AP Election Results 2024: ఆంధ్రప్రదేశ్లో తెలుగుదేశం కూటమి సునామీ సృష్టించింది. 164 స్థానాలతో ప్రభంజనం సృష్టించింది. వైనాట్ 175 అంటూ విర్రవీగిన వైఎస్సార్సీపీ బొక్కబోర్లా పడింది. మూడు పార్టీలు మూకుమ్మడిగా ఫ్యాన్‌ రెక్కలు విరిగ్గొట్టి పక్కన పడేశాయి. సింహం సింగిల్‌గా వస్తుందంటూ సవాళ్లు చేసిన జగన్‌కు, ఆయన పార్టీకి అసెంబ్లీలో ప్రతిపక్ష హోదా కూడా లేకుండా గల్లంతు చేశారు. పేదల ముసుగేసుకున్న పెత్తందారీ జగన్‌ను తరిమికొట్టారు.
రాష్ట్ర అసెంబ్లీ ఎన్నికల్లో కనీవినీ ఎరుగని ఏకపక్ష విజయం నమోదైంది. తెలుగుదేశం, జనసేన, బీజేపీ కూటమి తిరుగులేని విజయంతో చరిత్ర సృష్టించింది. వైనాట్ 175 అంటూ తలెగరేసిన వైఎస్సార్సీపీను సకలజనులూ నేలకేసికొట్టారు. ఉద్యోగులు ఉతికారేశారు! టీచర్లు గుణపాఠం చెప్పారు. అంగన్వాడీలు బెత్తం ఎత్తారు. ల్యాండ్‌ టైటిలింగ్ చట్టంతో చెలగాటంఆడినందుకు రైతులు వైఎస్సార్సీపీ గుండెల్లో గునపాలు దించారు. ఉచిత ఇసుక తీసేసిన పాపానికి జగన్ ప్రభుత్వాన్ని భవన నిర్మాణ కార్మికులు కుప్పకూల్చారు. నిరుద్యోగులు నిలువునా పాతరేశారు. అక్కాచెల్లెళ్లు చీదరించుకున్నారు. అవ్వాతాతలు ఎగ్జిట్‌ బటన్‌ నొక్కేశారు. అధికార మదంతో మూసుకుపోయిన వైఎస్సార్సీపీ కళ్లు తెరిపించేలా 175 అసెంబ్లీ స్థానాలకుగాను కూటమి ఒక్కటే 165 స్థానాలు కైవసం చేసుకుంది.
తెలుగుదేశం ఒక్కటే సొంతంగా 135 స్థానాలు గెలుచుకుని అసెంబ్లీలో అతిపెద్ద పార్టీగా అవతరించింది. జనసేన పోటీ చేసిన 21 సీట్లలోనూ సత్తాచాటింది. పోటీ చేసిన అన్ని స్థానాల్లో జయభేరి మోగించిన పార్టీగా రికార్డ్‌ సృష్టించింది. వంద శాతం స్ట్రైక్‌ రేట్‌తో, శాససనభలో రెండో పెద్ద పార్టీగా జనసేన అవతరించింది. పది స్థానాల్లో పోటీ చేసిన బీజేపీ కూడా కూటమి పార్టీల మద్దతుతో అనూహ్యంగా 8 అసెంబ్లీ స్థానాలు ఖాతాలో వేసుకుంది. ఏపీ అసెంబ్లీలో బీజేపీ ఇన్ని అసెంబ్లీ స్థానాలు గెలవడం ఇదే తొలిసారి. ఇక అధికార వైఎస్సార్సీపీ కేవలం 11 సీట్లకే పరిమితమై ఘోర ఓటమిని మూటగట్టుకుంది. కలలోనైనా ఊహించని పరాజయంతో ఫలితాల పట్టికలో వైఎస్సార్సీపీ మూడో స్థానానికి పడిపోయింది. ప్రతిపక్ష హోదాకు కావాల్సిన 18 స్థానాలు కూడా గెలుచుకోలేక చతికలపడింది.
వైఎస్సార్సీపీ అడ్రస్‌ గల్లంతు :సునామీ వస్తే ఊళ్లకు ఊళ్లు గల్లంతైనట్లే ఈ ఎన్నికల్లో వైఎస్సార్సీపీ అడ్రస్‌ కూడా గల్లంతైంది. జిల్లాలకు జిల్లాలను కూటమి క్లీన్‌ స్వీప్‌ చేసింది. మొత్తం 8 ఉమ్మడి జిల్లాల్లో..వైఎస్సార్సీపీ కనీసం ఖాతా తెరవలేకపోయింది. ఉమ్మడి విజయనగరం, శ్రీకాకుళం, ఉమ్మడి గోదావరి, కృష్ణా, గుంటూరు, నెల్లూరు, అనంతపురం జిల్లాలను స్వీప్‌ చేసిన కూటమి వైఎస్సార్సీపీను చావుదెబ్బ కొట్టింది. జగన్ సొంత జిల్లా కడపలో మాత్రమే మూడు స్థానాలు దక్కించుకుని వైఎస్సార్సీపీ కాస్త పరువు నిలుపుకోగలిగింది. పులివెందులలో జగన్ గెలిచినా, మెజార్టీ పడిపోయింది. 61 వేల 176 ఓట్ల ఆధిక్యంతో గెలిచిన జగన్ 2019 ఎన్నికలతో పోల్చితే 28 వేల ఓట్ల మెజారిటీ కోల్పోయారు.