నీతిఆయోగ్ భేటీని రేవంత్‌ బహిష్కరిస్తున్నప్పుడు కాంగ్రెస్ హైకమాండ్ సమాధానం ఏంటి?: కేటీఆర్‌ - KTR On Niti Aayog Meeting Boycott

Telangana Govt Boycott Niti Aayog Meeting : నీతి అయోగ్ సమావేశాలకు హాజరుకాబోమని ఇటీవల ప్రకటించిన సీఎం రేవంత్ రెడ్డి నిర్ణయంపై ఎక్స్ వేదికగా మాజీ మంత్రి కేటీఆర్ ప్రశ్నించారు. గతంలో కేసీఆర్ నిర్ణయాన్ని తప్పుబట్టిన కాంగ్రెస్ పార్టీ, నీతి అయోగ్ సమావేశాన్ని రేవంత్ రెడ్డి స్వయంగా బహిష్కరిస్తున్నప్పుడు ఆ పార్టీ ఏం చెబుతుందని ప్రశ్నించారు.

KTR Tweet on CM Revanth About Niti Aayog Meeting Boycott : కేంద్ర బడ్జెట్​కు నిరసనగా ఈ నెల 27న జరగనున్న నీతి అయోగ్ సమావేశాలకు దూరంగా రాష్ట్ర ప్రభుత్వం తీసుకున్న నిర్ణయంపై మాజీ మంత్రి, బీఆర్ఎస్ వర్కింగ్ ప్రెసిడెంట్​ కేటీఆర్ ఎక్స్​ వేదికగా స్పందించారు. తెలంగాణ ఆత్మగౌరవానికి సంబంధించిన న్యాయమైన సమస్యల కోసం గతంలో సీఎంగా ఉన్న సమయంలో కేసీఆర్ ప్రధానితో సమావేశాలను బహిష్కరిస్తే, కాంగ్రెస్ తప్పుబట్టిందని గుర్తుచేశారు.

గతంలో భేటీకి వెళ్లకున్నా బీఆర్ఎస్​, బీజేపీతో కలిశామని ఆరోపించారని ధ్వజమెత్తారు. సమావేశాలకు కేసీఆర్ దూరంగా ఉండటానికి ఆ రెండు పార్టీలు కుమ్మక్కు కావటమే కారణమంటూ విమర్శించారని పేర్కొన్నారు. మరి ఇప్పుడు ముఖ్యమంత్రి రేవంత్ రెడ్డే స్వయంగా నీతి అయోగ్ సమావేశాన్ని బహిష్కరిస్తే కాంగ్రెస్ ఏం సమాధానం చెబుతుందని ఎక్స్ వేదికగా ప్రశ్నించారు. చోటా భాయ్ రేవంత్​రెడ్డి, ప్రధానమంత్రిని కలవాలని, రాష్ట్రానికి సంబంధించిన బడ్జెట్ సమస్యల గురించి మాట్లాడాలని ఎందుకు అనుకోవడం లేదన్నారు.