అక్కడ గెలిస్తే ఫేటే మారిపోతుంది - మరి ఈటల భవిష్యత్ కూడా బంగారమేనా? - Etela Rajender Won Malkajgiri MP SEAT

Malkajgiri Lok Sabha Seat : ఆ లోక్​సభ నియోజకవర్గం 2009లో ఏర్పడింది. అయితే అక్కడ ఎవరు గెలిచినా సరే రాజకీయంగా అత్యున్నత శిఖరాలను అధిరోహిస్తారనే నమ్మకం ఉంది. ఇప్పటివరకు అలానే గెలుపొందిన అభ్యర్థులు రాజకీయంగా ఉన్నతంగా నిలదొక్కుకున్నారు. ఆ స్థానమే మల్కాజిగిరి లోక్​సభ నియోజకవర్గ స్థానం. దేశంలోనే అత్యధిక ఓటర్లు ఉన్న నియోజకవర్గమే కాకుండా అక్కడ ఎవరు పోటీ చేసిన రాజకీయంగా భవిష్యత్​లో శిఖరాగ్రానికి చేరుతున్నారు. అందుకే ఆ స్థానం కోసం చాలా మంది పోటీ పడుతూ ఉంటారు. మరి ఈసారి అక్కడ బరిలో దిగి విజయఢంకా మోగించిన బీజేపీ నేత ఈటల రాజేందర్ భవిష్యత్ ఎలా ఉండబోతోంది?

BJP Leader Etela Rajender Wins Malkajgiri MP Seat : దేశంలో జరిగిన 2024 సార్వత్రిక ఎన్నికల్లో అందరి చూపు మల్కాజిగిరి లోక్​సభ నియోజకవర్గం మీదే ఉండే ఉంటుంది. ఎందుకంటే దేశంలోనే అత్యధిక ఓటర్లు ఉన్న స్థానం. ఇక్కడ 37,79,596 మంది ఓటర్లు ఉన్నారు. వారు ఎటువైపు మొగ్గుచూపితే ఆ గెలుపొందిన అభ్యర్థి అత్యధిక మెజారిటీని సాధిస్తారు. అయితే ఇక్కడ పోటీ చేసి గెలుపొందిన అభ్యర్థి ఆ తర్వాత కాలంలో రాజకీయంగా ఉన్నత పదవులు సాధించడం ఆనవాయితీగా వస్తుంది. 2009లో పార్లమెంటు నియోజకవర్గంగా ఏర్పడిన దగ్గర నుంచి ఇప్పటివరకు ఎంతమంది అభ్యర్థులు గెలిచారో? వారు ఏ స్థానాల్లో ఉన్నారో? తెలుసుకుందాం.

మొట్టమొదటిసారి లోక్​సభ నియోజకవర్గం ఏర్పడిన తర్వాత 2009లో జరిగిన ఎన్నికల్లో కాంగ్రెస్​ అభ్యర్థి సర్వే సత్యనారాయణ ఈ స్థానం నుంచి గెలుపొందారు. ఆ తర్వాత ఆయన రాజకీయంగా ఎదిగారు. 2012-14 వరకు కేంద్రమంత్రిగా బాధ్యతలు నిర్వహించారు.

మంత్రిగా మల్లారెడ్డి : 2014లో తెలుగుదేశం తరఫున రాజకీయ అరంగేట్రం చేసిన మాజీ మంత్రి మల్లారెడ్డి అక్కడి నుంచి ఎంపీగా గెలుపొంది. పార్లమెంటులో అడుగుపెట్టారు. ఆ తర్వాత బీఆర్​ఎస్​లో చేరారు. 2018లో జరిగిన శాసనసభ ఎన్నికల్లో బీఆర్​ఎస్​ పార్టీ నుంచి మేడ్చల్​ అసెంబ్లీ నుంచి గెలిచి మంత్రి పదవిని పొందారు.

సీఎంగా రేవంత్​ రెడ్డి : 2014 తర్వాత జరిగిన 2019 లోక్​సభ ఎన్నికల్లో 2018లో కొడంగల్​ నియోజకవర్గం నుంచి పరాజయం పాలైన రేవంత్​ రెడ్డి మల్కాజిగిరి నుంచి పోటీ చేశారు. ఈసారి ఆయనను మల్కాజిగిరి ఆదుకుందనే చెప్పాలి. ఎందుకంటే 2019లో లోక్​సభ స్థానం నుంచి కాంగ్రెస్​ తరఫున పోటీ చేసి అత్యధిక ఓట్లతో గెలిచారు. ఆ తర్వాత పీసీసీ అధ్యక్షుడు పదవి పొంది 2023 శాసనసభ ఎన్నికలో ఏకంగా తెలంగాణ రాష్ట్రానికి ముఖ్యమంత్రి అయ్యారు.

మరి రాజేందర్​ పరిస్థితి ఏంటి ? : ఇది మల్కాజిగిరి లోక్​సభ నియోజకవర్గానికి ఉన్న సత్తా. అయితే ఇప్పుడు 2024 లోక్​సభ ఎన్నికల్లో అదే స్థానం నుంచి బీజేపీ తరఫున ఈటల రాజేందర్​ పోటీ చేశారు. భారీ మెజార్టీతో ఎంపీగా గెలుపొందారు. అంతకు ముందు 2023లో జరిగిన హుజూరాబాద్​ ఎమ్మెల్యేగా పోటీ చేసి ఓటమిని చవిచూశారు. ఇప్పుడు మళ్లీ మల్కాజిగిరి లోక్​సభ స్థానంలో పోటీ చేసి గెలుపొందారు. మరి పాత ఆనవాయితీ ప్రకారం ఈటల రాజేందర్​ కూడా ఉన్నత పదవులను అధిరోహిస్తారని కొందరు రాజకీయ విశ్లేషకులు తెలుపుతున్నారు. ఈసారి తెలంగాణ నుంచి కేంద్ర మంత్రి వర్గంలో ఎవరు ఉంటారు? ఈటల రాజేందర్​కి కేంద్రమంత్రి పదవి వస్తుందా అనేది రాజకీయవర్గాల్లో చర్చ నడుస్తోంది.