ లు కూడా పాల్గొంటారు. అభ్యర్థులతో పాటు ఎన్నికల కోసం వారు ప్రత్యేకంగా నియమించుకున్న నలుగురు మేనేజర్లు కూడా ఈ వర్క్ షాప్​కు హాజరు అవుతారు. ఎన్నికల ప్రవర్తనా నియమావలి, అభ్యర్థులకు ఉండే హక్కులు, అధికార పార్టీ కుట్రలు వంటి అంశాలపై ప్రధానంగా చర్చ జరగుతుంది. ఎన్నికల్లో ప్రచారం, నామినేషన్ల దాఖలు వంటి అంశాలపైనా వర్క్ షాప్​లో చర్చిస్తారు. మొత్తం ఎన్నికల ప్రక్రియలో అభ్యర్థులు అనుసరించాల్సిన పద్దతులను, వ్యూహాలను ఈ సమావేశంలో వివరిస్తారు.

చంద్రబాబు స్వయంగా దీనిపై ప్రజెంటేషన్ ఇస్తారు. జనసేన, బీజేపీల నుంచి ఆ పార్టీల రాష్ట్ర స్థాయి నాయకులు కూడా ఒక్కొక్కరు చొప్పున ఈ వర్క్ షాప్​లో పాల్గొంటారు. ఉదయం వర్క్ షాప్ ను ఉద్దేశించి టీడీపీ అధినేత చంద్రబాబు ప్రసంగం ఉంటుంది. ఎన్నికల్లో గెలుపు కోసం ఎలాంటి చర్యలు చేపట్టాలి, అధికార పార్టీ ఆగడాలను ఎలా ఎదుర్కొవాలి అనే అంశంపై పార్టీ ఎమ్మెల్యే, ఎంపీ అభ్యర్థులకు శిక్షణ ఇస్తారు. ఆయా నియోజకవర్గాల్లోని రాజకీయ పరిస్థితులు, వాటిని ఎలా ఎదుర్కొవాలనే అంశంపై సలహలు సూచనలు చేస్తారు.