Slogans In Elections :ఎన్నికలేవైనా సరే ఓటర్లకు చేరువ కావాలంటే జనంలోకి వేగంగా వెళ్లాలని రాజకీయ పార్టీలు భావిస్తాయి. అయితే, సుదీర్ఘ ప్రసంగాల కంటే సింగిల్‌ లైన్‌లో చెప్పే స్లోగన్స్ ప్రజలను ఎక్కువగా ఆకర్షిస్తాయి. ఈ సార్వత్రిక ఎన్నికల్లో గెలిచి సరికొత్త చరిత్ర సృష్టించాలని బీజేపీ నేతృత్వంలోని ఎన్డీయే కూటమి భావిస్తోంది. స్వతహాగా బీజేపీనే 370 స్థానాల్లో గెలవాలని లక్ష్యంగా పెట్టుకుంది. కూటమిగా 400 సీట్లు సాధిస్తామని ప్రధాని మోదీ, కేంద్ర హోం మంత్రి అమిత్ షా సహా బీజేపీ నేతలు ధీమా వ్యక్తం చేస్తున్నారు. తమ లక్ష్యాలను ప్రజల్లోకి స్పష్టంగా తీసుకెళ్లేలా "అబ్‌కీ బార్ చార్‌సౌ పార్‌" నినాదంతో విస్తృత ప్రచారం చేస్తున్నారు.
2019లో అలా!
2019 ఎన్నికల్లోనూ బీజేపీ "ఫిర్‌ ఏక్‌ బార్ మోదీ సర్కార్‌" స్లోగన్‌తో ఎన్నికలకు వెళ్లి ఘన విజయం సాధించింది. పదేళ్ల కాంగ్రెస్‌ను గద్దె దించి 2014లో మోదీ నేతృత్వంలోని ఎన్డీయే సర్కారు అధికారంలోకి వచ్చింది. ఆ ఎన్నికల సమయంలో అప్పటి యూపీఏ పాలనలో లోపాలు, కుంభకోణాలను ఎత్తిచూపుతూ "అచ్చే దిన్‌ ఆనే వాలా హై" మంచి రోజులు వస్తున్నాయి అనే అర్థంతో బీజేపీ నినదించింది. ఈ స్లోగన్ ప్రజల్లోకి బాగా వెళ్లి బీజేపీకు పట్టం కట్టబెట్టడంలో కీలక పాత్ర పోషించింది.
బాగానే నాటుకుపోయినప్పటికీ!
"కాంగ్రెస్ కా హాత్‌-ఆమ్‌ ఆద్మీ కే సాత్‌ " 2004లో కాంగ్రెస్ పార్టీకి అధికారం కల్పించిన నినాదం ఇది. వారి పార్టీ గుర్తయిన హస్తాన్ని ప్రత్యేకంగా తీసుకుని.. "కాంగ్రెస్ చేయి సామాన్యుడితోనే " అనే అర్థంలో దీన్ని తీసుకొచ్చారు. ఇది విపరీతంగా ప్రజాదరణ పొందడం వల్ల ఆ ఎన్నికల్లో మన్మోహన్‌ సింగ్ నేతృత్వంలో యూపీఏ కూటమి విజయం సాధించగలిగింది. దివంగత ప్రధాని వాజ్‌పేయీ నేతృత్వంలోని ఎన్డీయే కూటమి 2004 ఎన్నికల్లో "ఇండియా షైనింగ్ "- భారత్ వెలిగిపోతోంది అనే నినాదంతో ఎన్నికలకు వెళ్లింది. ప్రపంచ వేదికపై భారత ఆర్థిక ఆశావాదానికి సంకేతంగా దీన్ని తీసుకొచ్చారు. అప్పట్లో ఈ నినాదం జనం నోళ్లల్లో బాగానే నాటుకుపోయినప్పటికీ ఎన్డీయేకు మాత్రం విజయం అందించలేకపోయింది.
ఇప్పుడు అటల్‌ బిహారీ వంతు!
1996 సార్వత్రిక ఎన్నికల్లో "బారీ బారీ సబ్‌కీ బారీ- అబ్‌కీ బారీ అటల్‌ బిహారీ" నినాదంతో భారతీయ జనతా పార్టీ పోలింగ్‌కు వెళ్లింది. "అందరి వంతు అయిపోయింది- ఇప్పుడు అటల్‌ బిహారీ వంతు" అనేది ఈ స్లోగన్ అర్థం. లఖ్‌నవూలోని ఓ ఎన్నికల ప్రచారంలో వాజ్‌పేయీ ఈ నినాదమిచ్చారు. అప్పట్లో ఇది దేశవ్యాప్తంగా విపరీతంగా ప్రచారమైంది. అవినీతి మచ్చలేని ఆయన ప్రధాని అభ్యర్థిగా నిలబడిన ఆ ఎన్నికల్లో బీజేపీ విజయం సాధించింది. అయితే ఆ ప్రభుత్వం 13 రోజులకే కూలిపోయింది.
77 ఏళ్ల స్వతంత్ర భారత చరిత్రలో!
1984లో అప్పటి ప్రధాని ఇందిరాగాంధీ దారుణ హత్యకు గురయ్యారు. ఆ ఘటన తర్వాత జరిగిన ఎన్నికల్లో "జబ్‌ తక్‌ సూరజ్‌ చాంద్‌ రహేగా- ఇందిరా తేరా నామ్‌ రహేగా " అనే నినాదంతో కాంగ్రెస్ ముందుకు వెళ్లింది. "సూర్య చంద్రులు ఉన్నంతవరకు ఇందిరాగాంధీ పేరు గుర్తుండిపోతుంది" అనే అర్థం వచ్చేలా ఉన్న ఈ స్లోగన్‌తో ఆమె కుమారుడు,మాజీ ప్రధాని రాజీవ్‌గాంధీ ప్రజల్లోకి వెళ్లారు. ఇది బాగా పనిచేసి ఆ ఎన్నికల్లో కాంగ్రెస్ పార్టీ 404 స్థానాలను దక్కించుకుంది. 77 ఏళ్ల స్వతంత్ర భారత చరిత్రలో ఒక పార్టీ లేదా సంకీర్ణ ప్రభుత్వం కేంద్రంలో ఆ స్థాయిలో మెజార్టీ దక్కించుకోవడం అప్పుడే జరిగింది. ఆ తర్వాత ఇప్పటివరకు ఈ రికార్డును ఏ పార్టీ సాధించలేకపోయింది.